ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލިސް އިދާރާގައި ބޭއްވި ނޫސްވެރިންގެ ބައްދަލުވުން. (ދައުރު ފޮޓޯ/ހުސައިން ސުނޭން)
ނިޒާމާ ގުޅޭ ގާނޫނުއަސާސީގެ އިސްލާހަކާ އެކު މާދަމާ މަޖިލިސް ބާއްވަނީ
ރާއްޖޭގެ ވެރިކަމުގެ ނިޒާމު ރިޔާސީން ބަރުލަމާނީއަށް ބަދަލުކުރުމާ ގުޅޭ ގޮތުން ގާނޫނުއަސާސީއަށް ގެންނަ އިސްލާހަކާއި ނިޒާމީ ވޯޓުނެގުމާ ގުޅޭ ގަރާރުގެ މައްސަލާގައި، ރަސްމީ ބަންދު ދުވަހަކަށް ވިޔަސް މާދަމާ ރައްޔިތުންގެ މަޖިލީހުގެ ޖަލްސާއެއް ބާއްވަން އެޖެންޑާކޮށްފި އެވެ.
ވީ ކިހިނެއް؟ - އިއްޔެ ބޭއްވި ރިޔާސީ އިންތިހާބާ ގުޅިގެން މާދަމާ އަކީ ވެސް ރަސްމީ ބަންދު ދުވަހެއްގެ ގޮތުގައި ރައީސް އިބްރާހިމް މުހައްމަދު ސޯލިހް މިއަދު ވަނީ ނިންމަވާފަ އެވެ. އާންމުކޮށް ބަންދު ދުވަސްތަކުގައި ޖަލްސާތައް ނުބޭއްވި ނަމަވެސް، މާދަމާ ޖަލްސާއެއް ބާއްވަން މިހާރު ވަނީ އެޖެންޑާކޮށްފަ އެވެ.
ތަފްސީލް - މާދަމާގެ އެޖެންޑާގައި މުޅިން ވެސް އޮތީ، ނިޒާމީ ވޯޓާ ގުޅޭ ގޮތުން ޑިމޮކްރެޓްސްގެ ފަރާތުން ހުށަހަޅާފައިވާ މައްސަލަ އެވެ. މީގެ އިތުރުން، މާފަންނު އުތުރު ދާއިރާގެ ޑިމޮކްރެޓްސްގެ މެންބަރު އިމްތިޔާޒު ފަހުމީ ހުށަހަޅުއްވާފައިވާ، ގާނޫނުއަސާސީއަށް އިސްލާހު ގެނަައުމުގެ ބިލެއްގެ ފުރަތަމަ ކިއުން އިއްވުމަށް ވެސް އެޖެންޑާގައި ވަނީ ހިމަނާފަ އެވެ.
އެ އިސްލާހާ ގުޅޭ ގޮތުން ސުވާލުކުރުމުން އިމްތިޔާޒް 'ދައުރު'އަށް ވިދާޅުވީ، އެއީ "ރިފަރަންޑަމްއާ ގުޅޭ މާއްދާއަކަށް ގެންނަން ޖެހޭ ބަދަލެއް" ކަމަށެވެ. ނަމަވެސް، އިތުރު ތަފްސީލެއް އޭނާ ނުދެއްވަަ އެވެ.
އެޖެންޑާގައި ދެން އޮތް ކަންކަން:
-
ނިޒާމު ބަދަލުކުރުމަށް ރައްޔިތުންގެ ހިޔާލު ހޯދުމުގެ ވޯޓެއް ނަގަން މަޖިލީހުން ފާސްކޮށްފައިވާ ގަރާރާ ގުޅޭ ގޮތުން އިލެކްޝަން ކޮމިޝަން (އީސީ)ން ފޮނުވާފައިވާ ސިޓީއާ ގުޅޭ މައްސަލަ؛ އީސީން އެދިފައިވަނީ ރައްޔިތުންގެ ކައިރީ އަހަންވީ ކޮން ސުވާލެއްކަން ސާފުކޮށް ދިނުމަށް
-
ނިޒާމު ބަދަލުކުރުމާ ގުޅޭ ގޮތުން ހުށަހަޅާފައިވާ މައްސަލައިގެ އިބްތިދާއީ ބަހުސް
އެނގުން މުހިންމު - ރާއްޖޭގައި މިހާރު އޮންނަ ރިޔާސީ ނިޒާމު ބަދަލުކުރުމަށް ފެންނަ ނުފެންނަ ވޯޓެއް ނަގަން ގަރާރެއް ހުށަހެޅީ، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް އެންމެ ބޮޑަށް ވަކާލާތުކުރައްވަމުން އަންނަ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ޑިމޮކްރެޓްސްގެ ފަރާތުންނެވެ.
އެ ޕާޓީގެ ފަރާތުން މި ފަހަރުގެ ރިޔާސީ އިންތިހާބުގެ ފުރުތަމަ ބުރުގައި ވާދަކުރައްވައި ނާކާމިޔާބުވެވަޑައިގެންނެވި ހުޅުދޫ ދާއިރާގެ މެމްބަރު، އިލްޔާސް ލަބީބް މަޖިލީހަށް ހުށަހެޅުއްވި ގަރާރުގައި ވަނީ، އަންނަ މަހުގެ 30ގެ ކުރިން އެ ވޯޓު ނަގަން އީސީއަށް އެންގުމަށް އެދިވަޑައިގެންފަ އެވެ.
އެކަމާ ގުޅިގެން، މިހާރު އީސީން ރައްޔިތުންގެ މަޖިލީހަށް ފޮނުވާފައިވާ ސިޓީގައި އެދިފައިވަނީ:
-
ނިޒާމީ ވޯޓެއް ނަގާއިރު، ވޯޓު ނަގާ މައުލޫއުއަކީ ކޮބައިތޯ އާއި ސުވާލަކީ ކޮބައިތޯ ސާފުކޮށްދީ، އެ ސުވާލު ފާސްކޮށްފައި ފޮނުވައި ދިނުމަށް
-
ވޯޓު ނެގެނީ ކީއްވެ ކަމާއި އެކަމާ ގުޅޭ މުހިންމު މައުލޫމާތުތައް ވޯޓު ނެގުމުގެ ކުރިން ރައްޔިތުންނަށް އެނގެން ޖެހޭތީ، ރައްޔިތުން ހޭލުންތެރި ކުރުވުމަށް އެ މައުލޫމާތުތައް ފޮނުއްވައިދެއްވުމަށް
-
ނިޒާމީ ވޯޓެއް ނަގާނަމަ އިތުރު 40 މިލިއަން ހަރަދުވާނެތީ އެކަަމަށް ބޭނުންވާ ބަޖެޓުގެ ކަންކަން ހަމަޖައްސައިދިނުމަށް
މިކަންކަން ހަމަޖެހިއްޖެ ނަމަ، އީސީން މިހާރު ނިންމާފައިވަނީ ނިޒާމާ ގުޅޭ ގޮތުން ރައްޔިތުންގެ ހިޔާލު ހޯދުމުގެ ވޯޓު މި އަންނަ މަހުގެ 29ގައި ނެގުމަށެވެ.
ކޮމެންޓް (1)
ރައްޔިތުމީހާ