ރައްޔިތުންގެ މަޖިލީހުގެ ޖަލްސާއެއްގެ ތެރެއިން މަޖިލިސް ރައީސް މުހައްމަދު ނަޝީދު އަދި އަމީން އާންމު ފާތިމަތު ނިޔުޝާ (ފޮޓޯ/ މަޖިލިސް)
މަރުތަޅު ފިލުވާނެ ތިން ގޮތެއް ނިއުޝާ ނަޝީދަށް ކިޔައި ދީފި
ރައްޔިތުންގެ މަޖިލީހުގެ ކޮމިޓީތަކުގެ މަސައްކަތް ހުއްޓި، އެޅުވިފައިވާ 'މަރުތަޅު' ފިލުވާނެ ތިން ގޮތަކާ ގުޅޭ ލަފާ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެ އިދާރާގެ އަމީން އާއްމު ފާތިމަތު ނިއުޝާ ދެއްވައިފި އެވެ.
ވީ ކިހިނެއް؟- މިއަދުގެ ޖަލްސާގެ އެޖެންޑާގައި އޮތީ، ނަޝީދުގެ ކޮއްކޯފުޅު، ގަލޮޅު އުތުރު ދާއިރާގެ މެންބަރު އީވާ އަބްދުﷲ މަޖިލީހުގެ ނައިބު ރައީސް ކަމުގެ މަގާމުން ވަކިކުރުމަށް ހުށަހަޅާފައިވާ އޭނާގެ އިތުބާރު ނެތް ކަމުގެ މައްސަލަ އެވެ. ނަމަވެސް، ނަޝީދުގެ މައްޗަށް ވެސް އިތުބާރު ނެތްކަމުގެ މައްސަލައެއް ހުށަހެޅިފައި ވާތީ، އެކަމާ މެދު ގޮތެއް ނިންމަންދެން ޖަލްސާތަކުގެ ރިޔާސަތު ބެލެހެއްޓުމަށް އުޒުރުވެރިވެވަޑައިގަންނަވާތީ މިއަދުގެ ޖަލްސާ ޖެހުނީ ނިންމާލާށެވެ.
ބުނީ ކީކޭ؟ - ރިޔާސަތު ބެލެހެއްޓުމަށް އުޒުރުވެރިވެވަޑައިގެންނެވުމާ ގުޅިގެން ނިއުޝާ މިއަދު ނަޝީދަށް ފޮނުއްވި ސިޓީގައި ވިދާޅުވީ:
-
އީވާއަށް ފޮނުވި ނޯޓިސްގެ މުއްދަތު ހަމަވުމާ އެކު އެ މައްސަލަ އެންމެ ފުރަތަމަ އެޖެންޑާކުރަން ޖެހެނީ މިދިޔަ އާދީއްތަ ދުވަހަށް
-
އެ ދުވަހު އެ މައްސަލަ އެޖެންޑާނުކުރީ އިތުބާރު ނެތްކަމުގެ މައްސަލަތަކަށް ހޭދަކުރާ ވަގުތު ކަނޑައަޅާ އާއްމު ކޮމިޓީގެ މަސައްކަތްތައް ހުއްޓިފައި އޮތުމުން
-
ސިޔާސީ ޕާޓީތައް ތަމްސީލުކުރާ މެމްބަރުންގެ އައި ބަދަލާއި ގުޅިގެން ޕާޓީތަކަށް އެއްބަސްވުމަކަށް ނާދެވި ކޮމިޓީތައް އެކުލަވާލުމުގެ މަޑުޖެހިފައިއޮތުމަކީ އީވާގެ މައްސަލަ ކުރިއަށް ނުގެންދަންޖެހޭ ސަބަބެއް ނޫން
"ރައްޔިތުންގެ މަޖިލީހުގެ ގަވައިދުގެ 2 ވަނަ މާއްދާގެ (ށ) ގައި ބަޔާން ކުރަނީ، މަޖިލީހުގެ ރައީސަކީ ވަކި ފަރާތަކަށް ޖެހުމެއްނެތި ގާނޫނުއަސާސީއާއި ރައްޔިތުންގެ މަޖިލީހުގެ ގަވާއިދާއި މަޖިލީހުގެ ނިންމުންތަކާ އެއްގޮތްވާ ގޮތުގެ މަތިން ރައްޔިތުންގެ މަޖިލީހުގެ އިދާރާ އާއި މަޖިލީހުގެ ޖަލްސާތަކާއި ކޮމިޓީތަކާއި މަޖިލީހުގެ އެންމެހާ ކަންކަން ހިންގުމުގެ އެންމެ އިސްވެރިޔާ ކަމަށެވެ،" ނިއުޝާ ވިދާޅުވި އެވެ.
