ފޭދުއަށް ހުއްޓާނުލައި އަށް ގަޑިިއިރު ވާރޭ ވެހުނު، ފެން ބޮޑުވެ ދެ ގެއަކުން މީހުން ނެރެފި

އިއްޔެ ހަވީރުން ފެށިގެން ރޭ މެންދަމާ ހަމައަށް އައްޑޫގެ ފޭދުއަށް ހުއްޓުމެއް ނެތި އަށް ގަޑިިއިރަށް ވުރެ ގިނަ އިރު ވަންދެން ބޯކޮށް ވާރޭ ވެހުނު ކަމަށް، އައްޑޫ ކައުންސިލް މެމްބަރަކު މިއަދު ވިދާޅުވެއްޖެ އެވެ.

ވީ ކިހިނެއް؟ - މޫސުމާ ބެހޭ ގައުމީ އިދާރާ (މެޓް)އިން އިއްޔެ ވަނީ ގުގުރުމާ އެކު ބޯކޮށް ވިއްސާރަކުރާނެ ކަމަށް ލަފާކޮށް އައްޑުއަށް ޔެލޯ އެލާޓު ނެރެފަ އެވެ. މިއަދު ވެސް އެ ސަރަހައްދަށް ވަނީ ވައިޓް އެލާޓު ނެރެފަ އެވެ.

މެޓުގެ ތަފާސްހިސާބުތަކުން ދައްކާ ގޮތުގައި އިއްޔެ ރާއްޖޭގެ އެކި ހިސާބުތަކަށް ކުރި ވިއްސާރާގައި އެންމެ ގިނައިން ވާރޭ ވެހިފައިވަނީ އައްޑޫގެ ގަން އަށެވެ. ނަމަވެސް މި ވިއްސާރާގައި ފެން ބޮޑުވެގެން އެންމެ ގިނަ ގެއްލުންތަކެއް ލިބުނީ، ގަމާ ޖެހިގެން އޮންނަ ފޭދުއަށެވެ.

ތަފްސީލް - ވިއްސާރާގައި ގެއްލުންވި ގެތަކުގެ އާއިލާތަކަށް އެހީތެރިކަން ފޯރުކޮށްދިނުމުގައި އިސްކޮށް ހަރަކާތްތެރިވި ކައުންސިލް މެމްބަރު މުހައްމަދު ފައިސަލް 'ދައުރު' އަށް ވިދާޅުވީ، އެރަށަށް އިއްޔެ ހަވީރު 5:30 ފެށިގެން މެންދަމު 2 ޖެހުމާ ހަމަޔަށް ހުއްޓާނުލާ ވާރޭވެހުނު ކަމަށެވެ. އެއީ ޖުމްލަ އަށް ގަޑިއިރާއި ބައެވެ.

މިހާރު ވަނީ ވާރޭ ހުއްޓާލައިފަ އެވެ. ފެންބޮޑުވެފައިވާ ސަރަހައްދުތަކުން ފެން ހިންދުމުގެ މަސައްކަތް އެމްއެންޑީއެފްގެ އެހީތެރިކަމާ އެކު، ކޮށް ފެންގަނޑު ވެސް ހިނދިފައިވާ ކަމަށް އޭނާ ވިދާޅުވި އެވެ.

ފައިސަލް ވިދާޅުވި ގޮތުގައި ރޭގެ ވިއްސާރާގައި ފޭދޫގެ ގިނަ ގެތަކަށް ފެން ވަދެ، އެކިވަރުގެ ގެންލުން ލިބުނެވެ. އެގޮތުން އޭނާ ވިދާޅުވީ: 

"އިތުރަށް މިއަދު ވާރޭ ނުވެހޭ ނަމަ މިހާރުގެ ހާލަތު ރަނގަޅު. ފެންބޮޑުވެފައިވާ ސަރަހައްދުތަކުގެ ފެން ވެސް އެމްއެންޑީއެފްގެ އެހީތެރިކަމާ އެކު މިހާރު ވަނީ ހިއްކިފައި،" ފައިސަލް ވިދާޅުވި އެެވެ.