ކުރީގެ ރައީސް އަބްދުﷲ ޔާމީނުގެ ކެންޑިޑެސީ މައްސަލައިގައި ސުޕްރީމް ކޯޓުގައި ކުރިއަށް ދިޔަ އަޑުއެހުންތަކަށް ޒެއިން (މ)، ޕީޕީއެމްގެ އިސް ބޭފުޅުންނާ އެކު ވަދެވަޑާއިގަންނަވަނީ. (ދައުރު ފޮޓޯ/ހުސައިން ސުނޭން)
ޔާމީންގެ ޕާޓީ ހަދަނީ ދަރިކަލުން ޒެއިންގެ ނަމުގައި؛ ނުރަސްމީކޮށް 8 މުއައްސިސުން ތިބޭނެ
ކުރީގެ ރައީސް އަބްދުﷲ ޔާމީން ޕީޕީއެމް އިން ވަކިވެވަޑައިގަތުމަށް ފަހު އުފައްދަވާ ޕީޕަލްސް ނޭޝަނަލް ފްރަންޓް (ޕީއެންއެފް) އޭނާގެ ދަރިކަލުން ޒެއިން އަބްދުﷲ ޔާމީންގެ ނަންމަތީގައި ރަޖިސްޓްރީ ކުރަން ނިންމައިފި އެވެ.
ވީ ކިހިނެއް؟ - ޕީއެންއެފް ރަޖިސްޓްރީ ކުރުމާ ގުޅޭ ގޮތުން މިއަދު އިލެކްޝަންސް ކޮމިޝަން (އީސީ)އާ އެކު ބޭއްވި މަޝްވަރާ ބައްދަލުވުމަށް ފަހު، ޔާމީންގެ އާ ޕާޓީ އުފެއްދުމުގެ ކަންކަމުގައި އިސްކޮށް ހަރަކާތްތެރިވެވަޑައިގަންނަވާ ކުރީގެ ކޮމިއުނިކޭޝަންސް މިނިސްޓަރު މުހައްމަދު މަލީހް ޖަމާލް ވަނީ ޕާޓީ އުފެއްދުމާ ގުޅޭ ބައެއް ތަފްސީލް މީޑިއާއާ ހިއްސާ ކުރައްވާފަ އެވެ.
ބުނީ ކީކޭ؟ - މަލީހް ވިދާޅުވި ގޮތުގައި، ޔާމީން އެދިވަޑައިގަންނަވަނީ އޭނާ ހިމެނިވަޑައިގަންނަވާހެން ޕީއެންއެފްގެ މުއައްސިސުންގެ ގޮތުގައި އަށް ބޭފުޅުން ތިއްބެވުމަށެވެ. އެއީ:
-
1-
ޔާމީން
-
2-
ޔާމީންގެ ދަރިކަލުން ޒެއިން އަބްދުﷲ ޔާމީން
-
3-
ޔާމީންގެ އިސް ގާނޫނީ ވަކީލް ޑރ. މުހައްމަދު ޖަމީލް
-
4-
ކުރީގެ ކޮމިޝަނާ އޮފް ޕޮލިސް ހުސައިން ވަހީދު
-
5-
ޕީޕީއެމްގެ ކުރީގެ ޓްރެޝަރާ އަހުމަދު މުސްތަފާ
-
6-
މިފްކޯގެ ކުރީގެ މެނޭޖިން ޑިރެކްޓަރު އަދްލީ އިސްމާއިލް
-
7-
ޑރ. ހުސައިން ޖިހާދު
-
8-
އަލީ އާދަމް (ކަކާގެ އަލިބެ)
ނަމަވެސް، އިލެކްޝަންސް ކޮމިޝަންގެ ގަވާއިދުގައިވާ ގޮތުން، ޕާޓީ އުފެއްދުމުގެ ހުއްދަ ދޫކުރެވެނީ އެއް މުއައްސިސަކަށެވެ.
