ފުވައްމުލަކު ގެއެއްގައި ކައްޓެޅި ގަރުދިޔަ ކައްކާފައި (ދައުރު ފޮޓޯ/އަލީ ރަފީގު)
އާންމުންގެ ސުވާލެއް: އަހަރެމެންނަށް ބަތާއި ގަރުދިޔަ ކެވިދާނެ؛ ތިބޭފުޅުންނަށް ކެވޭނެތޯ؟
ޕީއެންސީއިން ރޭ ބޭއްވި ހަރުގެ ޖަލްސާގައި ރައީސް އޮފީީހުގެ މިނިސްޓަރު އަލީ އާރިފު، އާންމުންނަށް ވިދާޅުވެދެއްވީ އިގްތިސާދީ ގޮތުން ރާއްޖެއަށް ދަތި މި ދުވަސްވަރު ހަރަދު ކުޑަ ކުރެވިދާނެ ގޮތްތަކެވެ. އޭނާ ވިދާޅުވާ ގޮތުގައި ކެއުމުގައި ބަތާއި ގަރުދިޔަ ބޭނުންކޮށް، އާދައިގެ ދިރިއުޅުމަކަށް ރައްޔިތުން ތިރިވާން އެބަ ޖެހެ އެވެ.
"މިދުވަސްކޮޅު މިޖެހެނީ އަޅުގަނޑުމެން އަބަދު ޓޭކްއަވޭ ހަދައިގެން ގޭގައި އަޅުގަނޑުމެން ކޭ ކެއުން ހުއްޓާލާފައި ކޮންމެވެސް ވަރަކަށް ގޭތެރޭ އަމިއްލައަށް ކައްކައިގެން ގަރުދިޔަ އާއި ބަތާ ކައްކައިގެން ކާލައިގެން ތަންކޮޅެއް އާދައިގެ ދިރިއުޅުމަކަށް ތިރިވެލަން،" އޭނާ ވިދާޅުވި އެވެ.
އަލީ އާރިފުގެ އެ ވާހަކަތަކާ އެކު އާންމުން އަންނަނީ ސޯޝަލް މީޑިއާގައި ނުރުހުން ފާޅުކުރަމުންނެވެ. އަނެއް ބަޔަކު ޖޯކް ޖަހަމުންނެވެ. އެގޮތުން ބަތާއި ގަރުދިޔައިން 'މޮޑެފައިވާ' ކޮމެންޓުތަކުން މުޅި ސޯޝަލް މީޑިއާ ފުރާލައިފި އެވެ.
'އާދައިގެ މީހާއަށް އަބަދުވެސް އޮތީ ބަތާއި ގަރުދިޔަ'
ބަތާއި ގަރުދިޔައަކީ މިހާރުވެސް ގިނަ ދިވެހިންގެ ދުވަހު ކެއުމަށް ބޭނުންކުރާ ބާވަތެކެވެ. އެހެންވެ އަލީ އާރިފު އެހެން ވިދާޅުވިއިރު، ބަތާއި ގަރުދިޔަ ފިޔަވައި ރައްޔިތުން ދެން ކައިއުޅެނީ އިތުރު ކޮން އެއްޗެއްތޯ އެއް ބަޔަކު ސުވާލު އުފެއްދި އެވެ.
"އާދައިގެ ރައްޔިތު މީހާއަށް އަބަދުވެސް ކާން ލިބެނީ ބަތާއި ގަރުދިޔަ. ދައުލަތުން ބޮޑު ހަރަދު ކުރަނީ ތިކަހަލަ ސިޔާސީ ބޭފުޅުންނަށް. މުސާރަ 65،000އިން މަތިން. ސިއްހީ ފަރުވާ ހިލޭ، ކެއުން ހިލޭ، ދަތުރުފަތުރު ހިލޭ، ބޮޑު އަދަދަކުން ޕެންޝަން،" ފާޑުކީ މީހަކު ކުރި ކޮމެންޓެއްގައިވެ އެވެ.
"އާދައިގެ ދިރިއުޅުމަކަށް ބަޔަކު ތިރިވާން ޖެހޭ ނަމަ ވާންވީ ސިޔާސީ ބޭފުޅުން، އާދައިގެ ރައްޔިތުންނެއް ނޫން."
ހަމަ އެ ވިސްނުމުގައި ފޭސްބުކްގައި ހިޔާލުފާޅުކުރި މީހަކު ބުނީ އަލީ އާރިފު ވިދާޅުވާ ހާލަތަށް ރައްޔިތުން ތިރިވާން ނުޖެހޭ ކަމަށެވެ.
