'ރައީސް ޔާމީން ބަތްކައްކާ ނުކުޅޭނެ'

އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރުގައި އެންމެ މުހިންމުކަން ދީގެން ކުރަންވީ ކަންކަމުގެ ލިސްޓެއް، ކުރީގެ ރައީސް އަބްދުﷲ ޔާމީން ރޭ އިއްވެވި އެވެ. އެ ލިސްޓްގައި ހިމެނޭ އެންމެ މުހިންމު ދެ ޓެސްޓަކީ ރާއްޖޭގައި ތިބި އިންޑިއާ ސިފައިން ބޭލުމާއި ރާއްޖޭގެ ދެކުނުން ގެއްލުނު ކަނޑުގެ ސަރަހައްދު ހޯދުމެވެ.

ޕީޕީއެމް އޮފީހުގައި ބޭއްވި ޖަލްސާގައި އެވާހަކަފުޅު ދެއްކެވުމަށް ފަހު އެތަނުން ނުކުމެވަޑައިގަތް ވަގުތު 'ދައުރު'ގެ ނޫސްވެރިޔާ މުހައްމަދު މުޒައްޔިން ނާޒިމް ސުވާލެއްކުރި އެވެ. އެ ދެ ކަންތައް މުއިއްޒުގެ ސަރުކާރުގައި ނުކުރެވި، އެ ޓެސްޓުން ފޭލްވެއްޖެ ނަމަ، ސަރުކާރާ ދެކޮޅަށް ޔާމީން ނުކުންނަވާނަންތޯ އެވެ.

"ކާކު ބުނީ ފާސްނުވާނޭ؟ ކާކު ބުނީ ފާސްނުވާނޭ؟" ކަނާތުގެ ޝަހާދަތް އިނގިލި ނޫސްވެރިޔާއާ ދިމާއަށް ދިއްކުރެއްވުމަށް ފަހު، ހަރުކަށިކޮށް ޔާމީން ވިދާޅުވި އެވެ.

އެއަށް ފަހު ޔާމީން ވިދާޅުވީ ނޫސްވެރިން "ތިޔަ ސުވާލު ނުކުރާށޭ" އެވެ.

"ކަލޭމެން ތިޔަ ސުވާލުކުރޭ މިހާރު ހުރި ރައީސްއާ. ކަލޭމެން ވެސް ފެއާވޭ. ކަލޭމެން ގައުމީ ހައްގުގައި މަސައްކަތްކުރޭ،" ޔާމީން ވިދާޅުވި އެވެ.

މިހާރުގެ ރައީސް އިބްރާހިމް މުހައްމަދު ސޯލިހުއާ އެ ސުވާލުކުރަން ޔާމީން އެދިވަޑައިގެންނެވީ އަލަށް އުފެދޭ ޕީޕީއެމް-ޕީއެންސީގެ ސަރުކާރަށް އެ ޒިންމާތައް ނަގަން ޖެހުނީ މިހާރުގެ ސަރުކާރުގެ ސަބަބުން ކަމަށް ވާތީ އެވެ.

"އަހަރެމެންގެ ރައީސަށް އެ އޮތީ ބޮޑު ޒިންމާއެއް. އެއީ މި ރައީސް [ރައީސް ސޯލިހު] ހެދި ގޯހުން،" ޔާމީން ވިދާޅުވި އެވެ.

ޔާމީންގެ އެ ރައްދުގެ މާނައަކީ އެމަނިކުފާނު އަމިއްލަފުޅަށް ދެއްވި ދެ ޓެސްޓުން މުއިއްޒު ފާސްނުވެއްޖެ ނަމަ "ޔާމީން ދެން ކުރައްވާނީ ކީއްތޯ" މި ސުވާލު ނޫސްވެރިން ކޮށްގެން ނުވާނެ ކަމެވެ.

"ރައީސް ޔާމީން ބަތްކައްކާ ނުކުޅޭނެ،" އަމިއްލަ ނަފުސަށް އިޝާރަތްކުރައްވައި ވިދާޅުވި އެވެ.

"ރައީސް ޔާމީން އާއި ރައީސް ޔާމީން [ބައިވެރިވާ] ސަރުކާރުން މަސައްކަތްކުރަނީ ރައްޔިތުންގެ ހައްގުގައި."