އެމްޑީޕީ ޕީޖީން މިއަދު ބޭއްވި ނޫސްވެރިންގެ ބައްދަލުވުމުގައި އެގްރޫޕޫގެ ލީޑަރު އަސްލަމް ވާހަކަދައްކަވަނީ (ފޮޓޯ/ މަޖިލީސް)
ކޮމިޓީތައް އެކުލަވާނުލެވުނަސް އީވާގެ މައްސަލަ ކުރިއަށް ގެންދެވޭނެ: އެމްޑީޕީ
އެމްޑީޕީން ހުށަހަޅާފައިވާ ރައްޔިތުންގެ މަޖިލީހުގެ ނައިބު ރައީސް އިވާ އަބްދުﷲ މަގާމުން ވަކިކުރުމަށް ހުށަހަޅާފައިވާ މައްސަލަ މަޖިލީހުގެ ކޮމިޓީތަކުގެ މަސައްކަތްތައް ހުއްޓިފައި އޮތަސް އެ މައްސަލަ ކުރިއަށް ގެންދިއުމުގެ ޖާގަ މަޖިލީހުގެ ގަވާއިދުން ލިބޭ ކަމަށް އެމްޑީޕީގެ ޕާލިމެންޓްރީ ގްރޫޕުން މިއަދު ބުނެފި އެވެ.
ވީ ކިހިނެއް؟- ރައްޔިތުންގެ މަޖިލީހުގައި ސިޔާސީ ޕާޓީތައް ތަމްސީލު ކުރާ މެންބަރުންގެ އަދަދުތަކަށް މިދިޔަ މަހު ފަހުކޮޅު އައި ބަދަލާ އެކު، އަލުން ކޮމިޓީތައް އެކުލަވާލަން ޖެހެ އެވެ. ނަމަވެސް، ޕާޓީތަކަށް އެކަމުގައި އެއްބަސްނުވެވި، ކޮމިޓީތަކުގެ މަސައްކަތް އޮތީ ހުއްޓިފަ އެވެ. އެކަމާ ގުޅިގެން އީވާގެ އިތުބާރު ނެތްކަމުގެ މައްސަލަ ވަނީ އާދީއްތަ ދުވަހު ބާއްވަން ނިންމާފައިވާ ޖަލްްސާގެ އެޖެންޑާއިން ނަގާފަ އެވެ.
މަޖިލީހުގެ އަމީން އާންމު، ފާތުމަތު ނިޔުޝާ މެމްބަރުންނަށް ފޮނުއްވި ސިޓީގައި ބުނެފައި ވަނީ:
-
އެ މައްސަލަ އެޖެންޑާއިން ނެގުމަށް ނިންމީ، ކޮމިޓީތައް އެކުލަވާލެވި އަދި ފާސްކޮށްފައި ނުވާތީ
-
އާންމު ކޮމިޓީ ނުހިނގާތީ މަޖިލިސް ގަވައިދުގެ ދަށުން މިފަދަ މައްސަލަތަކުގައި ބަހުސް ކުރަން ކަނޑައަޅަން ޖެހޭ ވަގުތު އަދި އޮތީ ކަނޑަނޭޅި
ބުނީ ކީކޭ؟- މިއަދު މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަޖިލީހުގެ މެޖޯރިޓީ އޮންނަ އެމްޑީޕީގެ ޕީޖީ ލީޑަރު މުހައްމަދު އަސްލަމް ވަނީ ކޮމިޓީތައް އެކުލަވާލުމާ ގުޅޭގޮތުން ސިޔާސީ ޕާޓީތަކުގެ ޕީޖީ ލީޑަރުންނާ އެކު މިއަދު ބޭއްވި ބައްދަލުވުމުގައި ވެސް އެކަމާ ގުޅިގެން އެއްބަސްވުމަކަށް ނާދެވޭކަން ހާމަކުރައްވާފަ އެވެ. އޭނާ ވިދާޅުވީ، އެ ބައްދަލުވުމުގައި:
-
