ސިވިލް ސާވިސް ކޮމިޝަނުން އައްޔަންކުރާ އެސްޖީން ބައެއް ކައުންސިލުތަކުން އޮފީހަށް ނުވައްދާ: ސީއެސްސީ

ސިވިލް ސާވިސް ކޮމިޝަން (ސީއެސްސީ) އިން ލޯކަލް ކައުންސިލްތަކަށް އައްޔަންކުރާ ސެކްރެޓަރީ ޖެނެރަލް (އެސްޖީ) އިން، ބައެއް ކައުންސިލުތަކުން ބަލައިނުގަނެ، އޮފީހަށް ނުވައްދާ މައްސަލަތައް ކުރިމަތިވާތީ ސިވިލް ސާވިސް ގާނޫނަށް އިސްލާހު ގެންނަން ހުށަހަޅާފައިވާނެ ކަމަށް ސީއެސްސީން މިއަދު ބުނެފި އެވެ.

ވީ ކިިހިނެއް؟ - ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިއަދު ވަނީ ސީއެސްސީގެ މަސައްކަތްތަކާ ގުޅޭގޮތުން މައުލޫމާތު ސާފުކުރުމަށް އެ ކޮމިޝަންގެ މެމްބަރުން ހާޒިރުކޮށްފަ އެވެ.

އެ ބައްދަލުވުމުގައި ސީއެސްސީގެ ރައީސް މުހައްމަދު ނާސިހް ވިދާޅުވީ، ސީއެސްސީގެ ގާނޫނަށް މުހިންމު އިސްލާހުތަކެއް ގެނައުމަށް އެޓާނީ ޖެނެރަލް (އޭޖީ) އޮފީހާ އެކު ކުރި މަޝްވަރާތަކަކަށް ފަހު، ބައެެއް އިސްލާހުތައް އެ އޮފީހަށް ހުށަހަޅާފައިވާނެ ކަމަށެވެ. 

ތަފްސީލް - އޭޖީއަށް ހުށަހެޅި އިސްލާހުތަކުގެ ތެރޭގައި، ކައުންސިލުތަކަށް އެސްޖީން އައްޔަންކުރުމަށް މިހާރު އޮންނަ އުސޫލު ބަދަލުކުރުމުގެ އިސްލާހެއް ހިމެނޭ ކަމަށް ނާސިހް ވިދާޅުވި އެެވެ.

އެ އިސްލާހު ހުށަހެޅުއްވި ސަބަބެއް ކަމަށް އޭނާ ވިދާޅުވީ، އެސްޖީން އައްޔަންކުރުން މިހާރު އޮންނަނީ އެ ކޮމިޝަނަށް ނަމަވެސް، އެ ކޮމިޝަނުން އައްޔަންކުރާ އެސްޖީން ބައެއް ކައުންސިލުތަކުން ގަބޫލުނުކުރާތީ ދިމާވާ މައްސަލަތައް ހައްލުކުރުމެވެ.

"ބައެއް ފަހަރު ވާގޮތަކީ، އެނގިވަޑައިގަންނަވާނެ، ކައުންސިލުތަކުގައި އެކުލެވިގެންވަނީ އެކި ސިޔާސީ ފިކުރުގެ ބޭފުޅުން ކަމަށްވާތީ މައިގަނޑު ގޮތެއްގައި [ވަކި އެސްޖީއަކު] އައްޔަންކުރަން ބޭނުންނުވާ ކަމުގެ ލަފާ އަޅުގަނޑުމެންނަށް ލިބޭ،" ނާސިހް ވިދާޅުވި އެވެ.

އޭނާ ފާހަގަކުރެއްވި ގޮތުގައި:

"އެކަމަކު [ކައުންސިލުން އެ ބުނާ ގޮތަށް] އައްޔަންކުރެވޭކަށް އަޅުގަނޑުމެންނަކަށް ނޯވޭ. އެއީ އަޅުގަނޑުމެންގެ ގާނޫނުގައި ވެސް މި އޮންނަނީ އެންމެ ރަނގަޅު އެންމެ ގާބިލު މީހެކޭ އައްޔަންކުރަންޖެހޭނީ. އެހެންވީމާ މިއީ އަޅުގަނޑުމެންނަށް ދިމާވާ ގޮންޖެހުމެއް. ދެން ބައެއް ފަހަރު އަޅުގަނޑުމެން އެގޮތަށް އައްޔަންކުރާ އެސްޖީން ކައުންސިލުތަކުން، ކައުންސިލުތަކުގެ އިދާރާއަށް ނުވައްދާ ވެސް އެބަހުރި،" ނާސިހް ވިދާޅުވި އެވެ.

