ޕެންޝަން އޮފީހުގެ އިސްވެރިން މިނިވަން މުއައްސަސާތަކުގެ މިއަދުގެ ކޮމެޓީގައި - (ފޮޓޯ/ މަޖިލިސް)
ޑަބަލް ޕެންޝަނުގެ ގޮތުގައި މަހަކު 33 މިލިއަން ރުފިޔާ ހަރަދުވޭ: ޕެންޝަން އޮފީސް
އަސާސީ ޕެންޝަނުގެ ބޭރުން އެހެނިހެން ޕެންޝަން (ޑަބަލް ޕެންޝަން)ގެ ގޮތުގައި 33 މިލިއަން ރުފިޔާ ކޮންމެ މަހަކުވެސް ހަރަދުވާ ކަމަށް ޕެންޝަން އެޑްމިނިސްޓްރޭޝަން އޮފީހުން މިއަދު ބުނެފި އެވެ.
ވީ ކިހިނެއް؟ - ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީގައި ވާހަކަ ދައްކަވަމުން އެ އޮފީހުގެ ސީއީއޯ ސުޖާތާ ހަލީމް ވިދާޅުވީ އަސާސީ ޕެންޝަނަށް މަހަކު 110 މިލިއަން ހަރަދު ކުރާއިރު ޑަބަލް ޕެންޝަނަށް އެހާ ބޮޑު އަދަދެއް ހަރަދުވުމަކީ ކަންބޮޑުވާ ކަމެއް ކަމަށެވެ.
ޕެންޝަންގައި މިހާރު ހިމެނެނީ:
-
މޯލްޑިވްސް ރިޓަޔަމަންޓް ޕެންޝަން ސްކީމް
-
އުމުރުން ދުވަސްވީ މީހުންގެ އަސާސީ ޕެންޝަން ސްކީމް
-
އުމުރުން 65 އަހަރުވުމުން ދޭ ޕެންޝަން 23،000 މީހުންނަށް ލިބޭ؛ އޭގެ ތެރޭގައި ޑަބަލް ޕެންޝަން ލިބޭ މީހުން ގިނަ
ތަފްސީލް - ޑަބަލް ޕެންޝަނަށް 33 މިލިއަން ރުފިޔާ ހަރަދުވާ ގޮތް ވަރަށް ތަފްސީލްކޮށް ސުޖާތާ ކިޔައިދެއްވި އެވެ. އޭނާ ވިދާޅުވީ:
-
އެކި މުއައްސަސާތަކުން ރިޓަޔާމެންޓް ޕެކޭޖުގެ ގޮތުގައި ވަކި ވަރެއް ދޭ؛ އެގޮތުން 4،800 މީހުންނަށް ޖުމްލަ 28 މިލިއަން ރުފިޔާއަށް ވުރެ ބޮޑު އަދަދެއް ދޭ
-
ދިގު މުއްދަތަށް ހިދުމަތް ކުރުމުން ކޮންމެ މަހަކު ވަކި ވަރެއް އެބަދޭ؛ އެގޮތުން 2،000 މީހުންނަށް 4 މިލިއަނަށް ވުރެ ގިނަ ރުފިޔާ ދޭ
ސުޖާތާ ވިދާޅުވީ ދިގު މުއްދަތެއް ވާންދެން ހިދުމަތްކުރި މީހުންގެ އަގުވަޒަންކުރުމުގެ ގޮތުން ޕެންޝަން ނިޒާމް ތައާރަފްކުރި އިރު، އެ މީހުން ހިދުމަތްކުރި މުއްދަތުގެ %14އަށް ފައިސާ ޖަމާކޮށްދީފައިވާނެ ކަމަށެވެ. އެހެންކަމުން، ހިދުމަތުގެ އަގުވަޒަންކުރަން އިތުރު ޕެންޝަނެއް ދޭން ނުޖެހޭ ކަމަށް އޭނާ ވިދާޅުވި އެވެ.
"އެއީ ހިދުމަތުގައި އުޅުއްވާފައި ހުރި ކޮންމެ ބޭފުޅެއްގެ އެކައުންޓް އޯޕަނިންއަކަށް [ސުމަކުން ނުފަށަން ދިން %14] ދީފައި އިންނާނެ. އެހެންވީމަ އެއޮތީ ޕާސްޓް ސާވިސް ރެކޮގްނައިޒްކޮށްދެވިފައޭ މިދަންނަވަނީ. މީގެ އިތުރުން ވަޒީފާގައި އުޅުއްވަންޏާ ކޮންމެ މަހަކު އެބަ ކޮންޓްރިބިއުޓްކުރައްވާ، ދައުލަތުން ވެސް ކޮންޓްރިބިއުޓްކުރައްވާނެ ދައުލަތުގެ މުވައްޒަފުންނަށް،" އޭނާ ވިދާޅުވި އެވެ.
