ނަޝީދަށް އިންސާފު ހޯދައިދޭނީ އަޅުގަނޑުގެ ސަރުކާރެއްގައި: މުއިއްޒު

ދަ ޑިމޮކްރެޓްސްގެ ބާނީ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް 6 މޭ 2021ގައި ދިން ބޮމުގެ ހަމަލާގައި އިންސާފު ހޯދައިދިނުމަަށް މި ސަރުކާރުން ސަމާލުކަން ދީފައި ނުވާ ކަން ފާހަގަކުރައްވައި ނަޝީދަށް އިންސާފު ހޯދައި ދޭނީ ޕީޕީއެމް-ޕީއެންސީގެ ސަރުކާރެއްގައި ކަމަށް އިދިކޮޅު ކޯލިޝަންގެ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.

ވީ ކިހިނެއް؟ - މިރޭ މާފަންނު އުތުރު ދާއިރާގައި ބޭއްވި ކަންމަތީ ޖަލްސާއެއްގައި ވާހަކަ ދައްކަވަމުން އޭނާ ގާއިމްކުރާނީ އިންސާފުވެރި ވެރިކަމެއް ކަން ތަކުރާރު ކުރައްވާ، ޕީޕީއެމް-ޕީއެންސީގައި އެންމެނަށް ވެސް އިންސާފު ލިބޭނެ ކަމުގެ ޔަގީންކަން އެރުވި އެވެ.

ބުނީ ކީކޭ؟ - "ހަމަ ފާހަގަކޮށްލަން ބޭނުން، ޑިމޮކްރެޓްސް ޕާޓީގެ ރައީސް ނަޝީދު، އެމަނިކުފާނަށް މާލޭގެ މެދުގައި، މަޖީދީ މަގުގައި ދިން އަނިޔާވެރި އުދުވާނީ ހަމަލާ. އެ ހަމަލާގައި އެމަނިކުފާނަށް އިންސާފު ހޯދައިދެވިފައެއް ނުވޭ. ސަރުކާރުން އެކަމަށްޓަކައި ދޭންވާ ސަމާލުކަން ދީފައެއް ނުވޭ،" މުއިއްޒު ފާހަގަކުރެއްވި އެވެ.

"އެހެންވީމަ އިންސާފުވެރި ސަރުކާރެއް އަޅުގަނޑުމެން ގާއިމްކުރަން މި އަންނަނީ. އިރާދަކުރެއްވިއްޔާ އެމަނިކުފާނަށް [ނަޝީދަށް] އިންސާފު ހޯދައިދޭނީ އަޅުގަނޑުމެން ގާއިމްކުރާ ސަރުކާރެއްގައި."

ރާއްޖެއަށް ހަމަޖެހުން އަންނާނީ ހަމަޖެހުމާއި އަދުލުވެރިކަމާއި އިންސާފުވެރިކަން ގާއިމްވެގެންކަން ތަކުރާރު ކުރައްވައި މުއިއްޒު ވިދާޅުވީ އޭނާގެ ސަރުކާރެއްގައި އެކަންކަން އެންމެ ފުރިހަމައަށް ތަންފީޒު ކުރައްވާނެ ކަމަށެވެ.

އެނގުން މުހިއްމު - މިމަހުގެ 9 ވަނަ ދުވަހު ބޭއްވި ރިޔާސީ އިންތިހާބުގައި އެންމެ ގިނަ ވޯޓު ހޯއްދަވައިގެން ޑރ. މުހައްމަދު މުއިއްޒު 2 ވަނަ ބުރަށް ދިޔައިރު، ދެން އެންމެ ގިނަ ވޯޓު ލިބިގެން 2 ވަނަ ބުރުގައި ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހު އެވެ. އެގޮތުން:

ފާހަގަކޮށްލެވޭ ކަމެއް - ޑިމޮކްރެޓްސްއާ އެކު އެމްޑީޕީން ވެސް މަޝްވަރާތައް ކުރަމުންދާއިރު، މިހާރު ކުރިއަށްދާ އެ ޕާޓީގެ އިންޓެރިމް ކައުންސިލް ބައްދަލުވުމަށް ފަހު 2 ވަނަ ބުރުގައި ޑިމޮކްރެޓްސް އޮންނާނެ ކޮޅަކާ މެދު މަޝްވަރާކޮށް ގޮތެއް ނިންމާނެ އެވެ.