ވަޒީރުންނާ ސުވާލުކުރުމުގެ ގާނޫނު އުވާލައި ރައީސާއި ނައިބު ރައީސާ ވެސް ސުވާލު ކުރެވެން ޖެހޭ: ސަލީމް

ވަޒީރުންނާ ސުވާލުކުރުމުގެ ގާނޫނު އުވާލައި ރައީސް އާއި ނައިބު ރައީސް ވެސް މަޖިލީހަށް ހާޒިރުކޮށް ސުވާލުކުރެވޭނެ ގޮތަށް، ރައްޔިތުންގެ މަޖިލީހުގެ ގަވާއިދަށް އިސްލާހު ގެންނަން ޖެހޭ ކަމަށް މަޖިލީހުގެ ނައިބު ރައީސް، ހޯރަފުށީ ދާއިރާގެ މެމްބަރު އަހްމަދު ސަލީމް މިއަދު ވިދާޅުވެއްޖެ އެެވެ.

ވީ ކިހިނެއް؟ - އެ ގާނޫނަކީ 2005 ވަނަ އަހަރުން ފެށިގެން އަމަލު ކުރަމުން އަންނަ، ވަޒީރުންނާ ސުވާލު ކުރުމުގެ ގާނޫނެވެ. ނަމަވެސް އެ ގާނޫނަކީ މިހާރު ބޭނުން ނުހިފޭ އަދި މަޖިލީހަށް ލިބިގެންވާ ބާރުތައް ހަނިވާ ގޮތަށް އޮތް ގާނޫނެއް ކަމަށް ބުނެ، އެ ގާނޫނު އުވާލަން މިދިޔަ 19 ޑިސެމްބަރުގައި ސަލީމް ވަނީ މަޖިލީހަށް ބިލެއް ހުށަހަޅުއްވައިފަ އެވެ. މިދިޔަ 28 ޑިސެމްބަރުގައި ވަނީ އެ ބިލުގެ ފުރަތަމަ ކިއުން އިއްވައިފަ އެވެ. އަދި އެ ބިލުގެ އިބްތިދާއީ ބަހުސް މިއަދު ވަނީ ފަށައިފަ އެވެ.

ވަަޒީރުނާ ސުވާލުކުރުމުގެ ގާނޫނު އުވާލަން ހުށަހެޅި ސަބަބެއް ކަމަށް ބިލުގައި ބުނަނީ:

ބުނީ ކީކޭ؟ - މިއަދުގެ ޖަލްސާގައި ބިލު ހުށަހެޅުއްވުމަށާއި ފަހު ބަސް ވިދާޅުވުމަށް ދިން ފުރުސަތުގައި ސަލީމް ވިދާޅުވީ، ސުވާލުކުރާނީ މަޖިލީހުން ކަނޑައަޅާ ގޮތެއްގެ މަތިން ކަމަށް ގާނޫނު އަސާސީގައި ބަޔާންވެފައި އޮންނަ ކަމަށާއި އެ މަޖިލީހުން ކަންކަން ކުރަންވީ ގޮތް ކަނޑައަޅާފައި އޮންނަނީ ހަމައެކަނި މަޖިލީހުގެ ގަވާއިދުގައި ކަމަށެވެ. އެކަން މަޖިލީހުގެ ގަވާއިދު އޮތްއިރު އެހެން ގާނޫނެެއް އެކަމަށް އޮންނަން ޖެހޭނެ ކަމަށް ގަބޫލުނުކުރާ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވީ މިހާރު އަމަލުކުރަމުން އަންނަ ގާނޫނު އަސާސީގެ ރޫހަކީ، ވަޒީރުންނާ ސުވާލު ކުރުމުގެ ކަންކަން އިތުރަށް ތަފްސީލު ކުރާ ނަމަ، މަޖިލީހުގެ ގަވާއިދުގައި ހިމަނާގެން ކުރިއަށް ގެންދިއުން ކަމަށެވެ.

"މިކަންކަން މިހެން ހުރުމާ އެކު ވެރިކަން ހިންގުމުގެ ބާރު ޖަވާބުދާރީ ކުރުވުމަށް ރައީސުލްޖުމްހޫރިއްޔާ، އަދި ރައީސުލްޖުމްހޫރިއްޔާގެ ނައިބު އަދި ސަރުކާރުގެ މުވައްސަސާތަކުގެ ވެރިން ރައްޔިތުންގެ މަޖިލީހަށް ޖަވާބުދާރީ ކުރުވާނެ ގޮތުގެ އިޖުރާއަތުތައް ރައްޔިތުންގެ މަޖިލީހުގެ ގަވާއިދުގައި އަޅުގަނޑުމެން ހިމަނަން އެބަޖެހޭ. އެކަން އެމަގުން ހިންގަން އަޅުގަނޑު ދެކޭގޮތުގައި ލާޒިމް އެއީ މަޖުބޫރު ކަމެއް،"

ސަލީމް އިތުރަށް ވިދާޅުވީ:

"އިއްޒަތްތެރި ރައީސް އަޅުގަނޑުގެ ހުށަހެޅުމަކީ ވަޒީރުންނާ ސުވާލުކުރުމުގެ ގާނޫނު އުވާލުމަށް ފަހު، ވަޒީރުންގެ މަޖިލީހާ އަދި ސަރުކާރު ހިންގުމުގެ ބާރު ޖަވާބުދާރީ ކުރުވުމަށް އަޅުގަނޑުމެންގެ ގާނޫނު އަސާސީން އަޅުގަނޑުމެންނަށް މަތިކޮށްފައިވާ ޒިންމާތަކާ ވާޖިބު ފުރިހަމައަށް އަދާކުރުމަށްޓަކައި ގެންނަން ޖެހޭ އިސްލާހުތައް ރައްޔިތުންގެ މަޖިލީހުގެ ކަމާބެހޭ ބާބުގެ ކަމާބެހޭ މާއްދާތަކަށް ގެނައުން. އެއީ އަޅުގަނޑުގެ ހުށަހެޅުއްވުމަކީ." ބިލާ ގުޅޭގޮތުން ފަހު ބަސް އިއްވަމުން ސަލީމް ވިދާޅުވި އެވެ.