"އެހެންވީމަ، އަޅުގަނޑުމެންގެ [ތެރޭގައި] ވާހަކަދެކެވިފައި މިވަނީ، ރައީސް ޔާމީންގެ ފަރާތްޕުޅުން އިލެކްޝަންސް ކޮމިޝަނުން ޒެއިން އަބްދުﷲ ޔާމީންގެ ނަންފުޅުގައި މި ހުއްދަ ދޫކޮށްދެއްވުމަށް އެދިފައި،" މަލީހް ވިދާޅުވި އެވެ.
އެނގުން މުހިއްމު - ޕީއެންއެފް އުފެއްދުމުގެ ހުއްދައަށް އެދި މިއަދުގެ ބައްދަލުވުމުގައި އީސީއަށް ފޯމު ހުށަހަޅާނެ ކަމަށް މަލީހް ކުރިން ވިދާޅުވެފައި ވިޔަސް، އެ ބައްދަލުވުމުގައި އެކަން ކޮށްފައެއް ނުވެ އެވެ. އެއީ، އެ ބައްދަލުވުމަށް ފަހު މަލީހް ވިދާޅުވި ގޮތުގައި، ކުށުގެ ރެކޯޑް ސާފުކުރުން ފަދަ ކަންކަން ކުރަން ޖެހޭތީ އެވެ.
"ޕާޓީ އުފެއްދުމަށްޓަކައި ހޯދަން ޖެހޭ ހުއްދަ ހޯދުމަށްޓަކައި އިލެކްޝަންސް ކޮމިޝަންގެ މެމްބަރުންނާއި މުވައްޒަފުންނާ ވަރަށް އެކުވެރި މާހައުލެއްގައި އަޅުގަނޑުމެން މިވަނީ މަޝްވަރާ ކުރެވިފައި. އެ ބޭފުޅުންގެ ފުރިހަމަ އެއްބާރުލުން ވީހާ އަވަހަކަށް މި ޕާޓީ އުފެއްދުމަށްޓަކައި ދެއްވާނެކަމުގެ ފުރިހަމަ ޔަގީންކަން އަޅުގަނޑުމެންނަށް މިވަނީ ލިބިފައި،" ކުށުގެ ރެކޯޑް ސާފުކުރެވުނުހާ އަވަހަކަށް މިއަދުގެ ވަގުތެއްގައި ވެސް ހުއްދައަށް އެދި ހުށަހަޅުއްވާނެކަން ފާހަގަކުރައްވައި މަލީހް ވިދާޅުވި އެވެ.
"އަޅުގަނޑުމެންގެ އުންމީދަކީ އިރާދަކުރެއްވިއްޔާ މިއަދު ވެސް ޑީޖޭއޭ [ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން] އިން ކުށުގެ ރިކޯޑްތައް ލިބިއްޖެއްޔާ އަނެއްކާ އަޅުގަނޑުމެން އިލެކްޝަންސް ކޮމިޝަނަށް އަންނާނަން ފޯމު ހުށަހެޅުމައްޓަކައި."
މަލީހް އުންމީދުކުރައްވަނީ ފޯމް ހުށަހަޅާތާ 24 ގަޑިއިރުގެ ތެރޭގައި ޕީއެންއެފް އުފެއްދުމުގެ ހުއްދަ ލިބޭނެ ކަމަށެވެ. އެއާ އެކު، ވީހާ ވެސް އަވަހަކަށް މުޅި ރާއްޖެއަށް އަމާޒުކޮށްގެން މެމްބަރުން ހަމަކުރުމުގެ މަސައްކަތް ފެށިގެންދާނެ ކަމަށް އޭނާ ވިދާޅުވި އެވެ.
ޔާމީންގެ އިސް ވަކީލް ޖަމީލް ވިދާޅުވީ ޕީއެންއެފް އިން ސިޔާސީ ޕާޓީ އުފެއްދުމުގެ ރެކޯޑް މުގުރާލައި ސިޓީ ކައުންސިލަށާއި މަޖިލީހަށް ވެސް ކުރިމަތިލާނެ ކަމަށެވެ.