ފެނަކައިގެ އެމްޑީއަށާއި ޗެއާމަން އަށް ރައީސްގެ ފުރިހަމަ އިތުބާރު

ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދާއި ޗެއާމަން މުހައްމަދު ރަޝީދަށް ފުރިހަމައަށް އިތުބާރު ކުރައްވާ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް އެހެން ވިދާޅުވީ ހއ. އުތީމުގައި އަލަށް އިމާރާތްކުރި އިންޖީނުގެ އާއި އޮފީސް އިމާރާތް ހުޅުއްވައިދެއްވުމަށް ފަހު ވާހަކަފުޅުދައްކަވަމުންނެވެ.

ފަސްމަންޒަރު - ފެނަކައިގެ އެމްޑީއަށާއި ޗެއާމަނަށް ފުރިހަމައަށް އިތުބާރު ކުރައްވާ ކަމަށް ރައީސް ސޯލިހު މި ވިދާޅުވީ އެ ދެ ބޭފުޅުންގެ މައްޗަށް ކޮރަޕްޝަނާއި އެ ނޫން ވެސް ބައެއް ތުހުމަތުތައް ކުރައްވަމުން، އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އިބްރާހިމް ވަހީދު (އިބުރޭ) މި މަހު އިސްތިއުފާދެއްވާފައި ވަނިކޮށެވެ. އިބްރާހީމް ވަހީދު ސައީދަށް ފޮނުއްވި އިސްތިއުފާގެ ސިޓީގައި ވިދާޅުވެފައި ވަނީ، ފެނަކަ ހިންގަމުންދަނީ ރަޝީދާއި ސައީދުގެ "އަމިއްލަ ކުންފުންޏެއް"ގެ ގޮތުގައި ކަމަށެވެ.

ތަފްސީލް - ރައީސް ސޯލިހުގެ ވާހަކަފުޅުގައި، އުތީމުގެ އިންޖީނުގެ އެޅުމުގެ މަޝްރޫއު ހިންގި ފެނަކަ އަށް ވަރަށް ބޮޑަށް ތައުރީފް ކުރެއްވި އެވެ. އެމަނިކުފާނު ވިދާޅުވީ ރައްޔިތުން އެދިއެދި ތިބި ހިދުމަތްތައް ދިނުމުގައި ފެނަކައިން އިހުލާސްތެރި އަދި ބޮޑެތި މަސައްކަތްތަކެއް ކުރަމުން ގެންދާ ކަމަށެވެ. އަދި ސައީދަށާއި މެނޭޖްމެންޓުގެ އިތުރުން މުޅި ކުންފުންޏަށް ވެސް އެމަނިކުފާނުގެ ފުރިހަމަ އިތުބާރު އޮތްކަން ހާމަކުރެއްވި އެވެ.

ބުނީ ކީކޭ؟ - "ރައްޔިތުންގެ ފުރިހަމަ އިތުބާރު ފެނަކައިގެ އެމްޑީއަށާއި ޗެއާމަން އަދި މުވައްޒަފުންނަށް އެބައޮތް. އަދި ސަރުކާރާއި އަޅުގަނޑުގެ ވެސް ފުރިހަމަ އިތުބާރާއި ޔަގީންކަން ފެނަކައާ ދޭތެރޭގައި، އަދި އެމްޑީ ސައީދަށާއި އަޅުގަނޑުމެންގެ ވަރަށް ގާތް ރައްޓެއްސެއް...މާޑު،. ޝައްކެއް ނެތް އެބޭފުޅުންނާ ދޭތެރޭގައި [އެބައޮތް]،" ރައީސް ވިދާޅުވި އެވެ.

"ކަންތައްތައް ކުރުމުގައި އޭގައި އޮތް އެންމެ ރަނގަޅު ގޮތް ހޯއްދަވާ، ރައްޔިތުންނަށް އެންމެ ފައިދާ ހުރި ގޮތަށް، ސަރުކާރަށް ވެސް އެންމެ ލާބަ އޮތް ގޮތަކަށް ކަންތައްތައް ކޮށް ނިންމާނެ ކަމުގެ ފުރިހަމަ ޔަގީންކަން އަޅުގަނޑުމެންނަށް އެބައޮތް."

ފެނަކަ ތެރޭގައި ކޮރަޕްޝަންގެ އަމަލުތައް ތަކުރާރުކޮށް ހިންގަމުންދާ ކަމަށް އިބްރާހީމް ވަހީދުގެ އިސްތިއުފާގެ ސިޓީގައި ތުހުމަތުކުރައްވާފައިވެ އެވެ. އެގޮތުން އޭނާ ވިދާޅުވީ:

'ދައުރު' އާ ވާހަކަދައްކަވަމުން ސައީދު ވަނީ އެ ތުހުމަތުތައް ދޮގުކުރައްވާފަ އެވެ.

އެނގުން މުހިއްމު - އުތީމުގައި ކުރިން ހުރީ 24 އަހަރުވީ އިންޖީނުގެ އެކެވެ. ފެނަކަ ކޯޕަރޭޝަނުން 7.3 މިލިއަން ރުފިޔާ އަށް ހިންގި މަޝްރޫއުއެއްގެ ދަށުން އިމާރާތް ކުރި އާ އިންޖީނުގެ ހުންނަނީ، ކުރީގެ އިންޖީނުގެއާ ހިލާފަށް، މީހުން ދިރިއުޅޭ ސަރަހައްދާ ދުރުގަ އެވެ. އެ އިންޖީނުގޭގައި 600 ކިލޯވޮޓްގެ ހަތަރު ޖެންސެޓް ބެހެއްޓޭނެ އެވެ.

އުތީމުގެ އާ އިންޖީނުގެ ހުޅުވުމުގެ ރަސްމިއްޔާތުގައި ރައީސް ސޯލިހު އަރިހުގައި އެމަނިކުފާނުގެ އަނބިކަނބަލުން ފަޒްނާ އަހުމަދާއި ވަޒީރުންނާއި މަޖިލީހުގެ ބައެއް މެމްބަރުންގެ އިތުރުން ރަށުގެ ވެރިންނާއި އާންމު ވެސް ބައިވެރިވި އެވެ.