ރައީސް ސޯލިހް ހިތޯބު ދެއްވަނީ. (ފައިލް ފޯޓޯ/ރައީސް އޮފީސް)
ނޫސްވެރިކަމުގެ މިނިވަންކަން އެންމެ ފުޅާކޮށް ލިބިދެވުނީ މިދިޔަ 5 އަހަރު: ރައީސް
ރާއްޖޭގައި ނޫސްވެރިކަމުގެ މިނިވަންކަން އެންމެ ފުޅާ ދާއިރާއެއްގައި ކަށަވަރުކޮށްދެވިފައިވަނީ މިދިޔަ ފަސް އަހަރުގެ ތެރޭގައި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ވީ ކިހިނެއް؟ - އެމަނިކުފާނު މިހެން ވިދާޅުވީ މިއަހަރުގެ ބައިނަލްއަގުވާމީ ޑިމޮކްރެސީ ދުވަހުގެ މުނާސަބަތުގައި މިއަދު ފޮނުއްވި ހިތޯބުގައި ވާހަކަ ދައްކަވަމުންނެވެ.
ބުނީ ކީކޭ؟ - "ދިވެހިރާއްޖޭގައި 2008 ވަނަ އަހަރުން ފެށިގެން އަމަލުކުރަމުން އަންނަ ގާނޫނު އަސާސީން ކަށަވަރުކޮށްދީފައިވާ ނޫސްވެރިކަމުގެ މިނިވަންކަމުގެ ހައްގާއި މައުލޫމާތު ހޯދައި ލިބިގަތުމުގެ ހައްގު އެންމެ ފުޅާ ދާއިރާއެއްގައި ލިބިދެވުނީ މިދިޔަ ފަސް އަހަރުގެ ތެރޭގައިކަން ޔަގީން،" ޑިމޮކްރެސީގެ އެންމެ އަސާސީ ރުކުން ކަމުގައިވާ ހިޔާލު ފާޅުކުރުމާއި ނޫސްވެރިކަމުގެ މިނިވަންކަމުގެ ވާހަކަ ދައްކަވަމުން ރައީސް ވިދާޅުވި އެވެ.
އެމަނިކުފާނު ފާހަގަކުރެއްވި ގޮތުގައި، ނޫސްވެރިކަން ކުރުމުގެ މިނިވަން މާހައުލެއް ރާއްޖޭގައި ގާއިމުކޮށްދެވިފައި އޮތުމަކީ މިގައުމުގެ ޑިމޮކްރެސީ އިތުރަށް ހަރުދަނާ ވެގެން ދިޔަ ކަމެެކެވެ.
"ނަމަވެސް ނޫސްވެރިކަމާއި ހިޔާލު ފާޅުކުރުމުގެ ހައްގުގެ ބޭނުން ހިފާ އިރު ގަބޫލުކުރަންޖެހޭ ހަގީގަތަކީ، އެއީ ޒިންމާތަކަކާއި ވާޖިބުތަކަކާ އެކުގައި ލިބިގެންވާ ހައްގުތަކެއް ކަން." ރައީސްގެ ހިތޯބުގައި ވިދާޅުވި އެވެ.
ފާހަގަކޮށްލެވޭ ކަމެއް - މި ސަރުކާރު ވެރިކަމަށް އައުމަށް ފަހު އަބުރުގެ ގާނޫނު އުވާލުން ފަދަ ކަންކަން ކުރުމާ އެކު ރިޕޯޓާޒް ވިތައުޓް ބޯޑާސް (އާރުއެސްއެފް)އިން އަހަރަކު އެއް ފަހަރު ނެރޭ 'ޕްރެސް ފްރީޑަމް އިންޑެކްސް'ގައި ރާއްޖޭގެ ދަރަޖަ ރަނގަޅުވެގެން ދިޔަ އެވެ. އެގޮތުން:
-
2021ގައި ރާއްޖޭގެ ދަރަޖަ 72އަށް ރަނގަޅުވި
-
ރައީސް އަބްދުﷲ ޔާމީންގެ ސަރުކާރުގައި ނޫސްވެރިންކަމާއި ނޫސްވެރިންނަށް އެޅި ހުރަސްތަކާ އެކު އެ ސަރުކާރު ނިމުނު އިރު ޕްރެސް ފްރީޑޮމް އިންޑެކްސްގައި ރާއްޖޭގެ ދަރަޖައަކީ 120
އެެހެން ނަމަވެސް، ވިދިވިދިގެން މިދިޔަ ދެ އަހަރު ޕްރެސް ފްރީޑަމް އިންޑެކްސްގައި ރާއްޖޭގެ ދަރަޖަ ދަށަށް ދިޔުމާ އެކު، މިހާރު ރާއްޖެ އޮތީ 100 ވަނައިގަ އެވެ. އެއީ:
-
"ޕްރޮބްލަމެޓިކް" ކެޓަގަރީ ނުވަތަ ނޫސްވެެރިކަމުގެ މިނިވަންކަމަށް ހުރަސްތަކާއި ގޮންޖެހުންތައް ހުރި ގައުމުތަކުގެ ކެޓަގަރީ
-
މިދިޔަ އަހަރާ އަޅާބަލާއިރު 13 ދަރަޖައިގެ ދަށްވުމެއް
އާރުއެސްއެފް އިން ބުނެފައިވާ ގޮތުގައި އަދިވެސް ރާއްޖޭގެ ރޭންކިން އިތުރަށް ދަށަށް ދިޔުމުގެ ފުރުސަތު ބޮޑެވެ. އެގޮތުން ރާއްޖޭގައި ނޫސްވެރިކަމުގެ މިނިވަންކަމަށް ހުރި ކަންބޮޑުވުންތަކުގެ ތެރޭގައި ކަމާބެހޭ އިދާރާތަކުން މައިގަނޑު ގޮތެއްގައި ފާހަގަކުރަނީ:
-
ނޫސްވެރިންގެ ސަލާމަތާއި ރައްކާތެރިކަން އަދިވެސް ކަންބޮޑުވާ ދަރަޖައެއްގައި އޮތުން
-
ނޫސްވެރިންގެ ރައްކާތެރިކަން ކަށަވަރުކުރަން ނުކުޅެދިފައި ވުން
-
ގިނަ އަދަދެއްގެ ނޫސްވެރިންނަށް މިދިޔަ އަހަރުތަކުގެ ތެރޭ ބޮޑެތި އިންޒާރުތަކެއް ދީފައިވުން
-
އަހުމަދު ރިލްވާން ގެއްލުވާލުމާއި ޔާމީން ރަޝީދު މަރާލި މައްސަލާގައި އިންސާފު ހޯދައި ދެވިފައި ނުވުން
-
ހެއްކާ ބެހޭ ގާނޫނުގެ ދަށުން ނޫސްވެރިންނަށް މަސްދަރު ހާމަކުރަން މަޖުބޫރު ކުރެވޭ ގޮތަށް އޮތުން