ސޯޝަލް މިނިސްޓަރީ އިން ބޭއްވި ޕްރެސް ކޮންފަރެންސްގައި މިނިސްޓަރު ޑރ. އައިޝަތު ޝިހާމް ވާހަކަދައްކަވަނީ. (ދައުރު ފޮޓޯ/ އަބްދުﷲ އަނޫފް ޖުނައިދް)
އުމުރުން ދުވަސްވީ މީހުންގެ އާބާދީ ގިނަވާތީ ހާއްސަ މަސައްކަތްތަކެއް ފަށައިފި
ރާއްޖޭގައި އުމުރުން ދުވަސްވީ މީހުންގެ އާބާދީ ބޮޑުވަމުން ދާތީ، އެމީހުންނަށް އަބުރުވެރި ހަޔާތެއް ހޯދައި ދިނުމަށްޓަކައި ހާއްސަ ސަމާލުކަމެއް ދީގެން ސަރުކާރުން މަސައްކަތްތަކެއް ފަށާފައިވާ ކަަމަށް ސޯޝަލް މިނިސްޓަރު ޑރ. އައިޝަތު ޝިހާމް ވިދާޅުވެއްޖެ އެވެ.
ވީ ކިހިނެއް؟ - އޭނާ މިހެން ވިދާޅުވީ އިޖުތިމާއީ އަދި އާއިލީ ތަރައްގީގެ ރޮނގުން މިދިޔަ ހަ މަސް ދުވަހުގެ ތެރޭގައި ކޮށްފައިވާ މަސައްކަތްތަކާ ބެހޭ މައުލޫމާތު ދިނުމަށް މިނިސްޓްރީ އަދި ކަމާބެހޭ މުއައްސަސާތަކުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ބުނީ ކީކޭ؟ - "މިހާރު އަޅުގަނޑުމެން އެކަމަށް ތައްޔާރު ވެގެން ނޫނިއްޔާ އެންމެ އެކަށީގެންވާ ގޮތަށް [އެކަމަށް] އަޅުގަނޑުމެންނަށް އެޓެންޑް ނުވެވޭނެތީ އިސް ރަށްވެހިންގެ އޭރިއާ އަކީ އަޅުގަނޑުމެންނަށް ވަރަށް ސަމާލުކަން ދެވިގެން [މަސައްކަތްތަކެއް] ކުރެވިގެންދާ ކަމެއް،" މިނިސްޓަރު ވިދާޅުވި އެވެ. އޭނާ ފާހަގަކުރެއްވި ގޮތުގައި:
-
2022ގެ ބޯހިމެނުމުން ދައްކާ ގޮތުގައި ރާއްޖޭގައި އިސްރަށްވެހިންގެ އާބާދީ އަކީ %5
-
ނަމަވެސް ރާއްޖޭގައި ވިހާ މިންވަރު ދަށްވަމުންދާތީ އަދި ދިރިތިބޭ އުމުރު 80 އަހަރާ ގާތްކުރަމުންދާތީ ކުރިއަށް އޮތްތަނުގައި އިސްރަށްވެހިންގެ އާބާދީ ވަރަށް ބޮޑުވާނެ
-
މީގެ އިތުރުން، މިހާރު ރާއްޖޭގެ އިސްރަށްވެހިންގެ އާބާދީގެ ތެރެއިން %50 އަކީ ޑިޕްރެޝަން އާއި އެކަނިވެރިކަން ފަދަ ކަންކަން ތަހައްމަލު ކުރާ ބައެއް ކަމަށް 2022ގައި ހެދި ދިރާސާއަކުން ދައްކާ
ތަފްސީލް - އެހެންކަމުން، ދުރު ރާސްތާއަށް ވިސްނައިގެން އުމުރުން ދުވަސްވީ މީހުންގެ ދިރިއުޅުމުގެ ފެންވަރު ރަނގަޅު ކުރުމަށްޓަކައި ސަރުކާރުން ކުރަމުންދާ ބައެއް ކަންކަމަށް މިނިސްޓަރު އަލިއަޅުވާލެއްވި އެވެ.
އައިޝަތު ޝިހާމް ވިދާޅުވި ގޮތުގައި އިސް ރަށްވެހިންނަށް އެންމެ ބޮޑަށް ބޭނުންވާ އެއް ކަންތަކުގެ ގޮތުުގައި ފާހަގަކުރެވިފައިވަނީ ބޯހިޔާވަހިކަމެވެ. އެގޮތުން، ގިނަ އާއިލާތަކުން މާލެއަށް ދިރިއުޅުން ބަދަލުކޮށް، މާލޭގައި ދިރިއުޅެމުންދާއިރު އުމުރުން ދުވަސްވީ މައިންބަފައިން އެކަނި ރަށުގައި ދިރިއުޅޭ ކަން ފާހަގަކުރެއްވި އެވެ.
އެގޮތުން މިނިސްޓަރު ވިދާޅުވީ:
-
މާލެ ސަރަހައްދަށް ދިރިއުޅުން ބަދަލުކޮށްފައިވާ ގިނަ އާއިލާތައް ދިރިއުޅެނީ އުމުރުން ދުވަސްވެފައިވާ މައިންބަފައިން ގެނެސް ގެންގުޅެވޭނެ ފަދަ ޖާގަ އޮތް ތަންތަނުގަ އެއް ނޫން؛ އެހެންކަމުން ކުރިއަށްހުރި ބޯހިޔާވަހިކަމުގެ މަޝްރޫއު ހިންގާއިރު އެކަމަށް ރިއާޔަތް ކުރާނެ
-
ކުރިއަށް އޮތްތަނުގައި ހަދާ ހައުސިން ސްކީމްތަކުގައި އާއިލާއިން މައިންބަފައިން ބަލާ ކަމަށްވަންޏާ، އިތުރު ޕޮއިންޓް ލިބި އިތުރު ފައިދާތަކެއްވާ ގޮތަށް ބޯހިޔާވަހިކަމުގެ މަޝްރޫއުތައް ހިންގާނެ؛ އެކަން ރައީސް މުހައްމަދު މުއިއްޒު ނިންމަވައި، ކެބިނެޓުން ވެސް މިހާރު އޮތީ ފާސްކޮށްފައި
ދެވަނަ ކަމަކަށް އައިޝަތު ޝިހާމް ފާހަގަކުރެއްވީ، އިސް ރަށްވެހިންގެ އާބާދީގެ ތެރޭގައި ސިއްހީ މައްސަލަތަކާއި ގައިން ގަޔަށް ނާރާ ބަލިތައް މަދުކުރަން މަސައްކަތް ކުރުމެވެ.
