އެމެރިކަން ސެންޓަރު ބޭރުގައި ފަލަސްތީނާ ގުޅޭ ގުރެފިޓީއެއް ޖެހި އާޓިސްޓެއްގެ މައްސަލަ ބަލަނީ

ފަލަސްތީނާ ދެކޮޅަށް އިޒްރޭލުން ހިންގާ ގަތުލުއާންމުތަކަށް އެމެރިކާއިން ވާގިވެރިވާތީ އެކަމާ ދެކޮޅަށް ނުރުހުން ފާޅުކޮށް މާލޭގައި ހުންނަ އެމެރިކަން ސެންޓަރުގެ ބޭރުގައި ގްރެފިޓީއެއް ޖެހި އާޓިސްޓެއްގެ މައްސަލަ ފުލުހުން ބަލަން ފަށައިފި އެވެ. 

ވީ ކިހިނެއް؟ - ރާއްޖޭގެ ގްރެފިޓީ އާޓިސްޓް އަހުމަދު ސޮބާހް (ޓޮކްސިކްރޫ)  މިދިޔަ މެއި މަހުގެ 7 ވަނަ ދުވަހު ވަނީ މާލޭގައި ހުންނަ އެމެރިކަން ސެންޓަރުގެ ފާރުގައި އެމެރިކާއާ ދެކޮޅަށް ގްރެފިޓީއެއް ޖަހާފަ އެވެ. އެ ގްރެފިޓީގައި ސޮބާހް ލިޔެފައިވަނީ އެއީ "ކުޑަކުދިން މަރާ ޓެރަރިސްޓުން" ކަމަށެވެ.

ތަފްސީލް - ފުލުހުންގެ މީޑިއާ އޮފިޝަލް 'ދައުރު'އަށް ވިދާޅުވިގޮތުގައި:

ސޮބާހުގެ ގާނޫނީ ވަކީލް ހަމްޒާ ހަލީލް 'ދައުރު'އަށް ވިދާޅުވި ގޮތުގައި ސޮބާހު މިހާރު ވަނީ ތަހުގީގަށް ފުލުހަށް ހާޒިރުކޮށް ސުވާލުކޮށްފަ އެވެ. އެގޮތުން އޭނާގެ މައްޗަށް ކުރާ ތުހުމަތުތަކަކީ: 

"ދައުވާ މި ކުރަނީ، އިމާރާތަށް ގެއްލުންދިން ކަމަށް. އެކަމަކު އޭނާ އިމާރާތުގެ ބިއްލޫރިގަނޑެއް އެއްޗެއް ތަޅައެއް ނުލާ. ސޮބާހް [ގްރެފިޓީ] ޖެހީ ފަސޭހައިން ފުހެވޭނެ އެއްޗަކުން. ދެ ފަރާތުގައި ބިއްލޫރި ދެ ދޮރު ހުރި އިރު، ދޮރަކަށް ވެސް ސްޕްރޭއެއް ނުޖަހާ. އެކަމަށް ވިސްނައިގެން، ފާރަށް އެކަނި ސްޕްރޭ ކުރީ،" ހަމްޒާ ވިދާޅުވި އެވެ.

މިހާރު އެމެރިކަން ސެންޓަރުގެ ފާރުގައި ސޮބާހް ޖެހި ގްރެފިޓީގެ މަތީގައި ކުލަލައި، އެ ގްރެފިޓީ ވަނީ ފޮހެލައިފަ އެވެ.

ސޮބާހް 'ދައުރު'އަށް ބުނި ގޮތުގައި، އޭނާގެ ބޭނުމަކަށްވީ، ފަލަސްތީނުގައި ހިނގަމުންދާ ގަތުލުއާންމާ ބެހޭގޮތުން އަޑު އުފުލާ، އެކަމާ ބެހޭގޮތުން މީހުން ހޭލުންތެރި ކުރުމެވެ. ސޮބާހް 'ދައުރު'އަށް ބުނި ގޮތުގައި:

"އަހަރެންނަށް ގަބޫލުކުރެވޭ ގޮތުގައި އެގޮތަށް އެއް ގައުމަކުން ވީޓޯ ކުރުމަކީ އެއީ ޑިކްޓޭޓާޝިޕް. އެކަމަކު ޑިމޮކްރަސީ މި ކިޔަނީ. ބައިވަރު ގައުމުތަކުން އެއްކޮޅަށް ހިފިޔަސް، އެމެރިކާ އިން ވީޓޯ ކުރާ ހިސާބުން މި ހުއްޓެނީ. މިއީ އެ ގްރެފިޓީ ޖެހި އެއް ސަަބަބު،" ސޮބާހް އޮޅުންފިލުވައިދިނެވެ.

"އަހަރެން ބޭނުންވީ މެސެޖެއް ދޭން. ދުނިޔޭގެ ވަރަށް ބައިވަރު ގައުމުތަކުން ވެސް އެމެރިކާއާ ދެކޮޅަށް ވާހަކަ ދައްކަނީތާ."

