ވައްކަން ކުރި 'އާރޯ ސްޓޯރު 2'ގެ ބިއްލޫރިގަނޑު ތަޅާލާފައި (ފޮޓޯ/ޒަހީން އަބްދުﷲ)
މާފަރު ފިހާރައެއް ފަޅާލައި ވަގަށް ނެގި 80،000ރ. ދައްކަން އަމުރުކޮށްފި
ނ. މާފަރުގެ ފިހާރައެއް ފަޅާލައި 80،000ރ. ވަގަށް ނެގި މީހެއްގެ މައްޗަށް ކުށް ސާބިތުވެ، އެ ފައިސާ ތިން މަސްދުވަހުގެ ތެރޭގައި ފިހާރައިގެ ވެރި ފަރާތަށް ދެއްކުމާ އެކު، ހަ މަސްދުވަހަށް ޖަލަށް ލާން ކްރިމިނަލް ކޯޓުން މިއަދު ހުކުމް ކޮށްފި އެވެ.
ވީ ކިހިނެއް؟ - މިދިޔަ 29 މާޗު ވަނަ ދުވަހުގެ ހަވީރު 5:30 ހާއިރު، މާފަރުގައި ހިންގަމުން އަންނަ އެންމެ ގިނަ ދުވަސްވީ އެއް ފިހާރަ ކަަމަށްވާ 'އާރޯ ސްޓޯރު 2'ގެ ބިއްލޫރިގަނޑު ފަޅާލައިގެން ވަދެ، 80،000ރ. ވަނީ ވަގަށް ނަގާފަ އެވެ.
އެ މައްސަލާގަައި ހައްޔަރުކޮށް ދައުވާކޮށްފައިވަނީ އަހްމަދު މުހުތާރު، ނިއުހަވޭލީގެ/ނ. މާފަރުގެ މައްޗަށެވެ. އޭނާގެ މައްޗަށް މިދިޔަ 31 އޮގަސްޓުގައި ކުރި ދައުވާ އަކީ:
-
އެނގިހުރެ ހުއްދަ ނޫން ތަނަކަށް ވަނުން
-
ވައްކަން ކުރުން
ތަފްސީލް - ވަކިވަކިން ކުރި މި ދެ ދައުވާއަށް ވެސް އޭނާ ވަނީ، ދައުލަތާ އެކު ހެދި އިއުތިރާފު އެއްބަސްވުމެއްގެ ދަށުން ޝަރީއަތުގެ މަޖިލީހުގައި އިއުތިރާފުވެފަ އެވެ.
އޭނާ ކޯޓުގައި އިއުތިރާފުވެފައިވާ ގޮތުން:
-
އެ ފިހާރަ ބަންދުކޮށްފައި ހުއްޓާ ބިއްލޫރިގަނޑު ތަޅާލައިގެން ވަދެ، ފިހާރައިގެ ކައުންޓަރުގެ ވަތްގަނޑުގައި ހުރި 80،000ރ. ވަގަށް ނަގާފައިވާނެ
-
ކައުންޓަރުގެ ތިރީގައި ބަހައްޓާފައި ހުރި 49 ސިގިރޭޓު ކާޓޫން އާއި ނުވަ ސިގިރޭޓު ފޮށި ވަގަށް ނަގާފައިވާނެ
ދައުވާތަކަށް އޭނާ އިއުތިރާފުވެފައިވާތީ، ދައުލަތާ އެކު ހެދި އިއުތިރާފު އެއްބަސްވުމުގެ ދަށުން އޭނާގެ މައްޗަށް އިއްވާފައިވަނީ ހަ މަސްދުވަހުގެ ޖަލު ހުކުމެކެވެ. އަދި ފިހާރައިގެ ވެރި ފަރާތަށް ލިބުނު ގެއްލުމުގެ ބަދަލުގެ ގޮތުގައި އެ ފިހާރައިން އޭނާ ނެގި 80،000ރ. ފިހާރައިގެ ވެރި ފަރާތަށް ދެއްކުމަށް ވަނީ އަމުރުކޮށްފަ އެވެ.
