އޭސީސީގެ ރައީސް އާދަމް ޝާމިލް އާއި ސްޕޯޓްސް މިިނިސްޓަރު އަބްދުﷲ ރާފިއު. (ފޮޓޯ/އޭސީސީ)
ކުޅިވަރުގައި ކޮރަޕްޝަން ހުއްޓުވަން އޭސީސީއިން 'ޕަޗަސް' އިފްތިތާހުކޮށްފި
ކުޅިވަރުގެ ދާއިރާއިން ކޮރަޕްޝަން ނައްތާލައި އެ ދާއިރާގެ ނަޒާހާތްތެރިކަން ކުރިއެރުވުމަށް އެންޓި ކޮރަޕްޝަން ކޮމިޝަން (އޭސީސީ)އިން ހާއްސަ ކެމްޕޭނެއް ފަށައިފި އެވެ.
ވީ ކިހިނެއް؟ - އޭސީސީގެ 'ޕްރޮމޯޓިން އެންޓި ކޮރަޕްޝަން، އޮނެސްޓީ އެންޑް އެކައުންޓެބިލިޓީ އިން ސްޕޯޓްސް' (ޕަޗަސް) ކެމްޕޭން މިއަދު އިފްތިތާހުކޮށްދެއްވީ ސްޕޯޓްސް މިނިސްޓަރު އަބްދުﷲ ރާފިއު އެވެ.
ތަފްސީލު - މި ކެމްޕޭނަކީ އޭސީސީ އާއި ސްޕޯޓްސް މިނިސްޓްރީ ގުޅިގެން ކުޅިވަރުގެ ދާއިރާ ކޮރަޕްޝަނުން ސަލާމަތް ކުރުމާއި ކުޅިވަރުގައި ނަޒާހަތްތެރިކަން ކުރިއެރުވުމުގެ މަގުސަދުގައި ފެށި ކެމްޕޭނެކެވެ.
ޕަޗަސް ކެމްޕޭންގައި ހިމެނޭ މުހިންމު ކަންކަމަކީ:
-
ކުޅިވަރުގެ ދާއިރާގައި ހިންގާ ކޮރަޕްޝަނާއި އިދާރީ ހިންގުމުގައި ހުރި ކޮރަޕްޝަންގެ ހިރާސްތައް ދިރާސާކޮށް، ފިޔަވަޅު އެޅުމާ ގުޅޭ އަދި ނަޒާހަތްތެރި ކުރިއެރުވުމަށް ކުރެވޭނެ ކަންކަން ބެލުމަށް އޭސީސީއިން މިހާރު ވެސް ފަށާފައިވާ 'ކުޅިފަސް' ދިރާސާ ކުރުން
-
އިދާރާތަކާއި ކުޅިވަރު ޖަމިއްޔާ ޖަމާއަތްތަކާއި އެހެނިހެން މަސްއޫލުވެރި އިދާރާތަކުގައި ކޮމިޝަނުން ތައްޔާރުކޮށްފައިވާ ކޮރަޕްޝަން ރިސްކު ސެލްފް އެސެސްމަންޓް (ހިންމި) ކުރިއަށްގެންގޮސް، ކޮރަޕްޝަންގެ ހިރާސް އޮތް މިންވަރު ވަޒަންކޮށް، އަޅަންޖެހޭ ފިޔަވަޅުތައް ދެނެގަނެ ތަންފީޒު ކުރަން އެހީތެރިވުން
-
ކުޅިފަސް ދިރާސާ އާއި ހިންމި އެސެސްމަންޓުން ފާހަގަވާ ކޮރަޕްޝަންގެ ހިރާސްތައް ކުޑަކުރުމަށް ބޭނުންވާ ސިޔާސަތުތައް އެކަށައަޅައި ތަންފީޒުކުރުމަށް އެހީތެރިކަމާއި އެއްބާރުލުންދިނުން
-
ކުޅިވަރާ ގުޅިފައިވާ ކޮރަޕްޝަންގެ ސަބަބުން ލިބޭ ގެއްލުންތަކާއި ކުޅިވަރާ ބެހޭ ނަޒާހަތްތެރިކަން ކުރިއެރުވުމުގެ މައްޗަށް ކުޅިވަރާ ގުޅޭ ދައުލަތުގެ އިދާރާތަކުގެ މުވައްޒަފުންނާއި ޖަމިއްޔާ ޖަމާއަތްތަކުގެ މެމްބަރުންނާއި އާންމުން ހޭލުންތެރިކުރުވައި، ކުޅިވަރުގެ ނަޒާހަތްތެރިކަން ކުރިއެރުވުމަށް މަސައްކަތް ކުރުން