ޖަޕާންގެ ފުޖީ ފަރުބަދައަށް މިވާ ގޮތަކުން ވެސް ބިރުހީވެދާނެ

މީގެ ކުރިން ނަމަ ޖަޕާންގެ މަޝްހޫރު ފަރުބަދަ މައުންޓް ފުޖީ މިހާރު ހުންނާނީ ސުނޯގެ ހުދު ކުލައިން ހެދުން އެޅިފަ އެވެ. ނަމަވެސް އޮކްޓޯބަރު ނިމުނު އިރު އަދިވެސް އެ ފަރުބަދަ އެ ހުރީ ސުނޯގެ އަސަރެއް ނެތި 'ރޮލާ' އެވެ. މީގެ މާނައަކީ ކޮބައި ހެއްޔެވެ؟

ދުނިޔޭގެ މޫސުމީ ބަދަލުތަކާ މެދު ކަންބޮޑުވެ، ބިރުގަންނަ ނަމަ މިއީ މިވަގުތު ފެންނާނެ އެއް ސަބަބެވެ. ފިނި ހިސާބުގަނޑު ހޫނުވެ، ހޫނު ސަރަހައްދުތަކުގެ ހޫނުމިން އެއަށް ވުރެ މަތިވެ، މިހެން ގޮސް ދުނިޔޭގެ މޫސުމީ ތަރުތީބު މިދަނީ އޮޅެމުންނެވެ. ސައިންސްވެރިންގެ ނަޒަރުގައި ކުށްވެރިންނަކީ އިންސާނުންނެވެ.

ޖަޕާންގައި މޫސުމީ މައުލޫމާތު އެއްކުރަން ފެށިތާ މިހާރު 130 އަހަރު ވެއްޖެ އެވެ. އޭގެ ފަހުން އޮކްޓޯބަރު މަހު މައުންޓް ފުޖީއަށް ސްނޯ ނުފައިބައި ދިޔަކަން ރެކޯޑްކުރެވިފައެއް ނުވެ އެވެ.

މައުންޓް ފުޖީއަކީ 3،776 މީޓަރު (12،460 ފޫޓު)ގެ އުސް އަލިފާން ފަރުބަދައެކެވެ. ޖަޕާންގެ އެންމެ އުސް ފަަރުބަދަ ވެސް މެ އެވެ. މި ފަރުބަދަ އެންމެ ފަހުން ގޮވާފައި ވަނީ މީގެ 300 އަހަރު ކުރިންނެވެ.

މިދިއަ އަހަރު މައުންޓް ފުޖީއަށް ފުރަތަމަ ސްނޯ ފައިބަފަން ފެށީ 5 އޮކްޓޯބަރުގަ އެވެ. ޖަޕާންގެ ފިނިހޫނުމިން އާންމުކޮށް ހުންނަ މިންވަރަށް ވުރެ 1.76 ޑިގްރީ ސެލްސިއަސް މައްޗަށް މި އަހަރުގެ ޖޫން އާއި އޮގަސްޓް މަހު ވަނީ ގޮސްފަ އެވެ. އޭގެ ފަހުން ސެޕްޓެމްބަރު ވެސް ފިނިހޫނުމިން ދެމިގެންދިޔައީ ކުރިއަށް ވުރެ މަތިކޮށެވެ.

ވާރޭ ސްނޯއަށް ބަދަލުވަނީ ފިނިހޫނުމިން ގާތްގަނޑަކަށް ޒީރޯ މިންވަރުގައި ހުރެގެންނެވެ. މިދިއަ އޮކްޓޯބަރު މަހު ހޫނިމިން ދަށަށް ދިޔަ ނަމަވެސް އެއީ އާންމުކޮށް އެ މަހު ހުންނަ މިންވަރަށް ވުރެ މަތީ ނިސްބަތެކެވެ. 

ނޮވެމްބަރު ފެށުނު އިރު ވެސް ސްނޯގެ އަސަރެއް މައުންޓް ފުޖީގައި ފެންނަން ނެތުމަކީ 1894ގައި މައުލޫމާތު އެއްކުރަން ފެށި ފަހުން އެ ފަރުބަދަ އެ ހާލަތާ ކުރިމަތިވި ފުރަތަމަ ފަހަރެވެ.

މި ކަހަލަ އެންމެ ތަފާތެއް ފެނުނު ނަމަވެސް އެއީ މޫސުމީ ބަދަލަކަށް މުޅިން ހެދޭނެ ކަމަކަށް، ބައެއް ތަޖުރިބާކާރުން ނުދެކެ އެވެ. އެކަމަކު މީގައި ކަންބޮޑުވާން ޖެހޭ ކަމަކީ ދުނިޔޭގެ މޫސުން ހޫނުވާކަމުގެ އެއް ހެއްކަކަށް ސްނޯއިން މައުންޓް ފުޖީ ފުރެން ޖެހޭ ދުވަސްވަރު އެގޮތަށް އެކަން ނުވެ ދިއުން ވެދާނެ ކަމަށް، ސައިންސްވެރިން ކުރިން ވެސް ލަފާކޮށްފައި ވުމެވެ.