"ކަންބޮޑުވުމަކީ، 40 އަހަރު ވާ ހިސާބުން، ސިއްހީ ހާލަތުތައް ނިޔާ ކުރާގޮތުން ވަރަށް ބޮޑު އިންވެސްޓްމެންޓެއް އޭނާގެ އަމިއްލަ ފަރާތުން ވެސް ސަރުކާރުގެ ފަރާތުން ވެސް އޭނައަށް [ފަރުވާ ކުރުމަށް] އެބަ ހޭދަ ކުރަންޖެހޭ. އެހެންވީމަ އަދި 65 އަހަރު ވާން ވާއިރަށް [ބަލި ހާލަތުގެ ސަބަބުން] ކަމެއް ނުކޮށް މަޑުކުރާ ކަމަށް ވެއްޖެއްޔާ، އިތުރު މަސައްކަތްތައް ނުކުރާ ކަމަށް ވެއްޖެއްޔާ އާބާދީގެ ވަރަށް ބޮޑު ބައެއް ވަރަށް ބަލި ޕޮޕިއުލޭޝަން އަކަށް މިވަނީ،" މިނިސްޓަރު ވިދާޅުވި އެވެ.
އެހެންކަމުން، މިހާރު ހިންގަމުންދާ ޕްރޮގްރާމްތަކުގެ އެންމެ ބޮޑު އަމާޒަކީ، އޭނާ ވިދާޅުވި ގޮތުގައި:
-
65 އަހަރުވެގެން ދާއިރު ސިއްހަތު ސަލާމަތުން ބަހައްޓައިގެން އުޅެވޭނެ ގޮތްތައް ހޯދުން
-
ހެލްތު މިނިސްޓްރީއާ ގުޅިގެން ދުރާލާ ކެއިންބުއިމުގެ ކަންކަން ރަނގަޅުކުރުމާއި ކަސްރަތު ކުރުމާ ބެހޭގޮތުން ހޭލުންތެރިކުރުން
-
ގައިންގަޔަށް ނާރާ ބަލިތަކުން ދުރުވުމަށްޓަކައި ބަލި ޖެހުމުގެ ކުރިން ބަލިން ރައްކާތެރިވުމުގެ ފިޔަވަޅުތައް އެޅުމުގެ މުހިއްމުކަމުގެ ވާހަކަ މުޖުތަމައުގެ ތެރޭގައި ދެއްކުން
އެއާ އެކު، ހާއްސަ އެހީއަށް ބޭނުންވާ މީހުންނާއި އުމުރުން ދުވަސްވީ މީހުންނަށް ވެސް ފަސޭހަކަމާ އެކު އެކި ހިދުމަތްތައް ހޯދާ، އެކަނި ތަންތަނަށް ގޮސް އުޅެވޭނެ ގޮތަށް 'އެކްސެސިބިލިޓީ' ރަނގަޅު ކުރުން މަޖުބޫރުކަން ފާހަގަކުރައްވާ، މިނިސްޓަރު ވިދާޅުވީ ސަރުކާރުން ކުރިއަށް ގެންދާ ހުރިހާ ތަރައްގީގެ މަޝްރޫއުތަކުގައި އެކަމަށް ރިއާޔަތްކޮށް، މިހާރު ހެދިފައި ހުރި އިމާރާތްތަކަކީ ވެސް އެކްސެސިބަލް ތަންތަނަށް ހައްދާނެެ ކަމަށެވެ.
މީގެ އިތުރުން އޭނާ ފާހަގަކުރެއްވި ގޮތުގައި:
-
މުޖުތަމައުއަށް ބޮޑެތި ހިދުމަތްތައް ކޮށްދީފައިވާ މީހުން ވެސް ވަކި އުމުރަކަށް ދިޔުމުން މުޖުތަމައުން ބާކީ ވެގެން ދޭ؛ އޭގެ ބަދަލުގައި އެމީހުން ވެސް މުޖުތަމައުގައި ބައިވެރިކުރެވޭނެ ގޮތްތައް ހޯދަން ޖެހޭ
-
ޒުވާނުންނާއި އިސް ރަށްވެހިންނާއި ދެމެދުގައި އޮތް ގުޅުން އިތުރުވާ ކަހަލަ ފުރުސަތުތަކެއް ދަނީ އުފައްދަމުން؛ އެގޮތުން އިސްރަށްވެހިންގެ ނާދީގައި 'ހިއުމަން ލައިބްރަރީ'ގެ ނަމުގައި ހިންގާ ޕްރޮގްރާމްގެ ދަށުން އުމުރުން ދުވަސްވީ މީހުންގެ ދިރިއުޅުމުގެ އެކި ވާހަކަތައް ޒުވާނުންނާ ހިއްސާ ކުރާނެ
ކޮމެންޓް (3)
ހިމާރުލްގައުމު
ދުރުމި
މިއޮތީ އަނެއް 6 ކަންތައް