ޓްރީ ޓޮޕްއިން ރާއްޖޭގެ ފުރަތަމަ ލީޑްލެސް ޕޭސްމޭކާ އިމްޕްލާންޓް ޕްރޮސީޖާ ކޮށްފި

ރާއްޖޭގައި ފުރަތަމަ ފަހަރަށް ލީޑްލެސް (ވަޔަލެސް) ޕޭސްމޭކާ ލެއްވުމުގެ ދެ ޕްރޮސީޖާއެއް ޓްރީ ޓޮޕް ހޮސްޕިޓަލުން ކާމިޔާބުކަމާއެކީ ކޮށްފި އެވެ.

ވީ ކިހިނެއް؟ - ޓްރީ ޓޮޕް ހޮސްޕިޓަލުން ބުނީ މިއީ ހިތުގެ ބަލިތަކަށް އެ ހޮސްޕިޓަލުން ފޯރުކޮށްދެމުން އަންނަ ފަރުވާއަށް ލިބުނު ވަރަށް ބޮޑު ކުރިއެރުމެއް ކަމަށެވެ.

ތަފްސީލު - ޓްރީ ޓޮޕް ހޮސްޕިޓަލުގެ ހިތުގެ ފަރުވާއަށް ހާއްސަ ކެތު ލެބުގައި ކާޑިއޮލޮޖީ ޓީމުން ކުރިއަށްގެންދިޔަ އެ ޕްރޮސީޖާތަކުގައި، ހިތުގެ ހިނގުން ރެގިއުލޭޓް ކުރުމަށް ލީޑްލެސް ޕޭސްމޭކާ ލެއްވީ 79 އަހަރާއި 90 އަހަރުގެ ދެ މީހެއްގެ ހަށިގަނޑަށެވެ.

ޓްރީ ޓޮޕް ހޮސްޕިޓަލްގެ ސީއީއޯ ޑރ. ސްރީވަތުސަން ސްރީދަރު ޖީ. ވިދާޅުވި ގޮތުގައި މިއީ ޓްރީ ޓޮޕް ހޮސްޕިޓަލަށް އަދި މުޅި ރާއްޖެއަށް ވެސް ފާހަގަކޮށްލެވޭ ވަރުގެ މުހިއްމު މުނާސަބަތެއް ކަމަށެވެ.

ލީޑްލެސް ޕޭސްމޭކާ ޕްރޮސީޖާ ތައާރަފް ކުރުމާ އެކު، އިތުރު ސިއްހީ ފަރުވާ ހޯދުމަށް ރާއްޖެއިން ބޭރަށް ކުރިން ދާން ޖެހުނު ޕޭޝަންޓުންނަށް ވެސް ކާޑިއެކް ކެއާގެ ހިދުމަތް ރާއްޖޭގައި ލިބޭނެ ގޮތް މަގުފަހިވާނެ ކަމަށް އޭނާ ވިދާޅުވި އެވެ.

އޭގެ ސަބަބުން 'ޕޭޝަންޓް އައުޓްކަމްސް' ރަނގަޅުވެ، ރާއްޖޭގައި ހިތުގެ ހިނގުމުގެ މައްސަލަ ހުންނަ ފަރާތްތަކަށް، ފަރުވާ ހޯދުމަށް ހިނގާ ހަރަދުތައް ކުޑަވާނެ އެވެ.

ލީޑްލެސް ޕޭސްމޭކާއަކީ ހިތުގެ ހިނގުން މަޑުކޮށްދިނުމަށް، ސީދާ ހިތުގެ ތެރެއަށް ލައްވާ 'ސެލްފް ކޮންޓެއިންޑް' ކުޑަ ޑިވައިސްއެކެވެ. އާދައިގެ ޕޭސްމޭކާތަކާ ހިލާފަށް، މިފަދަ ސެލްފް ކޮންޓެއިންޑް ޑިވައިސްތަކުން ކަރަންޓު ޖެނެރޭޓް ކުރުމަށް އިތުރު ބެޓެރި އަދި ނަރުތަކެއް ގުޅާފައި ނުހުންނާނެ އެވެ. މިއީ ޕޭސްމޭކާ ލައްވާފައިވާ މީހުންނަށް ލިބޭ ވަރަށް ބޮޑު ލުޔެކެވެ.

"މި ޓެކްނޮލޮޖީއިން ބަލިމީހާއަށް ގިނަ ގުނަ ފައިދާތަކެއް ކުރޭ. މިފަދަ ޕްރޮސީޖާތަކަކީ؛މިނިމަލީ އިންވޭސިވް' (ކުޑަ އިންސިޝަންއަކުން) ނިންމާލެވޭ ޕްރޮސީޖާއެއް،" ޓްރީ ޓޮޕް ހޮސްޕިޓަލުގެ ކޮންސަލްޓެންޓް ކާޑިއޮލޮޖިސް ޑރ. މިގުދާދު ޝަރީފް ވިދާޅުވި އެވެ.

"އެހެން ކަމުން ރިކަވަރީ ވަގުތު ކުރުވެ، ހޮސްޕިޓަލުގައި ހޭދަކުރަންޖެހޭ ވަގުތު ކުޑަވޭ. އަދި މާބޮޑު ލަކުނެއް ވެސް ނުހުންނާނެ."

ޑރ. މިގްދާދު އާއި އެކު އެ ޕްރޮސީޖާ ހެދުމުގައި ޓްރީ ޓޮޕް ހޮސްޕިޓަލުގެ ކޮންސަލްޓަންޓް ޑރ. އަމިތު އަގަރްވާލް، ވިޒިޓިންގް ކާޑިއޮލޮޖިސްޓް ޑރ. އަރުން ގޯޕީ އަދި ޓްރީ ޓޮޕް ހޮސްޕިޓަލުގެ ހީވާގި ކެތު ލެބްގެ ޓީމުން ވަނީ ހަރަކާތްތެރިވެފަ އެވެ.

މިނިމަލީ އިންވޭސިވް ޕްރޮސީޖާތަކަކީ އުމުރުން ދުވަސްވީ މީހުންނަށް، ބޮޑު ސާޖަރީއަކަށް ދިއުމުގެ ބަދަލުގައި ފަސޭހައިން ކޮށްލެވޭ ޕްރޮސީޖާތަކެކެވެ.

މި ޕްރޮސީޖާތަކުގެ ކޮސްމެޓިކް އިމްޕެކްޓް ކުޑަވުމާއި ދެ ތިން ދުވަހެއްގެ ތެރޭގައި އާންމު ދިރިއުޅުމަށް ރުޖޫއަ ވެވޭތީ، މިފަދަ ޕްރޮސީޖާ ކުރާ މިންވަރު ދުނިޔޭގެ ނިސްބަތުން ވެސް ވަނީ އިތުރުވެފަ އެވެ.