ރާއްޖެ ހަމަ ރީތިވެފައި ތަފާތީއޭ، މިއީ އޭގެ ފުރިހަމަ ފޮޓޯއެއް

މޫދުގެ ހޫދު ވެލިގަނޑެވެ. ލޮނުގަނޑު ސާފުކަމުން ހީވަނީ ބިއްލޫރިގަނޑެއް ހެންނެވެ. ފެންނަނީ ބޮޑު މަސްއައިނެއްގެ ތެރެއަށް ހަތަރު މިޔަރު ވަދެގެން އުޅޭ ތަނެވެ. ބޭނުމަކީ އެ މަސްތައް ކެއުމެވެ. މަސްތައް އެ އުޅެނީ މިޔަރުތަކުން ސަލާމަތްވާށެވެ.

އެ މަންޒަރުން އާޝޯހުކޮށްލަ އެވެ. ގުދުރަތީ ރީތިކަމާއި ގުދުރަތީ ދިރުމުގެ ގުޅިލާމެހިފައިވާ ހިތްގައިމުކަމެކެވެ. ބަލާ ފޫހިނުވާ ކަހަލަ ޝައުގުވެރިކަމެއް އުފައްދައިދެ އެވެ.

މިއީ ރާއްޖޭގެ ރީތި ފަޅެއްގެ ފޮޓޯ އެވެ. މި ފޮޓޯ ނެގީ ޕީއެޗްޑީގެ ކިޔެވުން ނިންމައި ދިރާސާގެ މަސައްކަތުގައި އުޅެމުން އަންނަ ޖަރުމަނުގެ ދަރިވަރެއް ކަމަށްވާ އަދި ފޮޓޯގްރާފަރު އެންޖެލާ އަލްބީ އާއި އޭނާއާ އެކު މަސައްކަތްކުރާ ޑްރޯން ޕައިލެޓެއް ކަމަށްވާ އޯގަސްޓް ޕައުލާ އެވެ.

"އިރުއެރުމާ އެކު ނުވަތަ އިރުއޮއްސުމުގެ ކުރިން ރާއްޖޭގެ މޫދުގެ ސާފުކަން ބޮޑުވެ އެވެ. އަޑި ވެސް ރަނގަޅަށް އެނގޭ ވަރުވެ އެވެ،" އަލްބީގެ ބަޔާނެއްގައި ބުންޏެވެ.

"މިއީ މޫދު މިޔަރާއި އޭގެ ކާނާއަކަށް ވާ މަސްތައް ބައްދަލުވެ، އޭގެ ހަރަކާތްތައް ވެސް އެންމެ ރީއްޗަށް ފެންނަ ވަގުތެވެ."

ފޮޓޯތަކަށް އިންސާފުކުރި ފަނޑިޔާރުންގެ ޕެނެލްގައި ހިމެނޭ ހިއު ޓާވޭ ވިދާޅުވި ގޮތުގައި އެ ފޮޓޯއިން ދައްކައިދެނީ ގުދުރަތީ ދިރުންތަކުގެ މެދުގައި އުފެދޭ އަޖައިބެއް ފަދަ ހަރަކާތްތަކެވެ. މިޔަރުގެ ޝިކާރައަކަށް ނުވުމުގެ ގޮތުން މަސްތައް އުޅެގަންނަނީ އެކަތި އަނެކައްޗާ ގުޅި ލާމެހިފައިވާ ތަރުތީބެއްގައި ކަމަށް ވެސް އޭނާ ވިދާޅުވި އެވެ.

ރޯޔަލް ސޮސައިޓީގެ މި ފޮޓޯ މުބާރާތް ހުޅުވާލާފައި އޮންނަނީ އެކި ދާއިރާތަކުގެ ސައިންސްވެރިންގެ ދިރާސާތަކަށެވެ. މުޅި މުބާރާތުގެ އެއްވަނަ ފޮޓޯގެ އިތުރުން މިއީ ދިރުންތަކުގެ ކިބައިން ފެންނަ ސިފަތަކަށް ހާއްސަ ބައިގެ ވެސް އެއްވަނަ އެވެ.

ރާއްޖޭގެ މިކަހަލަ ފޮޓޯތަކަށް ދިވެހިން ފަހުރުވެރިވުން ހައްގެވެ. އަހަރެމެންގެ މި ގައުމުގައި ހުރި މިކަހަލަ އާދަޔާ ހިލާފު ސިފަތައް ގިނަ ދިވެހިންނަށް ނޭނގުނަސް މުޅި ދުނިޔޭގެ ނަޒަރު އެ ހުއްޓާލަނީ އެ ރީތިކަމަށެވެ.