އިސްލާމިކް މިނިސްޓަރު ކަމަށް ޝަހީމް އައްޔަން ކުރެއްވުމުން އޯއައިސީގެ ސެކެޓްރީ ޖެނަރަލް ޔޫސުފް އައްސުބައިގީ އެ މިނިސްޓްރީއަށް ކުރެއްވި ޒިޔާރަތުގެ ތެރެއިން: މި ތަންތަނުގެ އެހީތެރިކަން ހޯދުމަށް ދެ ފަރާތުގެ ދެމެދުގައި މަޝްވަރާކޮށްފައިވޭ. (ފޮޓޯ/ޝަހީމް)
ފަތުވާ ކައުންސިލް އަލުން ފަށަން އޯއައިސީގެ އެހީތެރިކަމަށް އެދިއްޖެ
މެމްބަރުން ހަމަނުވެ، މަސައްކަތްތައް ހުއްޓިފައި އޮތް ފަތުވާ ކައުންސިލު އަލުން ފެށުމަށް، އިސްލާމީ ގައުމުތައް ތަމްސީލުކުރާ ބައިނަލްއަގުވާމީ ޖަމިއްޔާ ކަމަށްވާ އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ)ގެ އެހީތެރިކަމަށް އެދިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިއްޔެ ވިދާޅުވެއްޖެ އެވެ.
ވީ ކިހިނެއް؟ - ޝަހީމް ވަނީ އޯއައިސީގެ ސެކްރެޓަރީ ޖެނެރަލްގެ އެޑްވައިޒަރުގެ މަގާމު ދެ އަހަރު ވަންދެން ފުރުއްވާފަ އެވެ.
އާ ސަރުކާރުގެ އިސްލާމިކް މިނިސްޓަރު ކަމަށް ޝަހީމް އައްޔަންކުރެއްވުމާ އެކު، އޯއައިސީގެ ސެކެޓްރީ ޖެނަރަލް ޔޫސުފް އައްސުބައިގީ ވަނީ ޝަހީމްގެ އަރިހަށް އިހުތިރާމުގެ ޒިޔާރަތެއް ވެސް ކުރައްވާފަ އެވެ. އެ ޒިޔާރާތުގައި އޯއައިސީގެ އެހީތެރިކަން ހޯދަން މަޝްވަރާ ކުރެއްވި ކަމަށް މިނިސްޓްރީން މީގެ ކުރިން ބުނެފައިވީ ނަމަވެސް، އޭރު އެއީ ކޮންކަމާ ގުޅިގެން ކަމެއް ހާމައެއް ނުކުރެ އެވެ.
ބުނީ ކީކޭ؟ - ޝަހީމް އިއްޔެ 'ދައުރު'އަށް ދެއްވި ހާއްސަ އިންޓަވިއުއެއްގައި، ފަތުވާ ކައުންސިލް ނުހިނގާ އޮންނަ އޮތުމާ ގުޅޭ ގޮތުން ސުވާލު ކުރުމުން އޭނާ ވިދާޅުވީ، އެ ތަނަކީ ވަރަށް މުހިންމު ދައުރެއް އަދާ ކުރާ ތަނެއްގެ ގޮތުގައި ހަދާނެ ކަމަށެވެ. އެކަމަށްޓަކައި އޯއައިސީގެ ދަށުން ހިންގަމުން އަންނަ އިސްލާމިކް ފިގުހު އެކަޑަމީގެ ފަންނީ އެހީތެރިކަމަށް އެދި މިހާރު ސިޓީއެއް ފޮނުއްވާފައިވާނެ ކަމަށް އޭނާ ވިދާޅުވި އެވެ.
"ފަތުވާ ކައުންސިލް ފަންނީ ގޮތުން ތަރަައްގީ ކުރުމަށްޓަކައި އަޅުގަނޑުމެން ދުނިޔޭގެ އިސްލާމީ އެކި ގައުމުތަކުގެ ފަތުވާ ކައުންސިލުތަކުގެ އެހީތެރިކަން އަޅުގަނޑުމެން ހޯދަނަން އިރާދަކުރެއްވިއްޔާ،" ޝަހީމް ވިދާޅުވި އެވެ.
