ދިރާސީ އާ އަހަރަށް ސަރުކާރުން ރަނގަޅަށް ތައްޔާރު ނުވާ ކަމަށް ބުނެ އެމްޑީޕީގެ ފާޑުކިޔުން

މިއަދު ފެށުނު ދިރާސީ އާ އަހަރަށް ސަރުކާރުން އެކަށީގެންވާ ވަރަށް ތައްޔާރުވެފައި ނުވާ ކަމުގެ ކަންބޮޑުވުން އިދިކޮޅު އެމްޑީޕީން ފާޅުކޮށްފި އެވެ.

ވީ ކިހިނެއް؟ - ދިރާސީ އާ އަހަރު މިއަދު ފެށުމާ ގުޅިގެން ހުރި ކަންބޮޑުވުންތައް ފާހަގަކޮށް، އެމްޑީޕީން މިއަދު ނެރުނު ނޫސްބަޔާނެއްގައި އެޑިއުކޭޝަން މިނިސްޓްރީން ވާން ޖެހޭ ތައްޔާރީތައް ރަނގަޅަށް ވެފައި ނެތުމުން، 'ސްކޫލުގައި ދަރިވަރުން ހޭދަކުރަން ޖެހޭ ވަގުތު ކުރުގަޅުވާލައި އެކިއެކި ބަހަނާ ދައްކައިގެން އެކަން ފޮރުވަން މަސައްކަތް ކުރާ' ކަމަށް އިދިކޮޅުން ތުހުމަތުކޮށްފައިވެ އެވެ.

ތަފްސީލް - އެކަން ކުށްވެރިކޮށް، އެމްޑީޕީން އިތުރަށް ބުނި ގޮތުގައި:

ދިރާސީ ކަލަންޑަރަށް އެއްވެސް ރޭވުންތެރިކަމެއްނެތި އެކިފަހަރުމަތިން ގެންނަމުންދާ ބަދަލުތަކުގެ ސަބަބުން މިހާރުވެސް ދަރިވަރުންނަށް ފިލާވަޅުތަކުގެ ބޮޑުބައެއް ގެއްލި ދަރިވަރުންގެ އުނގެނުމުގެ މުޅި ތަރުތީބަށް ބޮޑެތި ގެއްލުންތަކެއް ލިބެމުންދާ ކަމުގެ ކަންބޮޑުވުން ވެސް އެމްޑީޕީން ފާޅުކުރި އެވެ.

"އަދި ވިއްސާރަ ބަހަނާއަކަށް ހަދާ، ފުރަތަމަ ހަފްތާގައި ކިޔަވައިދޭ ވަގުތު ކުރުކުރުމުން ދަރިވަރުންނަށް ގެއްލޭ ބައި އިތުރުވުމަކީ އަޅުގަނޑުމެންގެ ވަރަށް ބޮޑު ކަންބޮޑުވުމެކެވެ،" އެ ޕާޓީގެ ބަޔާނުގައިވެ އެވެ.

އެމްޑީޕީން ބުނި ގޮތުގައި، އެ ޕާޓީން އެދެނީ 'އެއްވެސް ރޭވުންތެރިކަމެއް ނެތި ކުއްލި ކުއްލިއަށް ނިންމާ ނިންމުންތަކުން' ދަރިވަރުންނާއި ޓީޗަރުންނަށް ދިމާވެދާނެ ބޮޑެތި ގެއްލުންތަކުން އެކުދިންނާއި އެ ބޭފުޅުން ސަލާމަތްވުން ކަމަށެވެ.

"އެހެންކަމުން، މިފެށޭ އާ ދިރާސީ އަހަރު މިނިސްޓްރީ އޮފް އެޑިއުކޭޝަން އިން ނިންމާ ނިންމުންތަކަކީ ހަރުދަަނާ، ތައުލީމީ ދާއިރާއަށް ފައިދާހުރި، ދަރިވަރުންނަށް ގެއްލުން ނުލިބޭ ނިންމުންތަކަކަށް ހެދުމަށް މި ޕާޓީން އިލްތިމާސް ކުރަމެވެ." އެމްޑީޕީން ބުންޏެވެ.