ޕްރޮސެކިއުޓާ ޖެނެރަލް (ޕީޖީ) ހުސެން ޝަމީމް ނޫސްވެރިންގެ ބައްދަލުވުމެއްގެ ތެރެއިން. (ދައުރު ފޮޓޯ/އަބްދުﷲ އަނޫފް ޖުނައިދު)
ގެވެށި އަނިޔާގެ މައްސަލަތައް އަވަސްކުރަން ޕީޖީން ކޯޓުތަކަށް ސިޓީ ފޮނުވަން ފަށައިފި
ގެވެށި އަނިޔާގެ މައްސަލަތައް ނިންމުން އަވަސް ކުރުމަށްޓަކައި، މައްސަލަ ބަލަމުންދާ ކޯޓުތަކަށް އޮޓަމެޓިކުން ސިޓީ ފޮނުވާ ނިޒާމެއް ޕްރޮސެކިޔުޓާ ޖެނެރަލްގެ (ޕީޖީ) އޮފީހުން ތައާރަފު ކޮށްފި އެވެ.
ވީ ކިހިނެއް؟ - އެކަމާ ގުޅިގެން ޕީޖީ އޮފީހުން މިއަދު ނެރުނު ބަޔާނުގައިވާ ގޮތުން:
-
ގެވެށި އަނިޔާގެ މައްސަލައެއް ކަމަށް ބެލެވޭ ކޮންމެ މައްސަލައެއްގައި، މައްސަލައިގެ ޝަރީއަތް ހިންގަވައިދެއްވާ، މައްސަލަ ނިންމަވައިދެއްވުން އެދި ސިޓީ ތައްޔާރު ކުރެވި ފޮނުވެމުން ދާނެ
-
މައްސަލަ ލަސްވެގެން، ނުވަތަ ނުވަތަ އެނޫން ވެސް ސަބަބަކާ ކުރެ ފަހުން ބެލިޔަސް އެ މުއާމަލާތުތައް ފެންނަން ހުންނާނެ
ބުނީ ކީކޭ؟ - އެ އޮފީހުން ބުނި ގޮތުގައި، މި ފިޔަވަޅު އެޅިގެން ދިޔައީ، ޖިނާއީ އިޖުރާއަތުގެ ގާނޫނުގެ 142 މާއްދާގައި ބަޔާންކުރާ ގޮތުގެ މަތިން، މެދުކެނޑުމެއް ނެތި ޝަރީއަތް ހިންގައި، ގެވެށި އަނިޔާގެ މައްސަލަތައް އަވަހަށް ނިންމަވައިދެއްވުމަށް ކޯޓުތަކަށް ބާރު އެޅުމުގެ ގޮތުންނެވެ.
ފާހަގަކޮށްލެވޭ - ޓެކްނޮލޮޖީގެ ރޮނގުން ލިބެމުންދާ ކުރިއެރުންތައް ބޭނުންކޮށްގެން، އަނިޔާގެ ޝިކާރައަކަށް ވާ މީހުންނަށް އިންސާފު ހޯދައިދިނުމުގެ ގޮތުން ޕީޖީ އޮފީހުން ވަނީ ފަހަކަށް އައިސް ބައެއް އާ ކަންކަން ތައާރަފުކޮށްފަ އެވެ. އެގޮތުން:
-
މައްސަލައިގައި އަނިޔާ ލިބުން މީހާއަށް މައްސަލަ ހިނގަމުންދާ ގޮތާއި، އަޑުއެހުން ތާވަލް ކުރާ ދުވަސްތަކާއި އެ ދުވަސްތަކުގައު މައްސަލައަށްވީ ގޮތް ޕީޖީ އޮފީހުގެ ވެބްސައިޓުން ބެލޭނެ އިންތިޒާމު ވަނީ ހަމަޖައްސާފައި
-
އެ އޮފީހުން ބުނި ގޮތުގައި އޭގެ ބޭނުމަކީ ކުށުގެ ޝިކާރައަކަށްވީ މީހާއަށް ޖިނާއީ އަދުލުގެ ނިޒާމު ހިނގާގޮތާބެހޭ މައުލޫމާތު ދިނުމާއި، އޭނާއަށް އިންސާފު ހޯދައިދިނުމުގައި ދައުލަތުންކުރާ މަސައްކަތްތައް އޭނާއަށް އަންގައިދީ، މިކަމުގައި އޭނާގެ ބައިވެރިވުން އިތުރުކުރުން