ގަވާއިދު އޮތް ގޮތުން މެމްބަރުން މުއްސަނދިކަން ހޯދާ ގޮތް ކަށަވަރުނުވޭ: ޓްރާންސްޕޭރެންސީ

މިހާރު އަމަލުކުރަމުން އަންނަ ގަވާއިދުތައް ހުރި ގޮތުން ރައްޔިތުންގެ މަޖިލީހުގެ މެމްބަރުންގެ މުއްސަނދިކަން ކަށަވަރުކޮށް، އެއީ ކިހިނެއް ހޯދި މުއްސަނދިކަމެއްކަން ބަލަން ދަތިވާ ކަމުގެ ކަންބޮޑުވުން ޓްރާންސްޕޭރެންސީ މޯލްޑިވްސްއިން ފާޅުކޮށްފި އެވެ.

ބުނީ ކީކޭ؟ - މި މައްސަލާގައި ޓްރާންސްޕޭރެންސީއިން މިއަދު ނެރުނު ނޫސް ބަޔާނެއްގައި ބުނީ މިހާރު ގަވާއިދު އޮތް ގޮތުން މެމްބަރުކަމަށް އިންތިހާބުވެ، މަގާމާ ހަވާލުވާއިރު މާލީ ބަޔާން ހުށަހަޅަން ނުޖެހޭ ކަމަށެވެ.

"މިހާރު ކަނޑައެޅިފައިވާ އުސޫލުގެ މަތިން މެމްބަރުންގެ އެންމެ ފުރަތަމަ މާލީ ބަޔާން މަޖިލީހަށް ހުށަހަޅަން ޖެހެނީ މަގާމާ ހަވާލުވެވަޑައިގަތުމަށް ފަހު ދޮޅު އަހަރު ފަހުންނެވެ،" ޓްރާންސްޕޭރެންސީގެ ބަޔާނުގައިވެ އެވެ.

"މި ދިގު މުއްދަތުގެ ސަބަބުން މި މުއްދަތުގެ ތެރޭގައި މަޖިލިސް މެމްބަރުންގެ މުއްސަނދިކަން ކަށަވަރުކުރަން އުނދަގޫވެ، އެއްވެސް މުއްސަނދިކަމަކީ ނުހައްގު މުއްސަނދިކަމެއްތޯ ނުވަތަ ނޫންތޯ ކަނޑައެޅުމަށް ދަތިތަކެއް ކުރިމަތިވެ އެވެ."

މީގެ ސަބަބުން، ޓްރާންސްޕޭރެންސީ މޯލްޑިވްސްއިން ބުނީ، މަޖިލިސް މެމްބަރުންނަށް ރައްޔިތުންގެ މަސްލަހަތަށް ވުރެ އަމިއްލަ މަސްލަހަތު އިސްކުރުމުގެ ފުރުސަތު ވެސް ބޮޑުވާ ކަމަށެވެ.

ތަފްސީލު - ޓްރާންސްޕޭރެންސީއިން މަސައްކަތް ކުރަނީ މިހާރު އޮތް މާލީ ބަޔާން ހުށަހެޅުމުގެ ނިޒާމު، ބައިނަލްއަގްވާމީ އެންމެ ރަނގަޅު އުސޫލުތަކާއި މިންގަނޑުތަކާ އެއްގޮތަށް ހަރުދަނާ ކުރުމަށެވެ.

އެގޮތުން މާލީ އަދި އެހެނިހެން މަސްލަހަތުތައް ހާމަކުރުމުގެ ބިލު ޑްރާފްޓުކޮށް، ފެބްރުއަރީ 2022ގައި 19 މަޖިިލީހަށް ހުށަހެޅި ނަމަވެސް، ޓްރާންސްޕޭރެންސީއިން ބުނީ 19 ވަނަ މަޖިލިސް ނިމިގެންދިޔައިރު ވެސް އެ ބިލު އޮތީ ކޮމެޓީ މަރުހަލާގައި ކަމަށެވެ.

އެ ބިލަކީ މެމްބަރުން ހުށަހަޅާ މާލީ ބަޔާންތައް ކަށަވަރު ކުރެވޭ ނިޒާމެއް އެކުލަވާލައި، މާލީ ބަޔާން ހުށަނާޅާ މެމްބަރުންނަށް ފިޔަވަޅު އަޅާ ގޮތަށް ތައްޔާރުކޮށްފައިވާ ބިލެކެވެ.

އިތުރު ކަންބޮޑުވުމެއްގެ ގޮތުގައި ޓްރާންސްޕޭރެންސީއިން ފާހަގަކުރި ކަމަކީ ރައްޔިތުންގެ މަޖިލީހުގައި އާންމުންގެ މަސްލަހަތަށް ވުރެ މެމްބަރުންގެ އަމިއްލަ މައްސަލަހަތަށް ވަކާލާތު ކުރުމެވެ.

މަޖިލީހުގެ މި ދައުރުގައި ތިއްބެވި 93 މެމްބަރުންގެ ތެރެއިން 67 މެމްބަރުންނަކީ މުޅިން އަލަށް އިންތިހާބުވެވަޑައިގަތް މެމްބަރުން ކަމަށްވާއިރު، ޓްރާންސްޕޭރެންސީއިން ބުނީ އެ ބޭފުޅުންގެ އެސެޓާއި ދަރަނިތަކާއި އެހެން މަސްދަރުތަކުން ލިބޭ އާމްދަނީ އާއި މަސްލަހަތު ފުށޫއަރާ ކަންކަމުގެ މައުލޫމާތު އެއްވެސް މިންވަރަކަށް އެނގިފައިނުވާ ކަމަށެވެ.

ހަރުދަނާ ގާނޫނުތަކެއް ނެތް ނަމަވެސް، ޓްރާންސްޕޭރެންސީއިން ވަނީ ރައްޔިތުންގެ މަޖިލީހުގެ މެމްބަރުން މަގާމާ ހަވާލުވެވަޑައިގަންނަވާއިރު މާލީ ބަޔާންތައް އަމިއްލަ އިސްނެގުމުގެ މަތިން ހާމަކޮށް، ކޮރަޕްޝަނާ ދެކޮޅަށް ކުރާ މަސައްކަތުގައި އާންމުންގެ އިތުބާރު އިތުރުކުރުމަށް ގޮވާލާފަ އެވެ.