އިއުތިރާފު އެއްބަސްވުމުގެ ދަށުންނާއި ބަންދުގައި ހޭދަކުރި މުއްދަތު އުނިކުރުމުން އޭނާ ތަންފީޒުކުރަން ޖެހެނީ ފަސް މަހާއި ތިން ދުވަހުގެ ޖަލު ހުކުމެކެވެ. އެއީ:
-
އޭނާގެ މައްޗަށް އުފުލާފައިވާ، އެނގި ހުރެ ހުއްދަ ނޫން ތަނަކަށް ވަނުމުގެ ކުށަށް އިއްވާފައިވަނީ އެއް މަހާއި ހަ ދުވަހުގެ ޖަލު ހުކުމެއް
-
ދައުލަތާ އެކު ހެދި އިއުތިރާފު އެއްބަސްވުމުގެ ދަށުން އެ ޖަލު އަދަބުގެ ތެރެއިން 14 ދުވަހުގެ ޖަލު އަދަބު 80 ގަޑިއިރު މުޖުތަމައުއަށް ހިދުމަތް ކުރާ ގޮތަށް ބަދަލުކުރުމުންނާއި ބަންދުގެ މުއްދަތު އުނިކުރުމުން ތަންފީޒު ކުރަން ޖެހޭނީ ނުވަ ދުވަހުގެ ޖަލު އަދަބެއް
-
އިއުތިރާފު އެއްބަސްވުމުގެ ދަށުން ވައްކަމުގެ ކުށަށް އިއްފައިވަނީ ހަތަރު މަހާއި 24 ދުވަސް
އެނގުން މުހިންމު - އާރޯ ފިހާރައަކީ އެކި ފަހަރުމަތިން ފަޅާލައި ގިނަ ފައިސާތަކެއް ވަގަށް ނަގާފައިވާ ފިހާރައެކެވެ. މި އަހަރުގެ ތެރޭގައި ވެސް އެ ފިހާރަ އެކި ފަހަރު މަތިން ފަޅާލާފައިވާތީ ލައްކައިން ގެއްލުން ވެފައިވާ ކަމަށް އެ ފިހާރައިގެ ވެރި ފަރާތުން ވަނީ ބުނެފަ އެވެ.
ވަގުންގެ އުނދަގޫ ބޮޑުވެފައިވާ މާފަރުގެ އެކި ގެތަކުންނާއި ފިހާރަތަކުން ވައްކަން ކުރުމުގެ މައްސަލަތައް މިފަހުން ވަނީ އިތުރުވެފަ އެވެ. ފުލުހުންގެ ތަފާސްހިސާބުތަކުން ދައްކާ ގޮތުގައި، ދެ މަހެއްހާ ދުވަހުގެ ތެރޭގައި ވައްކަމުގެ ބޮޑު އަށް މައްސަލަ މާފަރުން ވަނީ ހުށަހަޅާފަ އެވެ.
އެގޮތުން:
-
މިދިޔަ ސެޕްޓެމްބަރުގައި އެއް ރޭ މަތިން އެކަނި ވެސް ނުވަ ތަނެއް ފަޅާލައި ވައްކަން ކޮށްފައިވޭ
-
މިދިޔަ 13 ސެޕްޓެމްބަރުގައި އެ ރަށު ޕޮލިސް ސްޓޭޝަން ފާޅާލައި ބަނގުރާފުޅިތަކެއް ވަގަށް ނަގާފައިވޭ
-
މިދިޔަ މަސް ތެރޭގައި ވެސް އާރޯ ސްޓޯރުގެ އިތުރުން، ރަށު ކައުސިލުގެ އިދާރާއިންނާއި ސްކޫލުގެ ގުދަނެއް ފަޅާލާފައިވޭ
-
ކައުންސިލުގެ ސީސީޓީވީ ކެމެރާ އާއި ލެޕްޓޮޕް ފަދަ ހިދުމަތް ދިނުމަށް ބޭނުންކުރާ މުހިންމު އެހެނިހެން ތަކެތި ވަގަށް ނަގާފައިވޭ
ސައުވިސް ގަޑިއިރު ހިދުމަތް ދޭ ފުލުހުންގެ އިދާރާއެއް ވެސް ހުންނަ މާފަރުގައި ވައްކަމުގެ މައްސަަލަތައް ހައްލުނުވާތީ ރައްޔިތުންގެ ކަންބޮޑުވުން ބޮޑެވެ.