ތޮއްޑޫ ދާއިރާގެ މެންބަރު ހަސަން ޝިޔާން މަޖިލީހުގައި ވާހަކަ ދައްކަވަނީ. (ފޮޓޯ/މަޖިލިސް)
އަތޮޅުތެރެ އާއި މާލޭގެ ކަރަންޓުގެ އަގުގެ ތަފާތު ނައްތާލަން ގޮވާލައި މަޖިލީހަށް
ކަރަންޓަށް ބިލުކުރުމުގައި އަތޮޅުތެރެ އާއި މާލެ ސަރަހައްދުގައި ގެންގުޅޭ ތަފާތުކުރުން ނައްތާލުމަށް ގޮވާލައި ތޮއްޑޫ ދާއިރާގެ މެމްބަރު ހަސަން ޝިޔާން ރައްޔިތުންގެ މަޖިލީހަށް މިއަދު ގަރާރެއް ހުށަހަޅުއްވައިފި އެވެ.
ވީ ކިހިނެއް؟ - މިއަދުގެ ޖަލްސާއަށް ޝިޔާން ހުށަހެޅުއްވި ގަރާރުގައި ބުނެފައިވަނީ ސްޓެލްކޯ އާއި ފެނަކަ އިން އަތޮޅުތެރެއަށް ފޯރުކޮށްދޭ ކަރަންޓުގެ ހިދުމަތަށް ބިލު ކުރުމުގައި ތަފާތުތަކެއް ގެންގުޅޭ ކަމަށެވެ. އަދި އެ ތަފާތުކުރުންތަކުގެ ސަބަބުން، އަތޮޅުތެރޭގެ ކުދި ވިޔަފާރިތަކަށް ބޮޑެތި ދަތިތަކެއް ކުރިމަތިވާ ކަމަށެވެ.
ތަފްސީލް - ޝިޔާން ވިދާޅުވީ އަތޮޅުތެރޭގައި ކަރަންޓު އަގުބޮޑުވުމުގެ ސަބަބުން މުވައްޒަފުންނަށް މުސާރަ ދީ، ޓެކްސް ދައްކައި ބިލުތައް ދެއްކުމަށް ފަހު ފައިދާ ވާ ވަރަށް ފައިސާ ނުހުންނަ ކަމުގެ ޝަކުވާ ވިޔަފާރިވެރިން ކުރަމުންދާ ކަމަށެވެ. އެކަން ފާހަގަކުރައްވައި އޭނާ ވަނީ އަތޮޅުތެރޭގެ ކަރަންޓުގެ އަގުތަކާއި މާލޭގެ އަގުތައް ހިއްސާކުރައްވާފަ އެވެ.
މާލެ:
-
0-100 ޔުނިޓު - 3.30ރ.
-
101-300 ޔުނިޓު - 3.35ރ.
-
301-500 ޔުނިޓު - 3.65 ރ.
-
501-600 ޔުނިޓު - 4ރ.
-
601-3000 ޔުނިޓު - 4.35 ރ.
-
3001-10،000 ޔުނިޓު - 5.75 ރ.
-
10،000 ޔުނިޓަށް ވުރެ މަތި - 6.65 ރ.
އަތޮޅުތެރެ:
-
0-100 ޔުނިޓު - 3.25 ލާރި
-
101-200 ޔުނިޓު - 3.75 ލާރި
-
201 އިން 300 ޔުނިޓު - 4.75ރ.
-
300 ޔުނިޓަށް ވުރެ މަތިން 6ރ.
ޝިޔާން ވިދާޅުވީ އަތޮޅުތެރެ އާއި މާލެ ސަރަހައްދުގައި ދޭ ކަރަންޓުގެ ހިދުމަތުގެ އަގު އެއް ގޮތް ނުކުރެވޭ ނަމަ، ގެއްލުންވާ ވިޔަފާރިތަކުން ތެކްސް ދެއްކުމުގައި ލުއި ދިނުމަކީ މުހިއްމު ކަމެއް ކަމަށެވެ. އޭނާ ވަނީ ކަމާ ބެހޭ އިދާރާތައް މަޖިލީހުގެ ކޮމިޓިއަށް ހާޒިރުކޮށް އެ މައްސަލަ ހައްލުކުރަން ގޮވާލައްވާފަ އެވެ.