ރައީސްގެ ދެކަނބަލުން އީދު ސަލާން ކުރެއްވުން މުލިއާ ގޭގައި

މި އަހަރުގެ ފިތުރުއީދު ދުވަހު، ރައީސް މުހައްމަދު މުއިއްޒުގެ ދެކަނބަލުން އީދު ސަލާން ކުރެއްވުން މުލިއާގޭގައި ބާއްވާ ގޮތަށް ހަމަޖައްސައިފި އެވެ.

ވީ ކިހިނެއް؟ - ކަލަންޑަރުން ދައްކާ ގޮތުގައި މި އަހަރުގެ ފިތުރު އީދު ވާނީ އަންނަ ބުދަ ދުވަހެވެ. ކޮންމެ އަހަރަކު ރައީސްގެ ދެކަނބަލުން ބާއްވާ އީދު ސަލާން ކުރުމުގެ ހަރަކާތުގެ ތަފްސީލް މިއަދު ރައީސް އޮފީހުން ވަނީ ހާމަކޮށްފަ އެވެ.

ތަފްސީލް - ރައީސް އޮފީހުން ބުނީ ރައީސް މުއިއްޒާއި، އެމަނިކުފާނުގެ އަނބިކަނބަލުން ސާޖިދާ މުހައްމަދު، އީދު ސަލާން ކުރެއްވުން ހަމަޖެހިފައިވަނީ، ފިތުރުއީދު ދުވަހުގެ ހެނދުނު 9:30 އިން 10:30އަށް ކަމަށެވެ.

ރައީސް އޮފީހުން ބުނިގޮތުގައި:

"އާއިލާތަކާ އެކު ވީހާވެސް ގިނަ އަދަދެއްގެ ކުޑަކުދިންނާއި، ވީހާވެސް ގިނަ އަދަދެއްގެ ޒުވާނުން، އީދު ސަލާމުގައި ބައިވެރިވެވަޑައިގެން ދެއްވުމަށް ވެސް ރައީސްގެ ދެކަނބަލުން ދައުވަތު އަރުވަ އެވެ،" ރައީސް އޮފީހުން ބުންޏެވެ.

ފާހަގަކޮށްލެވޭ ކަމެއް - އީދު ސަލާން ކުރެއްވުމުގައި ބައިވެރިވުމަށް އާންމުންގެ އިތުރުން، ދައުލަތުގެ އެކި މަގާމުތަކުގައި ތިއްބެވި ބޭފުޅުންނަށާއި، ބޭރުގެ އިއްޒަތްތެރިންނަށާއި، ކުންފުނިތަކާއި، އަމިއްލަ އެކި ޖަމިއްޔާ ޖަމާއަތްތަކުގެ މަންދޫބުންނަށް ވެސް ރައީސްގެ ދެކަނބަލުން ވަނީ ދައުވަަތު އަރުވާފަ އެވެ.