ކުދިން ގަޔާވާ ގޮތަށް އާޓާއި މޫދު ކުޅިވަރު އެއްކޮށްގެން ކޭމްޕެއް

ކުޑަކުދިން ގަޔާވާ ގޮތަށް އާޓް ހަރަކާތްތަކާއި މޫދު ކުޅިވަރު އެއްކޮށްގެން، ސްކޫލް ޗުުއްޓީއާ ދިމާކޮށް، އާޓް ކޭމްޕެއް ހިންގުމަށް ސޯލްޓީ ޕީޕަލް އިން އަންނަނީ ތައްޔާރުވަމުންނެވެ.

ހުޅުމާލޭ ގޮނޑުދޮށް ސަރަހައްދުގައި ބާއްވާ ހަތަރު ދުވަހުގެ 'ސޯލްޓީ އާޓް ކޭމްޕް' ކުރިއަށްދާނީ 23، 25، 28 އަދި 30 ޑިސެމްބަރުގައި ކޮންމެ ދުވަހަކު ވެސް، ހެނދުނު 10 އަކުން ފެށިގެން މެންދުރު 2 ޖަހާ އިރަށެވެ.

ކޮންމެ ހޮނިހިރު ދުވަހެއްގައި ކުޑަކުދިންނަށް ކްލާސްތައް ހިންގަމުން އަންނަ ސޯލްޓީ ޕީޕަލްއިން ބުނި ގޮތުގައި މި ކޭމްޕްގެ މަގުސަދަކީ ކުދިންގެ ހުނަރުވެރިކަން ދައްކާލުމާއި ކުދިން އަމިއްލަ ނަފްސަށް ކުރާ އިތުބާރު އިތުރުކޮށް އަދި ގުދުރަތީ ވެއްޓާ ގުޅުވައިދިނުމެވެ.

ގިނަ ވަގުތު ސްކްރީން ބެލުމުގައި ހޭދަ ކުރުމުގެ ބަދަލުގައި ކުދިންނަށް ބޭރުގައި ކުޅުމުގެ ތެރެއިން ފަންނުވެރިކަން ބިނާކުރުމަށް މި ކޭމްޕްގައި ފުރުސަތު ލިބޭނެ އެވެ.

ރާއްޖޭގައި މިފަދަ ގޮތަކަށް ޗުއްޓީގައި ދަރިވަރުންނަށް ހަަރަކާތްތަކެއް ބާއްވާ ފުރަތަމަ މީހުން ކަމުގައި ސޯލްޓީ ޕީޕަލް ވުން އެކަށީގެންވެ އެވެ. މިއީ ތަފާތު ހިޔާލަކަށް، ތަފާތު ގޮތަކަށް ހިންގާ ހަރަކާތްތަކެކެވެ.

ސޯލްޓީ ޕީޕަލް އިން ބުނިގޮތުގައި ކޭމްޕުގައި ދަރިވަރުން ކުރިއަށްގެންދާ ކޮންމެ ހަރަކާތަކީ ވަކި މަގްސަދެއް ހާސިލް ކުރުމަށް އެކުލަވާލާފައިވާ ހަރަކާތެކެވެ. މި ހަރަކާތްތަކުގެ ސަބަބުން ކުދިންގެ އުފެއްދުންތެރިކަމާއި ވިސްނުން ތަރައްގީވެގެން ދިޔުމުގެ އިތުރުން ޓީމަކާ އެއްކޮށް މަސައްކަތް ކުރަން ދަސްވުމާ އެކު، ކަންކަން ހޯދާބަލައި ދެނެގަތުމުގެ ހުނަރު ދަސްކުރުމަށް މަގުފަހިވާނެ ކަމަށް ވެސް އެ މީހުން ބުނެ އެވެ.

ސޯލްޓީ ޕީޕަލް އިން ބުނި ގޮތުގައި މި ކޭމްޕްގައި ހަތަރު ދުވަހަށް އެއްކޮށް ނުވަތަ ވަކި ދުވަސްތަކުގެ ސެޝަންތަކުގައި ބައިވެރިވެވޭނެ އެވެ. ސެޝަނެއްގައި ބައިވެރިވުމުގެ އަގަކީ 500 ރުފިޔާ އެވެ. ހުރިހާ ދުވަހަކު ބައިވެރިވާ ނަމަ 1500 ރުފިޔާ ދައްކާފައި ހަތަރުވަނަ ދުވަހުގެ ހަރަކާތްތައް ހިލެ އެވެ. އަދި ސިބްލިން ޑިސްކައުންޓް ދެ އެވެ.

މި އަހަރު ކްލާސްތައް ހިންގުމުގައި ކުދިންނާ އެކު ކުރެވުނު ތަޖުރިބާގެ އަލީގައި ސޯލްޓީ ޕީޕަލްއިން ބޭނުންވަނީ ކުދިން މި ބަންދުގައި ސޯލްޓީ ކޭމްޕްގައި ހޭދަ ކުރާ ވަގުތަކީ ހަނދާނުން ފިލައިގެންނުދާފަދަ ވަގުތަކަށް ހެދުމަށެވެ.

މި ޖީލުގެ ކުދިންނަށް ބޭރުގައި ކުޅުމުގެ ފުރުސަތު މި އޮތީ ވަރަށް ބޮޑަށް ހަނިވެފަ އެވެ. ތަޖުރިބާކާރުން ބުނާ ގޮތުގައި ކުދިން ބޭރުގައި ކުޅޭ ނަމަ، ހަރަކާތްތެރިވުމުގެ ސަބަބުން، ޖިސްމާނީ ދުޅަހެޔޮކަން އިތުރުކޮށްދެ އެވެ. އަދި ސްޓްރެސް މަދުވެ ކަންކަމަށް ސަމާލުކަން ދިނުމަށް އިތުރު ހިތްވަރެއް ލިބޭތީ ނަފްސާނީ ދުޅަހެޔޮކަން ވަރުގަދަކޮށްދެ އެވެ. މީގެ އިތުރުން ކުދިންގެ އުފެއްދުންތެރިކަމާއި ވިސްނުން ތަނަވަސްވެ އިޖްތިމާއީ ގުޅުންތައް ދެމެހެއްޓުމަށާއި އެހެން ކުދިންނާ ގުޅިގެން މަސައްކަތް ކުރުމަށް ދަސްވެ އެވެ.

ސޯލްޓީ ޕީޕަލްްގެ ޗުއްޓީ ކޭމްޕުގައި ބައިވެރިވުމުގެ ފުރުސަތު ގޫގުލް ފޯމެއް މެދުވެރިކޮށް މިހާރު ވަނީ ހުޅުވާލާފަ އެވެ.

ކޭމްޕްގެ އެންމެ ފަހު ދުވަސް ހާއްސަކުރަން ހަމަޖެހިފައިވަނީ ކުދިން ކުރާ މަސައްކަތް ދައްކާލައި މައުރަޒު ކުރުމަށެވެ. 

ސޯލްޓީ ޕީޕަލްއިން ބުނިގޮތުގައި ޑީޕްބުލޫ އެކްްސްޓްރީމާ ގުޅިގެން ކުރިއަށް ގެންދާ މި ކޭމްޕްގައި ކުދިން ވޯޓާސްޕޯޓްސްގައި ހަރަކާތްތެރިވެ އުޅޭ އިރު އެކަން ބަލަހައްޓާނީ ސެޓްފިކެޓް ލިބިފައިވާ އިންސްޓްރަކްޓަރުންނެވެ.