އެސްކްރޯ އެކައުންޓްގައި ހުރި 1 މިލިއަން ޑޮލަރު ޔާމީނަށް ދޫނުކުރަން ބީއެމްއެލް ހައި ކޯޓަށް

ކުރީގެ ރައީސް އަބްދުﷲ ޔާމީންގެ އެކައުންޓަށް ޖަމާކުރި އެއް މިލިއަން ޑޮލަރު ހޯދަން އެމަނިކުފާނުގެ ފަރާތްޕުޅުން ބޭންކް އޮފް މޯލްޑިވްސް (ބީއެމްއެލް)އާ ދެކޮޅަށް ހުށަހެޅި މައްސަލަ ކުރިއަށް ގެންދެވޭނެ ކަމަށް ސިވިލް ކޯޓުން ނިންމި ނިންމުން ބީއެމްއެލްއިން ހައި ކޯޓުގައި އިސްތިއުނާފް ކޮށްފި އެވެ.

އެނގުން މުހިންމު - މި އެއް މިލިއަން ޑޮލަރަކީ ޔާމީންގެ އެކައުންޓެއްގައި ހުއްޓާ، ގއ. ވޮޑަމުއްލާގެ ތަހުގީގަށް އޭސީސީ މެދުވެރިވެގެން ބީއެމްއެލްގައި ހުޅުވި އެސްކްރޯ އެކައުންޓަށް 10 ޖޫން 2018ގައި ޔާމީން ޖަމާކުރެއްވި ފައިސާއެކެވެ.

އެ އެސްކްރޯ އެއްބަސްވުމުގައި ވާ ގޮތުން އެ ކައުންޓް ހުޅުވާތާ އެއް އަހަރުގެ ތެރޭގައި އެއީ ދައުލަތުގެ ފައިސާކަން ސާބިތުކޮށް ނުދެވިއްޖެ ނަމަ ޔާމީންގެ އެކައުންޓަށް އަނބުރާ އެ ފައިސާ ޖަމާކޮށްދޭން ޖެހެ އެވެ. އެ މުއްދަތު ހަމަވީ 10 ޖޫން 2019އަށެވެ.

ރިސޯޓެއް ހަދަން އެމްއެމްޕީއާރުސީން ކުއްޔަށް ދޫކުރި ވޮޑަމުއްލާގެ މުއާމަލާތުން ޔާމީނަށް ރިޝްވަތުގެ ގޮތުގައި އެއް މިލިއަން ޑޮލަރު ލިބިވަޑައިގެންނެވިކަމާއި އެ ފައިސާ ލޯންޑަކުރެއްވިކަމުގެ ކުށް ދަށު ކޯޓާއި ހައި ކޯޓުން ސާބިތުވިޔަސް ސުޕްރީމް ކޯޓުން 30 ނޮވެމްބަރު 2021ގައި ނިންމީ، އެ އެއް މިލިއަން ޑޮލަރަކީ ވޮޑަމުއްލާ ކުއްޔަށް ދީގެން ހޯއްދެވި ފައިސާކަން ދައުލަތަށް ސާބިތުކޮށްނުދެވޭ ކަމަށެވެ. އެހެންކަމުން ޔާމީންގެ މައްޗަށް އެ ކުށް، އެންމެ މަތީ ކޯޓުގައި ސާބިތެއްނުވި އެވެ.

ވީ ކިހިނެއް؟ - ސުޕްރީމް ކޯޓުގެ ހުކުމުގައި ވަނީ ޔާމީންގެ އެކައުންޓަށް ޖަމާވި އެއް މިލިއަން ޑޮލަރުގެ ހަގީގަތާ މެދު ސުވާލު އުފައްދައިފަ އެވެ. އަދި އެއީ ދައުލަތަށް ލިބެން ޖެހޭ ފައިސާއެއް ނަމަ އެ ފައިސާ އާއި އެ ފައިސާ އިންްވެސްޓް ކުރުމުގެ ސަބަބުން ފައިދާއެއް ލިބިފައިވާ ނަމަ އެ ފައިދާއެއް ހިމެނޭހެން ހޯދުމުގެ ހައްގު ދައުލަތަށް ލިބިފައިވާ ކަމަށް ވެސް ހުކުމުގައި ކަނޑައެޅި އެވެ.