ޝަހީމް ވިދާޅުވީ:
-
ފަތުވާ ކައުންސިލަކީ ހަރުދަނާ ތަނަކަށް ހަދަން ޖެހޭ
-
އެއީ ރާއްޖޭގެ ދީނީ އެއްބައިވަންތަކަން ދެމެހެއްޓުމަށް ވަރަށް މުހިންމު ދައުރެއް އަދާކުރާ ތަނަކަށް ވާން ޖެހޭ
-
ހާއްސަކޮށް، މި ޒަމާނުގައި އުފެދޭ ދީނީ ހިޔާލު ތަފާތުވުންތަކަށް ފަތުވާ ކައުންސިލުގެ ރައުޔު އިސްވެ ނެރުމަކީ މުޖުތަމައު އާއި ޒުވާނުންގެ ތެރޭގައި ދީނީ އެއްބައިވަންތަކަށް ދެމެހެއްޓުމަށް މުހިންމު ދައުރެއް އަދާކުރާނެ ކަމެއް
ފަތުވާ ކައުންސިލު ނުހިނގާ އޮތް އޮތުމާ ގުޅޭ ގޮތުން ޝަހީމް ވިދާޅުވީ މާޒީއާ ގުޅޭ ގޮތުން ވާހަކަދައްކަވަން ބޭނުން ނުވާ ކަމަށާއި، މި ސަރުކާރު އެކުލަވާލުމާ އެކު މިނިސްޓްރީގެ ފަރާތުން އެހެން ނުވާނެ ގޮތަކަށް މަޝްވަރާ ކުރަމުން އަންނަ ކަމަށް ވިދާޅުވި އެވެ. އަދި މެމްބަރުން ހަމަނުވުމުގެ މަސައްކަތް ވަރަށް އަވަހަށް ހައްލުވެގެންދާނެ ކަމަށް ޝަހީމް ވިދާޅުވި އެވެ.
މީގެ އިތުރުން، ފަތުވާ ކައުންސިލުން ކުރިއަށް އޮތް އަހަރަށް ކުރިއަށް ގެންދާނެ ކަންކަން އެކުލަވާލުމަށް އެ ކައުންސިލުގައި މިހާރު އެދިފައިވާނެ ކަމަށް ޝަހީމް ވިދާޅުވި އެވެ.
އެނގުން މުހިންމު - އިސްލާމިކް މިނިސްޓްރީގެ ދަށުން ހިންގަމުން އަންނަ ފަތުވާ ކައުންސިލްގެ މެމްބަރުން ހަމަނުވެ، ހުސްކަމެއްގެ ތެރޭގައި އޮންނަތާ އަހަރުތަކެއް ވެއްޖެ އެވެ. މެމްބަރުން ހަމަނުވާތީ އެ ތަނުގެ މަސައްކަތްތަކެއް ނުހިނގަ އެވެ.
މިދިޔަ އަހަރުގެ 21 ޖޫންގައި ޔޫތު މިނިސްޓްރީން ގަލޮޅު ދަނޑުގައި ބޭއްވި ޔޯގާ ހަރަކާތާ ގުޅިގެން އެ ކަމަށް ފަތުވާ ކައުންސިލުގެ ރައުޔު ދިނުމަށް ގިނަ ބަޔަކު ގޮވާލި އެވެ. ނަމަވެސް، ފަތުވާ ކައުންސިލުން އެ ކަމަށް ވެސް ރައުޔެއް ނެރެފައެއް ނުވެ އެވެ.
އެ ދުވަހު ހިނގި ހަމަނުޖެހުންތަކާ ގުޅިގެން ޝަހީމް ވެސް އޭރު ވަނީ، ފަތުވާ ކައުންސިލް "ޕެރެލައިޒްކޮށްފައި"ވާ ކަމަށް ވިދާޅުވެ، އެކަން ނިމުމަކަށް ގެނެސް، ފަތުވާ ކައުންސިލްގެ މަސައްކަތްތައް ފެށުމަށް ތަކުރާރުކޮށް ގޮވާލައްވާފަ އެވެ.