![](https://cdn.dhauru.com/s3/media/2024/06/05/b3dbb557-b6ac-4936-8e57-0c07b6e22c30.webp?fit=crop-50-50&w=1400&h=800)
ރާއްޖެއަށް ދޭ އެހީ ހުއްޓާލަން ބިލް ހުށަހަޅުއްވާ ކޮންގްރެސް މެންބަރު ރިޕަބްލިކަން ޕާޓީއަށް ނިސްބަތްވާ ޖޯޝް ގޮތެއިމާ: ރާއްޖެއިން އެޅި ފިޔަވަޅު ބަލައި ނުގަނެވޭނެ ކަމަށް ވިދާޅުވި. (ފޮޓޯ/އެކްސިއޯސް)
އިޒްރޭލު ޕާސްޕޯޓް މަނާކުރާ ނަމަ ރާއްޖެއަށް އެމެރިކާގެ އެހީ ކަނޑާލަން ބިލެއް ހުށަހަޅަނީ
އިޒްރޭލުގެ ރައްޔިތުން ރާއްޖެ އެތެރެވުން މަނާކުރާ ނަމަ، އެމެރިކާއިން ރާއްޖެއަށް ދެމުން އަންނަ އެހީތައް އެއްކޮށް ކަނޑާލުމަށް އެމެރިކާގެ ގާނޫނު ހަދާ މަޖިލީހުގެ މެންބަރަކު ބިލެއް ހުށަހަޅުއްވަން ނިންމަވައި މަސައްކަތް ފައްޓަވައިފި އެވެ.
ވީ ކިހިނެއް؟ - އެމެރިކާގެ ނޫހެއް ކަމަށްވާ 'އެކްސިއޯސް' އިން ބުނީ، އިޒްރޭލު ރައްޔިތުން ރާއްޖެ އެތެރެވުން މަނާކުރުން ހުއްޓުވުމުގެ މަގުސަދުގައި ބިލެއް ހުށަހަޅުއްވަނީ އެމެރިކާގެ ގާނޫނު ހަދާ މަޖިލީހުގެ ތިރިގެ، ކޮންގްރެސްގެ މެންބަރެއް ކަމަށްވާ ރިޕަބްލިކަން ޕާޓީގެ ޖޯޝް ގޮތެއިމާ އެވެ.
-
އޭނާއަކީ އިޒްރޭލުގެ ދިފާއުގައި އެންމެ ވަރުގަދައަށް އަޑުއުފުލައްވާ ކޮންގްރެސްގެ މެންބަރު
ތަފްސީލް - އެކްސިއޯސިން ބުނި ގޮތުގައި، ގޮތެއިމާ ހުށަހަޅުއްވާ ބިލަށް ދީފައިވާ ނަމަކީ ރަހުމަތްތެރި ގައުމުތަކުގެ ރައްޔިތުން ދަތުރުފަތުރުކުރުން ހިމާޔަތް ކުރުމުގެ ބިލް ނުވަތަ 'ޕްރޮޓެކްޓިން އެލައިޑް ޓްރެވަލް ހިއާ އެކްޓް [ޕާތް]' އެވެ. ޑިމޮކްރެޓިކް ޕާޓީގެ މެންބަރުންގެ ތާއީދާ އެކު އޭނާ ހުށަހަޅުއްވައި ބިލުގައި ހިމެނެނީ:
-
އެމެރިކާއިން ރާއްޖެއަށް ދޭ އެހީތައް ދޭން ޖެހޭނީ އިޒްރޭލު ރައްޔިތުން ރާއްޖެ އެތެރެވާން ހުއްދަ ދިނުމަށް ޝަރުތުކޮށްފައި
-
އިޒްރޭލު މީހުން ރާއްޖެ އެތެރެވުމުގެ ހުއްދަ ނުދޭ ނަމަ، އެމެރިކާ ސަރުކާރުން ރާއްޖެއަށް އެއްވެސް އެހީއެއް ދިނުން މަނާވާނެ
ބުނީ ކީކޭ؟ - ބިލް ހުށަހަޅުއްވާ މެންބަރު ގޮތެއިމާ އެކްސިއޯސްއަށް ވިދާޅުވެފައިވަނީ އިޒްރޭލުގެ ހުރިހާ ރައްޔިތުން ރާއްޖެ އެތެރެވުން މަނާކުރަން ނިންމި ނިންމުމަކީ ޔަހޫދީންނާ މެދު ރުޅިވެރިކަން އުފެއްދުން ކަމަށެވެ. އަދި އެމެރިކާގެ އެންމެ ގާތް ރަހުމަތްތެރި ގައުމާ މެދު މިފަދަ ފިޔަވަޅެއް އެޅުމަށް ނިންމި ނިންމުމަކީ ބަލައިގަނެވޭނެ ކަމެއް ނޫން ކަމަށް ވެސް އޭނާ ވިދާޅުވެފައިވެ އެވެ.
