އީސީން ހުށަހެޅީ މަޖިލީހުގައި ކޮންމެ އަތޮޅަކަށް މަދުވެގެން ދެ ގޮނޑި ދޭން

ރައްޔިތުންގެ މަޖިލީހުގެ މެންބަރުންގެ ޖުމްލަ އަދަދެއް ކަނޑައެޅުމަށް ފަހު ކޮންމެ އަތޮޅަކަށް ދެ މެންބަރުން ކަނޑައަޅައި ބާކީ ގޮނޑިތައް އާބާދީގެ ނިސްބަތުން ބަހާލަން އިލެކްޝަން ކޮމިޝަނުން ހުށަހަޅައިފި އެވެ.

ވީ ކިހިނެއް؟ - މަޖިލިސް މެންބަރުންގެ އަދަދު އިތުރުވެގެން ދިއުން ހިފެހެއްޓުމާ ގުޅޭ ގޮތުން ބާރަށު ދާއިރާގެ މެންބަރު އިބްރާހިމް ޝުޖާއު ހުށަހަޅުއްވާފައިވާ ގާރަރަށް އިލެކްޝަން ކޮމިޝަންގެ ހިޔާލު ހޯދުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމުގައި ބައިވެރިވެވަޑައިގެން ވާހަކަ ދައްކަވަމުން އިލެކްޝަން ކޮމިޝަންގެ ރައީސް ފުއާދު ތައުފީގު ވިދާޅުވީ އެގޮތަށް ނިންމުމުން އާބާދީ ބޮޑު އަތޮޅުތަކަށް ގިނަ ގޮނޑި ލިބޭނެ ކަމަށެވެ.

ތަފްސީލް - މިސާލެއްގެ ގޮތުން އޭނާ ވިދާޅުވީ މަޖިލީހުގެ ޖުމްލަ މެންބަރުންގެ އަދަދު 77 ކަމުގައި ހަމަޖެއްސުމަށް ފަހު މާލެއަށް ދެ ގޮނޑި އަދި ކޮންމެ އަތޮޅަކަށް ވެސް ދެ ގޮނޑި ކަނޑައެޅުމުން ބާކީ 35 ގޮނޑި އިންނާނެ ކަމަށެވެ. އޭރުން ކޮންމެ އާބާދީއަކަށް ވެސް އެކަށީގެންވާ ވަރަށް ގޮނޑި ލިބޭނެ ކަމަށް ފުއާދު ވިދާޅުވި އެވެ.

"މިސާލަކަށް 2029 އަށް ބަލާލާއިރު ހއ އަށް އިތުރަށް ދެ ގޮނޑި، ހާއްސަ ކުރެވިފައިވާ ގޮނޑިއާ އެކު 4 ގޮނޑި ލިބޭނެ. މާލެއަށް އިތުރަށް ލިބޭނީ 8 ގޮނޑި، ޖުމްލަ 10 ގޮނޑި. މިސާލަކަށް އައްޑޫއަށް ބަލާއިރު ހާއްސަ ކުރެވިފައިވާ 2 ގޮނޑި އާއި އިތުރު 3 ގޮނޑިއާއެކު ޖުމްލަ 5 ގޮނޑި ލިބޭނެ،" ފުއާދު ވިދާޅުވި އެވެ.

އޭނާ ވިދާޅުވީ އޭރުން 2008 ގައި މަޖިލީހުގައި މެންބަރުން ތިބިވަރާ ގާތްކުރާ އަދަދަކަށް މެންބަރުން މަދުވާނެ ކަމަށާއި އަދި އެއްވެސް ދާއިރާއަކަށް ގޮނޑި ލިބޭ މިންވަރު މަދެއް ވެސް ނުވާނެ ކަމަށެވެ.

އެގޮތަށް ބަދަލު ކުރުމުން ލިބޭނެ އިތުރު ފައިދާއެއް ކަމަށް ފުއާދު ވިދާޅުވީ ދާއިރާތައް އޮޅުންބޮޅުން ނުވުމެވެ.

"މިގޮތަށް ކެޕް އެޅުވިގެންދާކަމަށްވަންޏާ 2050 އާ ހަމައަށް ވެސް ދާދި މިގޮތަކަށް އަންނާނީ، އެއީ ގްރޯތު ވެސް އުޅޭނީ ހުރިހާ ދިމާލަކުން ވެސް އެއްކަހަލަ ގޮތަކަށް، އެހެން ވީމާ އެއްވަރެއްގައި އަތޮޅުތަކުގައި ގޮނޑިތައް ހިފެހެއްޓިފައި ވާނީ އެހެންވެއްޖިއްޔާ އެ ދާއިރާތައް އެއްގޮތެއްގައި ހަމަޖެހިގެންދާނީ، އެ ދާއިރާގެ މީހުންނަށް ވެސް އިތުރު ފަސޭހައެއް ލިބި މެންބަރުންނަށް ވެސް އިތުރު ފަސޭހަފުޅުތަކެއްތަކެއްވެ އޭރުގައި އޮންނަ ސަރުކާރަކަށް ވެސް ފަސޭހަވެގެންދާނެ." ފުއާދު ވިދާޅުވި އެވެ.

ފާހަގަކޮށްލެވޭ - މިމައްސަލަޔާ ގުޅޭގޮތުން އެމްޑީޕީ އަދި ޕީއެންސީއާ ވެސް މީގެ ކުރިން ވަނީ ބައްދަލުކޮށްފަ އެވެ. ދެ ޕާޓީން ވެސް ވަނީ ވަކި އަދަދެއްގައި މެންބަރުންގެ އަދަދު ހިފަހައްޓަން ތާއީދުކޮށްފަ އެވެ.

ރައްޔިތުންގެ މަޖިލީހުގެ މެމްބަރުންގެ އަދަދު 77 ގައި ހިފަހައްޓަން ގާނޫނު އަސާސީއަށް ގެންނަންޖެހޭ ބަދަލުތައް ގެންނާނެކަމަށް ރައީސް ޑރ މުހައްމަދު މުއިއްޒުވަނީ ވިދާޅުވެފަ އެވެ.