ނުދެއްކި ގިނަ ދުވަސްވެފައިވާ ފެނާއި ކަރަންޓު ބިލުގެ ޖޫރިމަނާ މާފު ކޮށްދޭން ރައީސް ނިންމަވައިފި

އާންމުން މީސްމީހުން ދިރިއުޅޭ ގޭ ބިސީތަކުގެ ކަރަންޓާއި ފެން ބިލް ނުދެއްކި ގިނަ ދުވަސްވެގެން އަރާފައިވާ ޖޫރިމަނާތައް މާފުކޮށްދިނުމަށް ރައީސް މުހައްމަދު މުއިއްޒު މިއަދު ނިންމަވައިފި އެވެ.

ވީ ކިހިނެއް؟- އާންމުން ދިރިއުޅޭ ގެދޮރުގެ ތެރެއިން ކަރަންޓާއި ފެނު ބިލް ނުދެއްކި ގިނަ ދުވަސްވެފައިވާ ގޭބިސީތަކުގެ ބިލްތަކަށް އަރާފައިވާ ޖޫރިމަނާ މައާފުކޮށްދެއްވިކަން އިއުލާން ކުރެއްވީ ރައީސް މުއިއްޒު މިއަދު އެކްސްގައި ކުރެއްވި ޕޯސްޓެއްގަ އެވެ. 

ތަފުސީލު- އެމަނިކުފާނު ވިދާޅުވީ އެ ފިޔަވަޅަކީ އާންމު ރައްޔިތުންގެ މާލީ ހާލަތު ރަނގަޅު ކުރުމަށްޓަކައި ސަރުކާރުން އަޅަމުން އަންނަ ފިޔަވަޅުތަކުގެ ތެރެއިން އިތުރު ލުޔެއް ދެއްވުމުގެ ގޮތުން އެޅުއްވި ފިޔަވަޅެއް ކަމަށެވެ. އަދި ރައީސް ވިދާޅުވީ އެކަން ތަންފީޒު ކުރެެއްވުމަށް އެަކަމާ ގުޅޭ ކުންފުނިތަކަށް މިހާރު އަންގަވާފައިވާނެ ކަމަށެވެ.

އޭގެ އިތުރުން ކަރަންޓާއި ފެނުގެ ބިލްގެ ތެރެއިން ނުދެއްކި ހުރި ފައިސާ ދެއްކުމަށް ލުއިގޮތެއް ހޯއްދަވައިދެއްވުމަށް ވެސް އެ ކުންފުނިތަކަށް އަންގަވާފައިވާނެ ކަމަށް ރައީސް ވިދާޅުވި އެވެ.

ރޯދަމަހުގައި ކަރަންޓާ ފެން ބިލު އެހެން މަސްތަކަށް ވުރެ ބޮޑު ނުވާގޮތަށް އެއްވަރެއްގައި ހިފަހައްޓަން ވެސް ރައީސް ވަނީ ނިންމަވައިފަ އެވެ.

މި މަހުގެ ކުރީކޮޅު ބ. އޭދަފުށީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި  ރައީސް ވިދާޅުވީ ކޮންމެ ރޯދަ މަހަކު ކަރަންޓާއި ފެން ބިލު އެހެން މަސްތަަކަށްވުރެ ބޮޑުވާތީ އެކަމުގެ ސަބަބުން ކުރިމަތިވާ ތަކުލީފުތަކުގެ ޝަކުވާ ލިބޭ ކަމަށާއި "މިފަހަރު އެހެނެއް ނުވާނެ" ކަމަށާއި "އާންމު މަހެއްގައި އެ ހުންނަ ރޭޓުގައި ކެޕްކޮށްފައި އާންމު މަހެއްގައި ހުންނަ ވަރަށް ފެން ބިލާއި ކަރަންޓު ބިލު" ފޯރުކޮށްދޭނެ ކަމަށެވެ.