"އިންޑިވިޖުއަލްއެއްގެ ވަޒީފާގައި އުޅޭ މުޅި ޕީރިއަޑަށް އެ އިންނަނީ ޕެންޝަން އެކައުންޓަށް ކޮންޓްރިބިއުޓް ކުރެވިފައޭ. ދެން މީގެ ބޭރުން މިއަންނަނީ، މިސާލަކަށް އެކިއެކި މުއައްސަސާތަކުން ހިދުމަތުގެ މުއްދަތަށް އަނެއްކާވެސް ބަލައި އެކިއެކި ފޯމިއުލާތަށް މި ހުންނަނީ އެކި ތަންތަނުގައި، އެ ފޯމިއުލާތަކަށް ބަލައިގެން މިދެނީ ލަމްޕްސަމްއެއްގެ ގޮތުގައި އެމައުންޓެއް ކޮންމެ ބޭފުޅަކަށް ވެސް އެބަދޭ ކޮންމެވެސް އެމައުންޓެއް ލަމްޕްސަމްއެއްގެ ގޮތުގައި ރިޓަޔާމެންޓް ޕެކޭޖެއްގެ ގޮތުގައި."
ޕެންޝަނަށް މިގޮތަށް އިތުރަށް ކުރާ ހަރަދުތައް ކުޑަކުރަން މިިދިޔަ 15 އަހަރު އެކި މަސައްކަތްތައް އެކި ސަރުކާރުތަކާ އެކު ކޮށްފައިވާ ކަމަށް ސުޖާތާ ވިދާޅުވި އެވެ. އެގޮތުން، އެހެން ގައުމުތަކުގައި އެކަން ކުރާ ގޮތް ބަލައި ދިރާސާކޮށް ކަރުދާސްތައް ތައްޔާރުކޮށް އަދި ގާނޫނަށް ބަދަލު ގެންނަން އިސްލާހުތަކެއް ފިނޭންސް މިނިސްޓްރީއާ ހިއްސާކޮށްފައިވާނެ ކަމަށް އޭނާ ވިދާޅުވި އެވެ. ނަމަވެސް، އެކަން ކުރީ ސީދާ ކޮން އިރަކު ކަމެއް ސުޖާތާ ހާމައެއް ނުކުރައްވަ އެވެ.
އެނގުން މުހިންމު - ރާއްޖެ އަކީ މުޅި ދެކުނު އޭޝިއާގައި ވެސް އުމުރުން ދުވަސްވީ މީހުންނަށް ނިސްބަތުން އެންމެ ބޮޑު ހަރަދެއް ކުރާ ގައުމެވެ. ބައިނަލްއަގުވާމީ މިންގަނޑުތަކަށް ބަލާއިރު ވެސް ރާއްޖެއިން ޕެންޝަންގެ ގޮތުގައި ދޭ މިންވަރު ބޮޑެވެ. ވޯލްޑް ބޭންކުން ނެރުނު ރިޕޯޓެއްގައި ފާހަގަކުރި ގޮތުގައި:
-
ރާއްޖޭގައި އުމުރުން ދުވަސްވީ މީހުންނަށް ދޭ ޕެންޝަން ބޮޑު އިރު، މަދުވެގެން މަހަކު 5،000ރ. ލިބޭ؛ ކުރިއަށް އޮތް ތަނުގައި ވަޒީފާ އަދާކުރާ އާބާދީ ކުޑަވެ، އުމުރުން ދުވަސްވީ މީހުންގެ އާބާދީ ބޮޑުވާއިރު، ދެމެހެއްޓެނިވި ގޮތެއްގައި އެ ޕެންޝަން ދެވޭނެ ކަމަކަށް ނުބެލެވޭ
-
ޕެންޝަން ދިނުމަށް ކަނޑައަޅާފައިވާ އުސޫލުތަކަށް ބަދަލު ގެނެސް، މުޅި ނިޒާމުގެ ހަރަދު ކުޑަކުރަން ޖެހޭ
-
ވަޒީފާއިން މުސްކުޅި ކުރާ އިރު، އަމިއްލަ މަސައްކަތުން ފައިސާ އެއްކޮށްފައި ބަހައްޓަން ހިތްވަރު ދޭން އިނާޔަތްތަކެއް ތައާރަފުކުރެވިދާނެ