ރައީސް އިބްރާހީމް މުހައްމަދު ސޯލިހް ބ. މާޅޮހު ކައުންސިލާއި، އެރަށު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާ ބައްދަލުކުރައްވަނީ. (ފޮޓޯ / ރައީސް އޮފީސް)
މާޅޮހު ކައުންސިލުން އެދުނީ ހިބަޅިދޫ އެރަށަށް ދޭން
އެމްއެމްޕީއާރުސީ މެދުވެރިކޮށް ބޭރު ކުންފުންޏަކަށް ދޫކުރުމަށް ވެފައިވާ އެއްބަސްވުން ބާތިލު ކުރުމަށްފަހު ސަރުކާރުން އަތުލާފައިވާ ހިބަޅިދޫ، ބ. މާޅޮހު ކައުންސިލުގެ އިހުތިސާސްގައި ހިމަނައިދިނުމަށް އެރަށު ކައުންސިލުން ރައީސް އިބްރާހިމް މުހައްމަދު ސޯލިހުގެ ކިބައިން އެދިއްޖެ އެވެ.
ވީ ކިހިނެއް؟ - މިއަދު މެންދުރުފަހު ރައީސް އިބްރާހިމް މުހައްމަދު ސޯލިހު ވަނީ ބ. މާޅޮހު ކައުންސިލާއި އެރަށު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާ ބައްދަލު ކުރައްވާ އެރަށުގެ ތަރައްގީއަށް ރައްޔިތުން ބޭނުންވާ ކަންކަމާއި ގުޅޭގޮތުން މަޝްވަރާ ކުރައްވައިފި އެވެ. ހިބަޅިދޫއަކީ މާޅޮހު ކައުންސިލުގެ އިހްތިސާސްގައި ވާ ތަނެއް ކަމުގައި ކަނޑައަޅައިދިނުމަށް އެދުނީ މި ބައްދަލުވުމުގަ އެވެ.
ތަފްސީލް - އޭގެ އިތުރުން މާޅޮހުގެ ކައުންސިލު މެންބަރުން ރަށުގެ ރައްޔިތުން ބޭނުންވެފައިވާ ކަންކަމުގެ ގޮތުގައި ފާހަގަ ކުރެއްވީ:
-
ބަނދަރުގެ ދަތިކަން ފާހަގަކޮށް، އެ މަސައްކަތް ވީހާވެސް އަވަހަކަށް ނިންމުމަށް އެދުނު
-
ބަނދަރާއެކީ ރަށްގިރުމުގެ މައްސަލަ ހައްލުކުރުން
-
ދޯނި ފަހަރު އެހެލުމަށް ބޭނުންވާ ސަރަހައްދެއް ހަމަޖައްސައިދިނުން
-
މިސްކިތުގެ ޖާގަ ކުޑަވުމުން ދިމާވާ ދަތިތައް ހައްލުކުރުން
-
ދީނީ ޕްރޮގްރާމްތައް ހިންގުމަށް ސަރުކާރުގެ އެހީތެރިކަމަށް އެދުނު
-
ކުޅިވަރު ކުޅޭނެ ވަސީލަތްތައް ބޭނުންވާކަން ފާހަގަކުރި
މާޅޮހުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީން ވެސް ވަނީ ހިބަޅިދޫ މާޅޮހު ކައުންސިލްގެ އިހްތިސާސްގައި ހިމަނައިދެއްވުމަށް ރައީސްއަށް އެދި ދަންނަވާފަ އެވެ.
ބުނީ ކީކޭ؟ - ބައްދަލުވުމުގައި ރައީސް ސޯލިހު ވިދާޅުވި ކަމަށް ރައީސް އޮފީހުން ބުނީ ކައުންސިލާއި ކޮމިޓީއިން ފާހަގަކުރި ކަންކަމުގައި ސަރުކާރުގެ އިދާރާތަކާ މަޝްވަރާކުރައްވައިގެން އެދެވޭ ހައްލުތަކެއް ހޯދުމަށް މަސައްކަތް ކޮށްދެއްވާނެކަމުގެ ޔަގީންކަން ދެއްވި ކަމަށެވެ. މީގެ އިތުރުން ވެސް އެމަނިކުފާނު ވަނީ ސަރުކާރުން ރަށްރަށަށް ތަރައްގީ ގެނައުމުގައި ކައުންސިލްތަކާއެކީ މަޝްވަރާކުރައްވައިގެން ރައްޔިތުން އެންމެ އެދޭގޮތަށް ކަންކަން ކުރިޔަށްގެންދެވޭތޯ މަސައްކަތްކުރައްވާކަން ފާހަގަކުރައްވާފަ އެވެ.
އެނގުން މުހިއްމު - ރިޒޯޓް ތަރައްގީ ކުރަން އެމްއެމްޕީއާރުސީން ބިޒްނަސް މޯލްޑިވްސް އަށް 50 އަހަރަށް ކުއްޔަށް ދިން ހިބަޅިދޫ ސަރުކާރުން އަތުލީ ރަށް ދިނުމުގެ މުގާބިލުގައި ދައްކަން އެއްބަސްވުމުގައި ބަޔާންކޮށްފައި އޮތް ތިން މިލިއަން ޑޮލަރު ދައްކާފައި ނުވާ ކަމަށް ބުނެ 2016 ގައެވެ. އެއްބަސްވުން ބާތިލް ކުރި މައްސަލަ ކޯޓަށް ހުށަހެޅުމުން:
-
2017ގައި ސިވިލް ކޯޓުން ހުކުމްކުރީ ހިބަޅިދޫ އަލުން ބިޒްނަސް މޯލްޑިވްސް އަށް ދިނުމަށް،
-
2019ގައި ހައި ކޯޓުން އެ ހުކުމް ބާތިލްކޮށް، ސަރުކާރުން ހިބަޅިދޫ އަތުލީ ރަނގަޅަށްކަން ނިންމި
-
މައްސަލަ ސުޕްރީމް ކޯޓުގައި އިސްތިއުނާފު ކުރުމުން ސުޕްރީމް ކޯޓުން ތާއީދު ކުރީ ހައި ކޯޓުގެ ނިންމުމަށް
މީގެ އިތުރަށް ރައީސް އަބްދުﷲ ޔާމީން ދަތުރުކުރެއްވި ރިޔާސީ ލޯންޗް، ފިނިފެންމާގައި 2015 ވަނަ އަހަރު ދިން ބޮމުގެ ހަމަލާއަށް ފަހު ގިނަ އަދަދެއްގެ ހަތިޔާރާއި ގޮވާތަކެތި ބ. ހިބަޅިދޫއިން ފެނުނެވެ. އެއަށް ފަހު އެ ރަށް އޮންނަނީ ސަރުކާރުގެ ބެލުމުގެ ދަށުގަ އެވެ.