ޖަލްސާތަކުގެ ރިޔާސަތު ބަލަހައްޓަން އުޒުރުވެރިވެވަޑައިގެންނެވީ، ނަޝީދުގެ މައްޗަށް ވެސް އިތުބާރު ނެތްކަމުގެ މައްސަލައެއް ހުށަހެޅިފައިވަނިކޮށް ކަން ފާހަގަކުރައްވަމުން ނިއުޝާ ވިދާޅުވީ، ނައިބު ރައީސްގެ މައްޗަށް ހުށަހެޅޭ އިތުބާރު ނެތްކަމުގެ މައްސަލަތައް ކުރިއަށްދާ ޖަލްސާތަކުގެ ރިޔާސަތު ބަލަހައްޓަން ޖެހެނީ މަޖިލީހުގެ ރައީސްކަން މަޖިލީހުގެ ގަވާއިދުން އެނގޭ ކަމަށެވެ. އެހެންވެ މަޖިލީހުގެ ކައުންސެލާ ޖެނެރަލް ދީފައިވާ މަޝްވަރާގެ އަލީގައި އެ މައްސަލަ ހައްލުކުރުމަށް ނިއުޝާ ތިން ލަފާއެއް ދެއްވާފައިވެ އެވެ. އެއީ:
-
1-
ފުރަތަމަ ގޮތަކީ އިތުބާރު ނެތްކަމުގެ މައްސަލަ ހުށަހެޅޭ ޖަލްސާގައި ވާހަކަދައްކާނެ މެމްބަރުންގެ އަދަދާއި ފުރުސަތުގެ އަދަދާއި ފުރުސަތުގެ ދިގުމިން އާއްމު ކޮމިޓީން ކަނޑައެޅުން އަވަސްކުރުމަށް ދާއިމީ ކޮމިޓީތަކުގައި މެމްބަރުން އެކުލެވޭ ގޮތް ފާސްކުރުމަށް ދެން އެންމެ އަވަހަށް ބާއްވާ ޖަލްސާއަކަށް އެޖެންޑާކުރުމާއި
-
2-
އީވާގެ މައްސަލަ ހުށަހެޅޭ ޖަލްސާގެ ރިޔާސަތު ބެލެހެއްޓުމުގެ މަސްއޫލިއްޔަތު މަޖިލީހުގެ ރައީސް ކަނޑައެޅިގެން އެހެން ފަރާތަކާ ހަވާލުކުރުން
-
3-
ދެވަނަ ގޮތަކީ އިތުބާރު ނެތްކަމުގެ މައްސަލަ ހުށަހެޅޭ ޖަލްސާގެ ރިޔާސަތު ބެލެހެއްޓުން އެހެން ފަރާތަކާ ހަވާލުކޮށް، އެ މައްސަލައަށް ހޭދަކުރާނެ ވަގުތު މަޖިލީހުން ކަނޑައެޅުން
-
4-
ތިންވަނަ ގޮތަކީ އެ މައްސަލަ ހުށަހެޅޭ ޖަލްސާގެ ރިޔާސަތު ބެލެހެއްޓުމާއި އެ ގަރާރުގެ ބަހުސްކުރިއަށްގެންދާނެ ގޮތަކާ މެދު މަޖިލީހުން ގޮތެއް ކަނޑައެޅުމަށްޓަކައި، އާއްމު ޖަލްސާއަކަށް އެކަން ރައީސް އެޖެންޑާކޮށްދިނުން
"... މަޖިލީހަށް މިހާރު ލިބިފައިވާ މަޖިލީހުގެ ނައިބު ރައީސްގެ މަގާމުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަކިކުރުމަށް ހުށަހަޅާފައިވާ ގަރާރުގެ މަސައްކަތް މަޖިލީހުގެ ނިޒާމުގެ ތެރޭގައި ނުހުއްޓި ކުރިއަށް ގެންދެވޭނެ ގޮތެއް ހަމަޖައްސަވައި ދެއްވުމަށް އަދަބުވެރިކަމާ އެކު ދަންނަވަމެވެ،" އަމީން އާއްމުގެ ސިޓީ ނިންމާލަމުން ވިދާޅުވި އެވެ.
އެނގުން މުހިންމު - މަޖިލީހުގެ ގަވައިދުގެ ދަށުން، މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ހުށަހެޅުމާ އެކު ރިޔާސަތުގައި އެ ބޭފުޅަކު އިންނަވަން ހުރަހެއް ނެތެވެ. ނަމަވެސް، ނަޝީދު މަޖިލީހަށް ފޮނުއްވި ސިޓީއެއްގައި ވިދާޅުވީ، އެ ހާލަތުގައި ރިޔާސަތުގައި ނީންނަވަން އުޒުރުވެރިވެވަޑައިގަތީ މަޖިލީހުގެ ގަވަައިދުގެ 44 ވަަނަ މާއްދާގެ (ހ)ގެ ދަށުން އެ މަނިިކުފާނަށް ލިބިވަޑައިގަންނަވާ އިހްތިޔާރުގެ ދަށުން ކަމަށެވެ.
އެ މައްދާގައި ބުނަނީ:
-
ރައީސް އާއި ނައިބު ރައީސް ރިޔާސަތުގައި އިންނަވަން އުޒުރުވެރިވެއްޖެ ހާލަތެއްގައި، އެ ޖަލްސާގެ ރިޔާސަތު ބަލަހައްޓާނެ މެންބަރުން، ގާނޫނުއަސާސީގެ 82 ވަނަ މާއްދާގެ (ށ)ގައިވާ ގޮތުގެ މަތިން، މަޖިލީހުގެ ރައީސް ކަނޑައަޅުއްވަން ވާނެ
-
އެގޮތުން ކަނޑައަޅާނީ މަޖިލީހުގައި މެދުނުކެނޑި އެންމެ ގިނަ ދުވަހު ހިދުމަތް ކުރެއްވި މެންބަރުންގެ ތެރެއިން ޖުމްލަ ފަސް މެންބަރުން؛ އެއިން މެންބަރަކަށް ރިޔާސަތު ބެލެހެއްޓޭނީ، ވިދިވިދިގެން ތިން ޖަލްސާގެ މުއްދަތަކަށް