ހައުސިން މިނިސްޓްރީގެ ސްޓޭޓު މިނިސްޓަރު އަކްރަމް ކަމާލުއްދީން (ފޮޓޯ/ރައީސް އޮފީސް
އަކްރަމް ކަމާލުއްދީންގެ ފޯނު ހިފަހައްޓައިފި
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީންގެ ފޯނު އެންޓި-ކޮރަޕްޝަން ކޮމިޝަން (އޭސީސީ) އިން ހިފަހައްޓައިފި އެވެ.
ވީ ކިހިނެއް؟ - އެ ސަރުކާރުން ކުރިއަށް ގެންދިޔަ 'ގެދޮރުވެރިޔާ' ސްކީމުގެ ދަށުން ފްލެޓު ދިނުމުގެ ކަންތައްތަކުގައި އިސްކޮށް މަސައްކަތް ކުރެއްވި ކޮމެޓީގައި ހިމެނިވަޑައިގެންނެވި ބޭފުޅުންގެ ގެތަކަށް ކޯޓު އަމުރެއްގެ ދަށުން އޭސީސީން މިއަދު ވަނީ ވަދެފަ އެވެ.
އޭސީސީގެ އޮފިޝަލަކު ވިދާޅުވީ އެ ކޮމިޝަނުން ބަލައި ފާސްކުރަނީ ކުރީ ސަރުކާރުގެ ފްލެޓު ކޮމެޓީގައި ތިއްބެވި ހަތަރު މެންބަރަކު ދިރިއުޅުއްވާ ތަންތަން ކަމަށެވެ. އެގޮތުން ބަލާ ތަންތަނަކީ:
-
އޭރުގެ ހައުސިންގެ މިނިސްޓްރީގެ ސްޓޭޓު މިނިސްޓަރު އަކްރަމް ކަމާލުއްދީންގެ އެޕާޓްމަންޓް
-
ކޮމެޓީގެ މެންބަރު މުހައްމަދު އާރިފްގެ އެޕާޓްމަންޓް
-
ކޮމެޓީގެ މެންބަރު މުހައްމަދު ލިރުގާމްގެ އެޕާޓްމަންޓް
-
ކޮމެޓީގެ މެންބަރު އަހުމަދު ވިސާންގެ އެޕާޓްމަންޓް
ތަފްސީލް - "ދައުރު"އަށް އެނގިފައިވާ ގޮތުގައި ބަލައި ފާސްކުރުމަށް ފަހު އަކްރަމްގެ ގެއިން އޭނާގެ ފޯނާއި ލެޕްޓޮޕެއް ވަނީ ގެންގޮސްފަ އެވެ.
ކުރީގެ ސަރުކާރުން މާލޭގައި ދިރިއުޅޭ މީހުންނަށް ފްލެޓު ދިނުމަށް ހިންގި ގެދޮރުވެރިޔާ ސްކީމުން ފްލެޓު ލިބޭ މީހުންގެ ދާއިމީ ލިސްޓެއް އެ ސަރުކާރުގެ ފަހުކޮޅުގައި ވަނީ ގެޒެޓުކޮށްފަ އެވެ. އެގޮތުން:
-
ދައުރު ހަމަވީ ފްލެޓު ލިބުނު ބައެއް މީހުންނާ އެކު ފްލެޓު ކަނޑައަޅައި އެއްބަސްވުމެއްގައި ސޮއިކޮށްފައި ވަނިކޮށް
-
ދާއިމީ ލިސްޓަށް ގިނަ އަދަދެއްގެ މީހުން ޝަކުވާ ހުށަހެޅުމާ އެކު އޭސީސީން ތަހުގީގެއް ފެށި
-
އެ ތަހުގީގުގައި ބެލި ފޯމުތަކުގެ %59.6 ފޯމަކީ ޝަރުތު ހަމަނުވާ ފޯމުތަކެއް ކަމަށް ވަނީ ބުނެފައި
ގެދޮރުވެރިޔާ ސްކީމުން ފްލެޓަށް އެދި 20،696 މީހުން ކުރިމަތިލި އެވެ. އޭގެ ތެރެއިން ޝަރުތު ހަމަވާ 18،167 މީހުންގެ ލިސްޓެއް ކުރީ ސަރުކާރުގެ ހައުސިން މިނިސްޓްރީން އާންމުކުރި އެވެ.
އޭސީސީން ވަނީ އޭގެ ތެރެއިން ޝަރުތު ހަމަވާ 4،048 މީހުންގެ ފޯމު ދިރާސާކޮށްފަ އެވެ. ތަހުގީގުގައި ބެލި ފޯމުތަކުގެ ތެރެއިން ތެރެއިން:
-
ޝަރުތު ހަމަވެ، އެއްވެސް މައްސަލައެއް ނެތް ފޯމުތައް: %20.7
-
ޝަރުތު ހަމަވި ނަމަވެސް، މައްސަލަ ހުރި ފޯމުތައް: %19.7
-
ޝަރުތު ފުރިހަމަ ނުވާ ފޯމުތައް: %59.6
ކޮމެންޓް (4)
ާސަވާރިި
ސިކުނޑި
ހޮޅި
އަލީމު