އޭނާ ވިދާޅުވިީ ހިޔާލު ތަފާތުވުންތަކުގެ ސަބަބުން ޖެހޭ މައްސަލަ ހައްލުކުރެވޭނީ، އެސްޖީން އައްޔަންކުރުމުގެ ބާރު ކޮންމެވެސް އެއް އިދާރާއަކަށް މުތުލަގުކޮށް ދޫކޮށްލައިގެން ކަމަށެވެ. އެ ބާރު ސީއެސްސީއަށް ނުވަތަ ކައުންސިލަށް އެކަނި ލިބޭ ގޮތަށް ގާނޫނު އިސްލާހު ކުރަންޖެހޭ ކަމަށް އޭނާ ވިދާޅުވި އެވެ.

އެ ވާހަކަތަކާ ގުޅިގެން ކޮމިޓީގެ ބައެއް މެމްބަރުން ވަނީ، ކަންބޮޑުވުން ފާޅުކޮށް، އެފަދައިން އަމަލުކުރާ ކައުންސިލުތަކާ މެދު އެއްވެސް ފިޔަވަޅެއް މިހާތަނަށް އަޅާފައިވޭތޯ ސުވާލު ކުރައްވައިފަ އެވެ.

ޖަވާބުގައި ސީއެސްސީގެ ނައިބު ރައީސް އިބްރާހިމް ރަޝީދު ވިދާޅުވީ، ގިނަ ކައުންސިލުތަކުން އެއްބާރުލުން ދޭ ކަމަށާއި، އެ މައްސަލަ މިހާތަނަށް ދިމާވެފައިވަނީ ދެ ކައުންސިލެެއްގައި ކަމަށެވެ. ކޯޓާ ހިސާބަށް ވެސް މައްސަލަ ދިޔަ ކަމަށާއި އެސްޖީއަކަށް ވަޒީފާ ދިނުމަށް ކޯޓުން ވެސް އަންގާފައިވާ ކަމަށް ރަޝީދު ވިދާޅުވި އެވެ.

ނަމަވެސް އެ މައްސަލަގަނޑުގެ ތެރޭގައި އެ މުވައްޒަފު ފަހުން އިސްތިއުފާ ދިނުމުން، ނުކުރާ މަސައްކަތަށް ދިގު މުއްދަތަކަށް ފައިސާ ދޭން ޖެހުނުކަން ވެސް ރަޝީދު ފާހަގަކުރެއްވި އެވެ. އޭނާ ވިދާޅުވީ، އެފަަދައިން ކައުންސިލުތަކުން އަމަލުކުރުމުގެ ސަބަބުން ކޯޓުގެ މަރުހަލާގައި ޖަވާބުދާރީވާން ޖެހެނީ ވެސް ސީއެސްސީއަށް ކަމަށާއި، ނަމަވެސް، ސީއެސްސީއަށް އެކަމުގައި ނެގޭނެ ދިފާއެއް، ކުރެވޭނެ ކަމެއް ނޯންނަ ކަމަށެވެ.

"އެހެންވީމާ މީގައި ގާނޫނަށް ބަދަލު ގެންނަންވީ [ކޮމިޝަނުގެ ރައީސް ނާސިހް] ވިދާޅުވިހެން. އެއް ގޮތަކީ ކައުންސިލުގެ އެސްޖީއަކީ ސީދާ ކައުންސިލުން އައްޔަންކުރާ މީހެއްގެ ގޮތުގައި. ނޫނީ ކައުންސިލުގެ އެއްވެސް ބަހެއްނެތި މެރިޓް އުސޫލުން އައްޔަންކުރާ މީހެއްގެ ގޮތުގައި. ދެ ގޮތުން ކުރެ ގޮތަކަށް ބަދަލުވެގެން ނޫނީ މި މައްސަލައަކަށް ދުވަހަކުވެސް ހައްލެއް ނާންނާނެ،" ރަޝީދު ވިދާޅުވި އެވެ.

އެނގުން މުހިންމު - ސިވިލް ސާވިސްގެ ގާނޫނަށް އެހެން ވެސް ގިނަ އިސްލާހުތަކެއް ގެނައުމަށް ހުށަހަޅާފައިވާކަން ސީއެސްސީން މިއަދު ފާހަގަކުރި އެވެ. ބައެއް އިސްލާހުތަކަކީ: