އަރަބިއްޔާ ސްކޫލުގެ ކުއްޖަކު ކައިވެނިކޮށްގެން ނޫޅޭ: މިނިސްޓްރީ

އަރަބިއްޔާ ސްކޫލުގެ ކުއްޖަކު ކައިވެނިކޮށްގެން އުޅޭ ކަމަށް ބުނެ މި ހަފްތާގައި ފެތުރިފައިވާ އަޑުތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

ވީ ކިހިނެއް؟ - މިދިޔަ އާދިއްތަ ދުވަހު 'އެކްސް'ގައި ވަނީ، އަރަބިއްޔާ ސްކޫލްގެ ގްރޭޑް 10ގައި ކިޔަވަމުން އަންނަ، އުމުރުން 18 އަހަރު ނުވާ ފިރިހެން ކުއްޖަކު ކައިވެނިކޮށްގެން އުޅޭ ކަމަށް ބުނާ ވާހަކަތަކެއް ވަނީ ފެންމަތިވެފަ އެވެ.

ތަފްސީލް - އެކަމާ ގުޅޭ ގޮތުން އެޑިއުކޭޝަން މިނިސްޓްރީގެ މީޑިއާ ކޯޑިނޭޓަރު ނަޖާ ހާލިދު ވިދާޅުވީ އެ މިނިސްޓްރީއަށް އެފަދަ މައްސަލައެއް ހުށައަޅާފައި ނުވާ ކަމަށެވެ. ނަމަވެސް، އެ މައްސަލަ މިނިސްޓްރީގެ ސަމާލުކަމަށް އައުމާ އެކު މިނިސްޓްރީގެ ސްކޫލް ސޭފްޓީ، ހެލްތު އެންޑް ސަޕޯޓް ޑިވިޝަނުން ހާއްސަ ސަމާލުކަމެއް ދީގެން ބަލާފައިވާ ކަމަށް އޭނާ ވިދާޅުވި އެވެ.

"މިހާތަނަށް ބެލި ބެލުމުގައި އެކަހަލަ ކަމެއް އުޅޭކަން މިނިސްޓްރީއަށް އެނގިފައެއް ނެތް،" އޭނާ ވިދާޅުވި އެވެ.