"އެ ނިންމުން [ރާއްޖޭގެ ނިންމުން] ބަދަލުނުކުރާހާ ހިނދަކު އަހަރެމެންގެ ޓެކްސް ފައިސާއިން ބައި ސެންޓު ވެސް އެ ގައުމަށް ދެވިގެން ނުވާނެ. އިޒްރޭލުގެ ހުރިހާ ރައްޔިތުން އެ ގައުމަށް ދަތުރުކުރުން މަނާކޮށްފައިވާ ބޭރު ގައުމަކަށް އެމެރިކާ ރައްޔިތުންގެ ޓެކްސް ފައިސާ ދިނުމަކީ ކޮށްގެންވާނެ ކަމެއް ނޫން،" ގޮތެއިމާ ވިދާޅުވެފައިވެ އެވެ.
އެހީގެ ނަމްބަރުތައް
އެމެރިކާގެ ސްޓޭޓް ޑިޕާޓްމަންޓުގެ ތަފާސްހިސާބުތައް ދައްކާ ގޮތުން، މިދިޔަ ހަތަރު އަހަރުގެ ތެރޭގައި އެމެރިކާއިން ގާތްގަނޑަކަށް 36 މިލިއަން ޑޮލަރު (555 މިލިއަން ރުފިޔާ)ގެ މާލީ އެހީތެރިކަން ރާއްޖެއަށް ވަނީ ދީފަ އެވެ. މީގެ އިތުރަށް:
-
މިފަހުން އެމެރިކާގެ އެހީތައް ރާއްޖެއަށް އިތުރުކުރަން ނިންމާފައިވޭ
-
ރާއްޖޭގެ ކަނޑުގެ ސަރަހައްދު ބެލެހެއްޓުން ހަރުދަނާކުރަން ހާއްސަ ކަނޑުގެ އުޅަނދެއް ރާއްޖެއަށް ހަދިޔާކުރަން އެ ގައުމުން ވަނީ އެއްބަސްވެފައި
-
އެމެރިކާގެ ބައެއް މާލީ ހިދުމަތްތައް ކަމަށްވާ ޕޭޕާލްގެ ހިދުމަތްތައް ރާއްޖެއަށް ތައާރަފްކުރަން ވެސް އެ ގައުމާ އެކު ރާއްޖެއިން މަޝްވަރާކުރަމުން އާދޭ
އެނގުން މުހިންމު - ވަޒީރުންގެ މަޖިލީހުން މިދިޔަ އާދިއްތަ ދުވަހު ނިންމާފައި ވަނީ އިޒްރޭލު ރައްޔިތުން ރާއްޖެ އެތެރެވުން އެކީ މަނާކުރުމަށެވެ. އަދި އެކަމަށް ގާނޫނަށް ގެންނަން ޖެހޭ އިސްލާހުތައް ލަސްނުކޮށް މަޖިލީހަށް ފޮނުވަން ސަރުކާރުން މަސައްކަތް ފަށާފައިވާކަން ވެސް އެ ދުވަހު ހާމަކުރި އެވެ.
ނަމަވެސް، އެކަން ތަންފީޒު ކުރާނޭ ދުވަހެއް އަދި ނޭނގެ އެވެ.
ކޮމެންޓް (12)
ވިސްނޭ
ވިސްނޭ
ވިސްނޭ
ފަލަސްތީނު
ބައިޑެންގެތަލަފުލު
ފަރުތަރުބަތު
ޝީބޫ
ދިވެހި ފަހުރު ވެރި ދަރިއެއް
ނަސީ
ޒަޔަންއަޔަން
ޓިނުބެ
ޏާއްކޮ