އެކަމަކު އެ ފައިސާ ހޯދަން އެމްއެމްޕީއާރްސީން މިހާތަނަށް ކޯޓަށް ހުށަހަޅާފައެއް ނުވެ އެވެ. 

ބީއެމްއެލްއާ ދެކޮޅަށް ސިވިލް ކޯޓަށް ޔާމީން މައްސަލަ ހުށައެޅުއްވީ އެ ފައިސާ ހޯއްދަވާށެވެ. 

ތަފްސީލް - ޔާމީން ހުށަހެޅުއްވި މައްސަލާގައި އެދިފައިވަނީ:

އެ ދައުވާއަށް ޖަވާބުދާރީވާން ބީއެމްއެލްއަށް އެންގުމުން އެއީ އެ ބޭންކާ ދެކޮޅަށް ކުރެވޭނެ ދައުވާއެއް ނޫން ކަމަށް ބުނެ، ކޯޓުގެ އިހްތިސޯސްއާ މެދު ސުވާލު އުފައްދައި، އިއުތިރާޒެއް ހުށަހެޅި އެވެ. އެ އިއުތިރާޒްއާ ގުޅިގެން މިދިޔަ މަހުގެ 20ވަނަ ދުވަހު ސިވިލް ކޯޓުން ނިންމީ އެއީ ބޭންކާ ދެކޮޅަށް ކުރެވިދާނެ ދައުވާއެއް ކަމަށެވެ. އެހެންކަމުން އެ ދައުވާއަށް ޖަވާބުދާރީވާން އަލުން އެންގި އެވެ.

ނަމަވެސް ސިވިލް ކޯޓުގެ އެ ނިންމުން މިދިޔަ ބުދަދުވަހު ބީއެމްއެލްއިން ހައި ކޯޓުގައި އިސްތިއުނާފްކުރީ އެންޓި ކޮރަޕްޝަން ކޮމިޝަން (އޭސީސީ)ގެ އެކައުންޓެއްގައި ހުރި ފައިސާއެއް ކަމުން، އެ ފައިސާ ބޭންކަށް ދޫނުކުރެވޭނެ ކަމަށް ބުނެ އެވެ. ބީއެމްއެލް އިން ބުނަނީ އެއީ އެ ބޭންކާ ދެކޮޅަށް ކުރިއަށް ގެންދެވިދާނެ މައްސަލައެއް ނޫން ކަމަށާއި، އެ މައްސަލަ ކުރިއަށް ގެންދަން ޖެހޭނީ އޭސީސީއާ ދެކޮޅަށް ކަމަށެވެ.

މި އިސްތިއުނާފް ބަލައިގަތުމާ މެދު ހައި ކޯޓުން އަދި ގޮތެއް ނުނިންމަ އެވެ. 

ބުނީ ކީކޭ؟ - އެއް މިލިއަން ޑޮލަރު ހޯދަން ބީއެމްއެލްގެ މައްޗަށް ދައުވާ ނުކުރެވޭނެ ސަބަބަކަށް ބީއެމްއެލްއިން ބުނަނީ:

މި އިއުތިރާޒާ މެދު ސިވިލް ކޯޓުން ނިންމި ނިންމުމުގައި ބުނެފައިވަނީ، ޔާމީން ފައިސާ ޖަމާކުރީ އޭސީސީގެ ކަރަންޓް އެކައުންޓަކަށް ކަމަށް ބޭންކުން ބުނި ނަމަވެސް އެއީ އެސްކްރޯ އެކައުންޓެއް ކަން ލިޔެކިއުންތަކާއި އެ ފައިސާ ޖަމާކުރަން ހެދި އެއްބަސްވުމުން އެނގޭ ކަމަށެވެ.

އެގޮތުން ސިވިލް ކޯޓުގެ ނިންމުމުގައި ވަނީ:

އެހެންކަމުން އެއީ ބޭންކާ ދެކޮޅަށް ހުށަހެޅިދާނެ މައްސަލައެއްކަމަށް ނިންމާ އެ މައްސަލައިގެ ދައުވާތަކަށް ޖަވާބުދާރީވާން ބީއެމްއެލްއަށް ސިވިލް ކޯޓުން ވަނީ އަންގައިފަ އެވެ.