މަޖިލީހުގައި އެމްއެންޕީ ތަމްސީލުކުރުމުގެ ފުރުސަތު ގެއްލިއްޖެ

މޯލްޑިވްސް ނެޝަނަލް ޕާޓީ (އެމްއެންޕީ)ގެ ޕާލިމެންޓްރީ ގްރޫޕަށް މަޖިލީހުގައި ތަމްސީލުކުރުމުގެ ފުރުސަތު ގެއްލިފައިވާކަން މަޖިލީހުގެ ރައީސް މުހައްމަދު އަސްލަމް މިއަދު އިއުލާނުކުރައްވަައިފި އެވެ.

ވީ ކިހިނެއް؟ - އެމްއެންޕީއަށް މަޖިލީހުގައި ތަމްސީލުކުރުމުގެ ފުރުސަތު ގެއްލުނީ ވިލިމާލޭ ދާއިރާގެ މެމްބަރަކަށް ހުންނެވި އަހުމަދު އުޝާމް މިދިޔަ ހުކުރު ދުވަހު މެމްބަރު ކަމުން އިސްތިއުފާ ދެއްވުމާ ގުޅިގެން މަޖިލީހުގައި ތިއްބަވާ އެމްއެންޕީގެ މެމްބަރުންގެ އަދަދު ދެއަކަށް މަދުވުމުންނެވެ. އެމްއެންޕީ ތަމްސީލުކުރައްވާ އުޝާމް ރައްޔިތުންގެ މަޖިލީހުގެ މެމްބަރުކަމުން އިސްތިއުފާ ދެއްވީ އާ ސަރުކާރުގެ ބަންޑާރަ ނައިބު ކަމުގެ މަގާމަށް ވަަޑައިގެންނެވުމަށެވެ.

އެނގުން މުހިއްމު - މަޖިލީހުގެ ގަވާއިދުގެ 33 ވަނަ މާއްދާގައި ބުނާ ގޮތުން، އެއްވެސް ވަގުތެއްގައި ޕާޓީއެއް ތަމްސީލުކުރާ މެމްބަރުންގެ އަދަދު ތިން މެމްބަރުންނަށް ވުރެ މަދުވެއްޖެ ނަމަ، އެ ޕާޓީއެއް މަޖިލީހުގައި ތަމްސީލުކުރުމަށް ލިބޭ ހައިސިއްޔަތު ގެއްލޭނެ ކަމަށެވެ.

ބުނީ ކީކޭ؟ - "އެހެންކަމުން، މޯލްޑިވްސް ނެޝަނަލް ޕާޓީ މަޖިލީހުގައި ތަމްސީލުކުރުމަށް މަޖިލީހުގެ ގަވާއިދުގެ 33 ވަނަ މާއްދާގެ (ނ)ގެ 2 ވަނަ ނަމްބަރުގެ ދަށުން ލިބުނު ހައިސިއްޔަތު އެ ޕާޓީއަށް ގެއްލިފައިވާތީ މަޖިލީހުގެ 33 ވަނަ މާއްދާގެ (ބ)ގެ ދަށުން އެކަން އިއުލާނުކުރަން،" އަސްލަމް ވިދާޅުވި އެވެ.

އެމްއެންޕީގެ މެމްބަރުންނަށް ތިއްބަވާނީ އެ ޕާޓީގެ ރައީސް، ދަނގެތީ ދާއިރާގެ މެމްބަރު މުހައްމަދު ނާޒިމް އާއި ތިމަރަފުށީ ދާއިރާގެ މެމްބަރު އަބްދުﷲ ރިޔާޒެވެ.