ސޮބާހް އަކީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުން ފެށިގެން އިންސާނީ ހައްގުތަކަށް ވަކާލާތުކޮށް، މުޖުތަމައުގެ ތެރޭގައި ހުރި ބޮޑެތި މައްސަލަތަކާ ބެހޭގޮތުން އަޑު އުފުލަން ގްރެފިޓީ އާއި އާޓް ބޭނުންކޮށްފައިވާ ފަންނުވެރިއެކެވެ. އެ މަސައްކަތުގެ ތެރެއިން ގައުމުގެ އެތައް ވެރިންނަކަށް ވެސް އޭނާ ފާޑުކިޔާފައިވެ އެވެ.

ނަމަވެސް، ގްރެފިޓީއެއްގެ މައްސަލާގައި އޭނާގެ މައްޗަށް ދައުވާ އުފުލި މިއީ ފުރަތަމަ ފަހަރެވެ.

ވަކީލު ހަމްޒާ ހަލީލް 'ދައުރު'އަށް ވިދާޅުވި ގޮތުގައި، ސޮބާހުގެ މައްސަލަ ބަލަމުންދަނީ، ވަރަށް 'ސީރިއަސް' މައްސަލައެއްގެ ގޮތުގައި، ޖިނާއީ ބޮޑެތި މައްސަލަތައް ބަލާ މަތީ ފެންވަރުގެ ދެ އިންވެސްޓިގޭޓިވް އޮފިސަރުންނެވެ.

ސޮބާހް ގަބޫލުކުރާ ގޮތުގައި، އެމެރިކާ އިން ނަސްލެއް ނައްތާލުމުގެ ބޮޑު ގަތުލުއާންމަކަށް ވާގިވެރިވެ ބިލިއަނުން ފައިސާ ހަރަދު ކުރަމުންދާ އިރު، އެކަމަށް ފާޑުކިޔައި ފާރެއްގައި ކުރެހުމެއް އަޅާލުމަކީ އަސްލު ވަރަށް ކުޑަ ކަމެކެވެ. އެކަން ކުރީ އެއްވެސް ވަރަކަށް އިމާރާތަށް ގެއްލުން ދިނުމުގެ ނިޔަތަކު ނޫން ކަމަށް ވެސް ސޮބާހް ބުންޏެވެ.

އެކަމުގެ ސަބަބުން ދަތިކަމެއް ކުރިމަތިވި އެންމެންގެ ފަރާތުން އޭނާ މައާފަށް ވެސް އެދުނެވެ. އެ މައްސަލައާ ގުޅިގެން ސޮބާހު ނެރުނު ބަޔާނުގައި ވެސް އޭނާ އެކަން ފާހަގަކޮށްފައިވެ އެވެ.

"އަހަރެން ބޭނުމެއް ނޫން ކޮންމެހެން މަޝްހޫރުވާކަށް. މި މައްސަލައިގައި ވެސް މި ވާހަކަ ދައްކަނީ މި ހިސާބަށް މިކަން ދިޔައިމަ. މިކަމާ މެދު ހޭލުންތެރި ކުރަން ޖެހޭތީ،" ސޮބާހް ބުންޏެވެ.

އެކަމާ ގުޅިގެން އެމެރިކަން ސެންޓަރުގެ ބަހެއް ހޯދަން އެދުމުން، އެ މައްސަލަ މިހާރު ފުލުހަށް ހުށަހަޅާފައިވާތީ ސެންޓަރުގެ ފަރާތުން ކޮމެންޓެއް ދޭން ވަނީ އުޒުރުވެރިވެފަ އެވެ.

ސޮބާހް ބުނީ އޭނާ ފުލުހުންގެ ތަހުގީގަށް އެއްބާރުލުން ދެމުން އަންނަ ކަމަށެވެ. އަދި ގްރެފިޓީ ކުރެހި ކަމަށް އިއުތިރާފުވެ، ފުލުހުންގެ ސުވާލުތަކަށް ތެދުވެރިކަމާ އެކު ޖަވާބު ދީފައިވާނެ ކަމަށް ވެސް ބުންްޏެވެ. 

ރާއްޖެއަކީ އަބަދުވެސް ފަލަސްތީނުގެ ހައްގުތަކަށް ވަކާލާތުކުރާ ގައުމަކަށް ވެފައި، ރާއްޖެއިން އިޒްރޭލާ އެހާ ދެކޮޅު އިރު، އޭނާ ގްރެފިޓީއެއް ކުރެހުމުން މައްސަލަ މިހާ ބޮޑުވެ، ދައުވާ ކުރާ ހިސާބަށް ކަންތައް ދާތީ ސޮބާހް ސުވާލު އުފައްދަ އެވެ. އޭނާ ބުނީ މިކަހަކަ ކަންކަމުގައި އާޓް ބޭނުންކޮށްގެން ހިޔާލުފާޅުކުރުމުގައި އޭނާ ދެމި ހުންނާނެ ކަމަށެވެ.