އެމްޑީޕީއަށް ދެވެން އޮތް ހުރިހާ ދުލެއް ވަނީ ދީފައި
-
އެމްޑީއޭއިން ބޭނުންވާ ގޮތަށް، އިގްތިސާދީ ކޮމިޓީގެ ސްލޮޓެއް އެ ޕާޓީއަށް ދިނުމަށް އެއްބަސްވެވުނު
-
އެއްވެސް ޕާޓީއެއް ތަމްސީލުނުކުރައްވާ މެމްބަރުންގެ ފަރާތުން އެދިވަޑައިގެންނެވީ އާއްމު ކޮމިޓީގައި ހުރިހާ ޕާޓީތަކެއް ތަމްސީލުވާ ގޮތަށް ހަމަޖެއްސުމަށް؛ އެއީ މީގެކުރިން އެ ކޮމިޓީގައި ސްލޮޓު ދޫކުރި އުސޫލު ނޫނަސް، އެކަމަށް ވެސް އެމްޑީޕީން އެއްވަސްވި
-
އެމްޑީޕީން ގަބޫލުކުރާ ގޮތުގައި، ކޮމިޓީތަކުގައި ސްލޮޓުތައް ދޫކުރަން ޖެހޭނީ މަޖިލީހުގައި ޕާޓީތައް ތަމްސީލުކުރައްވާ މެމްބަރުންގެ ނިސްބަތަށް ބަލައިގެން؛ އެހެން ޕާޓީތަކަށް އެކަމަށް އެއްބަހެއް ނުވެެވޭ
އެކަން ފާހަގަކުރައްވަމުން އޭނާ ވިދާޅުވީ، އާއްމު ކޮމިޓީގެ މަސައްކަތް ހުއްޓިފައި އޮތުމުން ކަމަށް ބުނެ އީވާގެ އިތުބާރު ނެތްކަމުގެ މައްސަލަ އެޖެންޑާއިން ނެގުމުން އެކަމާ ގުޅޭގޮތުން އެމްޑީޕީން ދެކޭގޮތް ހާމަކުރުމަށް އެ އިދާރާއަށް ސިޓީއެއް ފޮނުއްވާފައިވާނެ ކަމަށެވެ.
ހިތަދޫ އުތުރު ދާއިރާ ތަމްސީލުކުރައްވާ އަސްލަމް ވިދާޅުވީ މަޖިލީހުގެ ގަވާއިދުގެ 106 ވަނަ މާއްދާގައި "ދާއިމީ ކޮމިޓީތަކަކީ އަބަދުވެސް ދެމި އޮންނަ، އަދި ވަކި މަސްއޫލިއްޔަތުތަކެއް ހަވާލުކޮށްފައިވާ ކޮމިޓީތަކެއް" ކަމަށް ބަޔާން ކޮށްފައި ވާތީ، އާއްމު ކޮމިޓީގެ މަސައްކަތްތައް ހުއްޓިގެން ނުވާނެ ކަމަށް އެ ޕާޓީން ގަބޫލުކުރާ ކަމަށެވެ.
އެއާ އެކު އޭނާ ފާހަގަކުރެއްވީ، މަޖިލީހުގެ މައިނޯރިޓީއަށް އެއްބަސްނުވެވިގެން ކަމަށް ބުނެ ކޮމިޓީތަކުގެ މަސައްކަތް ހުއްޓާލާފައި ބޭއްވުމުގެ ޖާގަ މަޖިލީހުގެ ގަވާއިދުން ނުދޭ ކަމެވެ.
"އެގޮތުން މަޖިލީހުގެ އާއްމު ކޮމިޓީއަކީ އަބަދުވެސް ދެމި އޮންނަ ކޮމިޓީއެއް. އެ ކޮމިޓީއަށް މެމްބަރުން ހަމަޖެއްސުމަށް މަޖިލީހުން އެހެން ގޮތަކަށް ފާސްނުކުރާހާ ހިނދަކު އެ ކޮމިޓީގައި ތިއްބެވި މެމްބަރުން އެ ކޮމިޓީގައި ދެމިތިބޭނެ،" އަސްލަމް ވިދާޅުވި އެވެ.