"ރައްޔިތުން އަމިއްލަ މަސައްކަތުން ހޯދާ ދިރިއުޅުން ތިރިކުރަން އެއްވެސް ހާލެއްގައި ރައްޔިތުންގެ ފައިސާއިން މުސާރަ ނަގައިގެން ހުރިހާ ހަރަދެއް ކުރާ ބަޔަކަށް ބުނެވިގެން ނުވާނެ،" އެ މީހާ ލިއުނެވެ.
ރައްޔިތުން ހަރަދުކުރަނީ ސަރުކާރުން ދޭ ފައިސާ ނޫން ކަމަށާއި އޭގެ ބަދަލުގައި ރައްޔިތުން ދައްކާ ޓެކްސް ފައިސާއިން ސަރުކާރު ހިންގާއިރު، ހިންގުން ހަރުދަނާކޮށް، އިސްރާފު ކުޑަކުރަންވީ ސަރުކާރުން ނޫންތޯ ވެސް އެހެން މީހަކު ބުންޏެވެ.
ބަތާއި ގަރުދިޔަ ކާން ދިން ނަސޭހަތަށް ބައެއް މަސްވެރިންގެ ފަރާތުން ވެސް ވަނީ ނުރުހުން އަމާޒުވެފަ އެވެ. 'މަސްވެރި އިހަވަންދޫ' ފޭސްބުކް ޕޭޖުން މަސްވެރިއެއްގެ އިހުސާސް ކަމަށް ބުނެ ކޮށްފައިވާ ޕޯސްޓެއްގައި ބުނީ އެ މަސްވެރިޔާ އުޅެނީ ބަތާއި ގަރުދިޔަ ވެސް ނުކެވިގެން ކަމަށެވެ.
"ގަރުދިޔަ ވެސް ކެވޭނީ މަހެއް 'ބެވިގެން'. މަހެއް 'ބެވެން' އޮތީ ކަނޑަށް ނުކުމެގެން. ކަނޑަށް ނުކުމެވެން އޮތީ ތެޔޮ ގަނެވިގެން،" އެ ޕޯސްޓުގައިވެ އެވެ.
'ހަރަދު ކުޑަކުރުން: ވެރިންގެ މުސާރައިން ފަށަންވީނު؟'
އަލީ އާރިފްގެ ވާހަކަތަކަށް ރައްދު ދިން ބައެއް މީހުން ބުނާ ގޮތުގައި ހަރަދު ކުޑަކުރުމުގެ ފިޔަވަޅުތައް ފަށަންވީ ސަރުކާރުންނެވެ. މިސާލަކަށް ސިޔާސީ މަގާމުތަކާއި ހަރަދުތަކާއި ކޮރަޕްޝަން މަދުކޮށްގެންނެވެ.
"މީގެން މީހެއްގެ މުސާރަ ތިރިކުރާ ވާހަކަ ނުދައްކާ. އެ ވާހަކަ ދެއްކިއްޔާ މާ ރަނގަޅުވާނެ،" 'އެކްސް'ގައި ކުރި މީހަކު ލިއުނެވެ.
މީގެން މީހެއްގެ މުސާރަ ތިރި ކުރާވާހަކަ ނުދައްކާ އެ ވާހަކަ ދެއްކިއްޔާމާ ރަނގަޅުވާނެ https://t.co/1clBj8s9Xc
— 𝑨𝒛𝒘𝒂𝒓® #FreePalestine 🇵🇸 (@axvastaine7) July 15, 2024
ބައެއް މީހުންގެ ނަޒަރުގައި މާލީ ތަކުލީފު ކުޑަކުރެވެން އޮތީ ސަރުކާރާއި ދައުލަތުގެ މަގާމުތަކުގައި ބޮޑެތި މުސާރައިގައި ތިއްބަވާ ބޭފުޅުންނަށް ބަތާއި ގަރުދިޔަ ކެވޭ ހާލަތަށް ގޮސްގެން ކަމަށެވެ.
"ސަރުކާރާއި ދައުލަތުގެ މަގާމުތަކުގައި، ނުބައްދަލު މުސާރައިގައި ތިބޭ މީހުން ގަރުދިޔަ ބަތް ކެވޭ މާލީ ހާލަތަށް ބަދަލުވީމަ ގައުމަށް ދިމާވެގެން އުޅޭ މާލީ ތަކުލީފު ކުޑަކުރެވުން މާ ގާތް،" އެހެން މީހަކު ކުރި ޕޯސްޓެއްގައިވެ އެވެ.
"މި ތަކުލީފަކީ ރައްޔިތު އެހެން އެންމެންނަށް ޖައްސާ ދައްޗަކަށް ވެގެން ނުވާނެ. ފަގީރުކަމަށް ވައްޓާލީ ސިޔާސީން!"
