ޓްރީޓޮޕުން އައިވީއެފް ހަދައިގެން ދެ ކުއްޖަކު ލިބިއްޖެ

ޓްރީޓޮޕް ހޮސްޕިޓަލުގައި މިދިޔަ އަހަރު ފެށި އައިވީއެފް ޕްރޮގްރާމެއް ފެށި ފަހުން. މިހާތަނަށް ދެ ކުއްޖަކު ވިހައިފި އެވެ.

ވީ ކިހިނެއް؟ - ޓްރީޓޮޕުން އައިވީއެފް ހެދި މީހުންގެ ތެރެއިން އެކަކު ވިހާފައި ވަނީ މި މިދިޔަ އާދީއްްތަ ދުވަހު އެވެ. އަދި ދެ ވަނަ މީހާ ވިހާފައި ވަނީ އިއްޔެ އެވެ.

ތަފްސީލް - މިކަމާ ގުޅޭ ގޮތުން 'ދައުރު' އާ ވާހަކަ ދައްކަވަމުން އެ ހޮސްޕިޓަލުގެ ސީއީއޯ އާދިލް މޫސާ ވިދާޅުވީ އެ ދެ ކުދިންނަކީ އެ ހޮސްޕިޓަލުގައި ފުރަތަމަ ބެޗުގައި އައިވީއެފް ހެދި މީހުންގެ ތެރެއިން ލިބުނު ދެ ކުދިން ކަމަށެވެ.

އާދިލް ވިދާޅުވީ އައިވީއެފް ހަދައިގެން ވިހެއި އެ ދެ ކުދިންނާއި މަންމަމެންގެ ހާލު ވެސް ރަނގަޅު ކަމަށެވެ. އަދި އައިވީއެފް ހަދައިގެން ބަލިވެއިން މީހުންގެ ތެރޭގައި ރާއްޖޭން ބޭރުން އެތައް ފަހަރަކު އައިވީއެފް އާއި އައިޔޫއައި ހަދައި ކާމިޔާބުނުވެ ތިބި މީހުން ތިބި ކަމަށް ވެސް އާދިލް ފާހަގަ ކުރެއްވި އެވެ.

ޓްރީޓޮޕުން ފާހަގަކުރި ގޮތުގައި ދަރިމައިވުމުގެ މައްސަލަތަކަށް ރާއްޖެއިން ލިބެން ހުރީ ލިމިޓެޑް ފަރުވާތަކެކެވެ. އެކަމާ ގުޅޭގޮތުން ޓްރީޓޮޕްގެ ފާޓިލިޓީ ސެންޓަރުގެ ހެޑް ޑރ. އަނީތާ ގޯރް ވިދާޅުވީ އެ ހޮސްޕިޓަލުން ކާމިޔާބުކަމާއެކީ އައިވީއެފް ހަދައި ކުއްޖަކު ވިހެއުމަކީ ރާއްޖޭގައި ދަރިމައިވުމާ ގުޅޭ ފަރުވާއަށް ލިބުނު ބޮޑު ކުރިއެރުމެއް ކަމަށެވެ.

"މީގެކުރިން އައިވީއެފް ހަދަން ބޭނުންވާ މީހުން އެހެން ގައުމުތަކަށް ގޮސް ބޮޑު ހަރަދެއްކުރަންޖެހި ވަރަށް ބޮޑު ސްޓްރެސްއަކާ އެބަޖެހޭ ކުރިމަތިލާން، އެކަމަކު މި ހޮސްޕިޓަލުން އައިވީއެފް ކާމިޔާބުކަމާ އެކު ހަދަންފެށުމަކީ ދިވެހިންނަށް ލިބުނު ވަރަށް ބޮޑު ފަށޭހައެއް،" ޑރ. އަނީތާ ވިދާޅުވި އެވެ.