އިލެކްޝަން އަދި ފެނަކަ ބިލްޑިންގް (ދައުރު ފޮޓޯ/ މުހައްމަދު އަމާން)
ފެނަކައިން ހިންގި ހުރިހާ މަޝްރޫއެއް އެމްޑަބްލިއުއެސްސީއަށް ބަދަލުކޮށްފި
ފެނަކައިން ރަށްރަށުގައި ކުރިއަށްގެންދިޔަ މަޝްރޫއުތަކުގެ އެއްބަސްވުންތައް ބާތިލްކޮށް، އެ މަޝްރޫއުތައް އެމްޑަބްލިއުއެސްސީއާ ހަވާލުކުރުމުގެ މަސައްކަތް ފަށައިފި އެވެ.
ވީ ކިހިނެއް؟ - ރައްޔިތުންގެ މަޖިލީހުގެ މިއަދުގެ ޖަލްސާއަށް ހާޒިރުވެ، ބ. ދޮންފަނުގައި ކުރިއަށްގެންދާ ފެނާއި ނަރުދަމާގެ ނިޒާމްގެ މަޝްރޫއާ ގުޅޭ ގޮތުން ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ކުރެއްވި ސުވާލަކަށް ޖަވާބުދެއްވަމުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބް ވިދާޅުވީ ފެނަކައިން ކުރިއަށްގެންދިޔަ ފެނާއި ނަރުދަމާގެ ހުރިހާ މަޝްރޫއެއް އެމްޑަބްލިއުއެސްސީއާ ހަވާލުކުރަން ސަރުކާރުން ނިންމާފައިވާ ކަމަށެވެ.
ތަފްސީލް - މުއްތަލިބު ވިދާޅުވީ މިހާރު ފަށާފައިވާ ފެނާއި ނަރުދަމާގެ އެއްވެސް މަޝްރޫއެއް ސަރުކާރުން ހުއްޓާނުލާނެ ކަމަށެވެ. އެހެންވެ، ވީހާ ވެސް އަވަހަކަށް އެމްޑަބްލިއުއެސްސީއާ ހަވާލުކުރަން ޓެންޑާ ބޯޑާ އެކު މަޝްވަރާކުރަމުން އަންނަ ކަމަށް އޭނާ ވިދާޅުވި އެވެ.
"ފެނަކައަކީ މިކަހަލަ ޕްރޮޖެކްޓްތައް ހިންގާ ކޮންޓްރެކްޓަރަކަށް ނުވާތީ ހިދުމަތް ފޯރުކޮށްދޭ ސާވިސް ޕްރޮވައިޑާއަކަށްވާތީ ސަރުކާރުން ނިންމީ އެ ޕްރޮޖެކްޓް [ދޮންފަނުގެ ފެނާއި ނަރުދަމާ] އަދި އެގޮތަށް ފެނަކައާ ހަވާލުކޮށްފައިވާ ހުރިހާ މަޝްރޫއެއް ކޮންޓްރެކްޓް ބާތިލްކުރުމަށް ފަހު އެމްޑަބްލިއުއެސްސީއާ ވާހަކަ ދައްކައިގެން ޑައިރެކްޓް ނެގޮޝިއޭޝަންގެ ތެރެއިން އެކަން ކުރިއަށް ގެންދަން،" މުއްތޮލިބް ވިދާޅުވި އެވެ.
މުއްތޮލިބް އިތުރަށް ވިދާޅުވީ:
-
20 ރަށެއްގެ ފެނާއި ނަރުދަމާ އެމްޑަބްލިއުއެސްސީއާ ހަވާލުކުރަން ނިންމާފައިވޭ
-
އެ ޕްރޮޖެކްޓްތަކަށް 1 ބިލިއަން ރުފިޔާ ހަރަދުވާނެ ކަމަށް ލަފާކުރެވޭ
-
އެ ހުރިހާ ރަށެއްގެ މަސައްކަތް ކުރާނީ އެއް ޕްރޮޖެކްޓެއްގެ ގޮތަށް
ފާހަގަކޮށްލެވޭ - ފެނަކައިން ކުރިއަށް ގެންދިޔަ ޕްރޮޖެކްޓްތަކެއް އެމްޑަބްލިއުއެސްސީއާ ހަވާލުކުރުމާ ގުޅޭ ގޮތުން މަޝްވަރާކުރަން ކޮންސްޓްރަކްޝަން މިނިސްޓްރީން ވަނީ މިދިޔަ މޭ މަހުގެ ކުރީކޮޅު ވަނީ އެމްޑަބްލިއުއެސްސީއާ ބައްދަލުކޮށްފަ އެވެ.
އެ ބައްދަލުވުމާ ގުޅިގެން ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު މިއަދު ވިދާޅުވީ އެ ކޯޕަރޭޝަނާ ހަވާލުކޮށްފައިވާ ފެނާއި ނަރުދަމާގެ މަޝްރޫއުތަކެއް ކޮންސްޓްރަކްޝަން މިނިސްޓްރީން އެމްޑަބްލިއުއެސްސީއާ ހަވާލުކުރީ އެ ޕްރޮޖެކްޓްތައް އަވަހަށް ނިންމުމުގެ ބޭނުމުގައި ކަމަށާއި އެފަދަ ހަރަދެއް މިވަގުތު ފެނަކައަށް ކުރެވެން ނެތުމުން ކަމަށެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެނަކައިގެ ދަރަނި އިތުރުވެ، ކުންފުނީގެ މުވައްޒަފުންގެ އަދަދު ބޮޑުތަނުން މަތިވެ، އެ ކުންފުނި ވަނީ މާލީ މައްސަލަތަކެއްގެ ތެރެއަށް ވެއްޓިފަ އެވެ. އެ ކުންފުނިން ސަޕްލަޔަރުންނަށް ދޭންވެފައި ހުރި ފައިސާގެ އަދަދު އެތައް ބިލިއަން ރުފިޔާއަކަށް އަރަ އެވެ.
ހަރަދު ކުޑަކުރުމުގެ ގޮތުން ފެނަކައިން އަންނަނީ އެ ކުންފުނީގެ ޕްރޮޖެކްޓްތަކަށް ނަގާފައި ހުރި މުވައްޒަފުންތައް ވަޒީފާއިން ވަކިކުރަމުންނެވެ. އެގޮތުން، މިހާތަނަށް 900އަށް ވުރެ ގިނަ މުވައްޒަފުން ވަނީ ވަކިކޮށްފަ އެވެ.