"މަޖިލީހުގެ ރައީސް އެގޮތަށް އިއުލާނުކުރެއްވި ނަމަވެސް މަޖިލީހުގެ ކޮމިޓީތަކުގެ މަސައްކަތް ހުއްޓާލަން އެންގިކަމުގައިވީ ނަމަވެސް ކޮމިޓީތަކުގެ މަސައްކަތް ހުއްޓިގެންދާނެ ޖާގައެއް އަދި އެފަދަ އަމުރެއް ނެރުމުގެ ފުރުސަތެއް މަޖިލީހުގެ ރައީސަށް އޮތް ކަމަކަށް މަޖިލީހުގެ ގަވާއިދުން އަޅުގަނޑުމެންނަށް ފާހަގަނުކުރެވޭތީ އެ ވާހަކަ އަޅުގަނޑުމެން ދަންނަވަން."
އާއްމު ކޮމިޓީގެ މަސައްކަތް މަޖިލީހުގެ ގަވައިދާ އެއްގޮތަށް ކުރިއަށް ގެންދިއުމަށް އެންގުމަކީ އަމީން އާއްމުގެ މަސްއޫލިއްޔަތެއް ކަން ފާހަގަކުރައްވަމުން އަސްލަމް ވިދާޅުވީ، މަޖިލީހުގެ ރައީސް ނުވަތަ ނައިބު ރައީސްގެ މައްޗަށް އިތުބާރު ނެތްކަމުގެ މައްސަލަ ހުށަހަޅައި، އެބޭފުޅުންނަށް ފޮނުވާ މައްސަލައިގެ ނޯޓިސްގެ މުއްދަތު ހަމަވާ ފަހުން އެ އިދާރާގައި އިތުރު އެއްވެސް މަސައްކަތެއް ކުރިއަށް ގެންދިއުމަށް ގަވާއިދުން ޖާގަ ނުދޭ ކަމެވެ.
އެނގުން މުހިއްމު- މަޖިލީހުގެ ގަވައިދުގެ 205 ވަނަ މައްދާގައި، މަޖިލީހުގެ ރައީސާއި ނައިބު ރައީސް މަގާމުން ވަކިކުރެވޭނެ އިޖުރާތްތައް ބަޔާންކޮށްފައިވެ އެވެ. އެގޮތުން:
-
އިތުބާރު ނެތްކަމުގެ މައްސަލަ މަޖިލީހަށް ލިބުމާ އެކު، ޖަވާބުދާރީ ވުމަށް 14 ދުވަހުގެ ނޯޓިސް ދޭން ޖެހޭ؛ އެ ނޯޓިސްގެ މުއްދަތަށް ފަހު، އެންމެ އަވަހަށް ބައްވާ ޖަލްސާއަށް އެ މައްސަލަ ހުށަހަޅަން ޖެހޭ
-
ޖަލްސާއަށް މައްސަލަ ހުށަހެޅުމަށް ފަހު، އެހެން އެއްވެސް މައްސަލައަކަށް ބަހުސް ކުރެވޭނީ ނުވަތަ ގޮތެއް ނިންމޭނީ ރައީސް ނުވަތަ ނައިބު ރައީސް މަގާމުން ވަކިކުރުމުގެ މައްސަލައިގައި ގޮތެއް ނިންމުމަށް ފަހު
-
މަޖިލީސް ރައީސް ނުވަނަ ނައިބު ރައީސް މައްޗަށް ހުށަހެޅިފައިވާ މައްސަލަ ކުރިއަށްދާ ޖަލްސާތަކުގައި އެ ބޭފުޅަކަށް ރިޔާސަތެއް ނުބެލެހެއްޓޭނެ