ސަރުކާރާ ދައުލަތުގެ މަގާމުތަކުގައި ނުބައްދަލު މުސާރައިގަ ތިބޭ މީހުން ގަރުދިޔަބަތް ކެވޭ މާލީ ހާލަތަށް ބަދަލު ވީމާ ގައުމަށް ދިމާވެގެންއުޅޭ މާލީ ތަކުލީފު ކުޑަކުރެވުން މާ ގާތް.
— Humay 🎈❓ (@HumayAG) July 15, 2024
މިތަކުލީފަކީ ރައްޔިތު އެހެން އެންމެންނަށް ޖައްސާ ދައްޗަކަށް ވެގެން ނުވާނެ.
ފަގީރުކަމަށް ވައްޓާލީ ސިޔާސީން! https://t.co/2BLBPvbXr1
ކުރީގެ ނައިބު ރައީސް މުހައްމަދު ޖަމީލު އަހްމަދުގެ ފާޑުކިޔުން އަމާޒުވީ މި ސަރުކާރުން ހަރަދު ބޮޑުކޮށް ކުރި ބައެއް ކަންކަމާއި ވައުދާ ހިލާފު ބައެއް ކަންކަމުގެ ލިސްޓަކާ އެކީގަ އެވެ. އަދި ގޮވާލެއްވީ ސަރުކާރާއި އެމްބަސީތަކާއި އެސްއޯއީތައް ކުޑަކުރުމަށެވެ.
ރިޔާސީ އަދި މަޖްލިސް އިންތިޚާބުތަކާ ދިމާކޮށް އެތަކެއް އެއަރޕޯޓެއް، ބްރިޖްތައް، ބަނދަރުތައް، ފްލެޓް އަދި ސިފައިން/ފުލުހުންގެ މުސާރަ ޑަބަލް. އެކަނިވެރިމައިންނަށް 12000 ރުފިޔާ ދިނުމުގެ ވައުދު. ސިޔާސީ މަގާމު، ޑެޕއުޓީން 700އަށް ވުރެ ގިނަ ނުކުރުމުގެ ވައުދު. ސ. މިނިސްޓަރުން އަދަދު… https://t.co/qztp4tkF2r pic.twitter.com/8RK2MrfC3P
— Mohamed Jameel Ahmed (@MJameelAhmed) July 15, 2024
އަލީ އާރިފުގެ ވާހަކައާ ބެހޭ ގޮތުން 'ދައުރު'ގައި ޖެހި ހަބަރަށް ކޮމެންޓު ކުރި މީހުން ވެސް ވަނީ އޭނާއަށް ފާޑުކިޔާފަ އެވެ.
"ކޮވިޑްގެ ދުވަސްވަރު އެންމެ ލާރި ފޮއްޗެއް ދައުލަތުގެ ހަޒާނާއަށް ނުލިބުނު ދުވަހު ވެސް ރައްޔިތުން ކައިިރީ ގަރުދިޔަ ބޯކަށް ނާންގާ. ތިއުޅެނީ ވެރިކަން ކުރަން ނޭނގިގެން،" ކޮމެންޓުކުރި މީހަކު ބުންޏެވެ.
ގަރުދިޔަ ކައްކާ ގޮތުގެ ރެސިޕީއިން ފެށިގެން ގޮސް ސޯޝަލް މީޑިއާގައި ނުސީދާކޮށް ފާޑުކިޔާ މީހުންގެ އަދަދު ވެސް މަދެއް ނޫނެވެ. އޭގެ އެއް މިސާލަކީ 'އެންމެ މީރީ ގަރުދިޔަ އާއި ބަތޭ'ގެ ނަމުގައި ޒުވާން ޅެންވެރިޔާ އިއްޒާ އަހުމަދު ނިޒާރު ހެދި ޅެމެވެ.
'ދިވެހި ދަރިއެއްކަމު މަ ވިޔަތީ ކާން މަށަށް ހަމަ ކަމުދަނީ، ދިވެހި ބަދިގެތަކުން އެ ކައްކާ މީރު ގަރުދިޔައާ ބަތޭ'، ޅެމުގެ ފަހު ބައިތުގެ ގޮތުގައި އޭނާ ލިއުނެވެ.
ނިންމާލުމުގެ ކުރިން ރަހުމަތްތެރިޔަކު ކުރި ވަރަށް މުހިންމު ސުވާލެއް ވެސް ހިމަނާލާނަމެވެ:
"އަހަރެން މިއީ ބަތާއި ގަރުދިޔަ ކެވޭ މީހެއް ނޫން. ދެން އަހަރެން ކިހިނެއް ހަރަދު ކުޑަ ކުރާނީ؟"
ކޮމެންޓް (1)
އެއް ހަމަ