ކޮފީއެއް ގަންނަން ބޭރަށް ނުކުތުމަކީ ވެސް ކުންފުންޏަށް ގެއްލުމެއް

ކޮފީއަކަށް ބޭރަށް ގޮސް ވަގުތުތަކެއް ހޭދަކުރުމެއް ނޫނެވެ. ހަމައެކަނި ކޮފީއެއް ގަންނަން އޮފީހުން ނުކުތުމަކީ ވެސް، ކުންފުންޏަށް ލިބޭ ގެއްލުމެއް ކަމަށް ނިންމީ އެވެ.

މިއީ އޮސްޓްރޭލިޔާގެ މައިނިން ކުންފުންޏެއްގެ ވާހަކަ އެވެ. މިނެރަލް ރިސޯސަސްގެ މެނޭޖިން ޑިރެކްޓަރު ކްރިސް އެލިސަން ވިދާޅުވި ގޮތުގައި އެންމެ ފަހުގެ މާލީ ހިސާބުތަކަށް ބަލާއިރު އޭނާއަށް އޮތީ މުޅި ދުވަހު އޮފީސް ތެރޭގައި މުވައްޒަފުން ހިފެހެއްޓުމެވެ.

"އަހަރެން ބޭނުމެއް ނޫން އިމާރާތުން އެމީހުން ނުކުންނާކަށް،" އެލިސަން ވިދާޅުވި އެވެ.

މިނެރަލް ރިސޯސަސްގެ މައި އޮފީސް ހުންނަނީ ޕާތުގަ އެވެ. މުވައްޒަފުންނަށްޓަކައި ވަރަށް ގިނަ ކަންކަން އެ އިމާރާތުގެ ތެރޭގައި ހުރީ ހަމަޖައްސައިފަ އެވެ. ރެސްޓޯރެންޓެއް ހުރެ އެވެ. ޖިމެއް ހުރެ އެވެ. ނުވަ ސައިކޮލޮޖިސްޓުން އުޅެ އެވެ. އެތަނުގައި ހިންގާ ޑޭކެއާ ސެންޓަރުގައި 105 ކުދިން ގެންގުޅެވެ އެވެ.

"މުވައްޒަފުންގެ ފައިދާއަށް ވަރަށް ގިނަ ކަންކަން ހުރީ ހަމަޖައްސާފައި،" އެލިސަން ވިދާޅުވި އެވެ.

"އެ ހުރިހާ ކަމެއް މިކޮށްދެނީ ކީއްވެ؟ އެއީ އަހަރެން ބޭނުންވަނީ ހެނދުނު އޮފީހަށް އައުމާ އެކު އެ އެންމެން މަސައްކަތުގައި ގެންގުޅެން. އޮފީހުން ބޭރަށް ދާކަށް އަހަރެން ބޭނުމެއް ނޫން."

މިނެރަލް ރިސޯސަސްގެ މުވައްޒަފުން ގޭގައި ތިބިގެން މަސައްކަތް ކުރުމުގެ ފުރުސަތެއް ނުދެ އެވެ.

އޭނާ ވިދާޅުވި ގޮތުގައި އޮފީހުން ބޭރުގައި އުޅުމުން ވިޔަފާރިއަށް ވާ ގެއްލުންތައް އޮތީ މީގެ އަހަރުތަކެއް ކުރިން ވެސް އެނގިފަ އެވެ.

"މި އިންޑަސްޓްރީގައި އަސްލު ނެތް އެގޮތަށް މުވައްޒަފުން ދޫކޮށްލައިގެން އުޅެވޭކަށް. އަހަރެމެންނަކަށް ނުގެންގުޅެވޭނެ ތިން ދުވަހު އޮފީހުގައި މަސައްކަތްކޮށްފައި ފަސް ދުވަހު ނުވަތަ ހަތަރު ދުވަހު މުސާރަ ދޭ ގޮތަށް މުވައްޒަފުންނެއް."

ޑޭކެއާ ސެންޓަރުގައި ކުދިންގެ ކަންކަން ބަލަން ޑޮކްޓަރުންނާއި ނަރުހުން ވެސް ތިބެ އެވެ. އެ ކުދިންނަށް ކާން ދިނުމުގެ ކަންކަން ވެސް ހުންނަނީ ހަމަޖައްސައިފަ އެވެ.

"އެ ހުންނަނީ މުވައްޒަފުން އޮފީހަށް އައިސް ހިތްހަމަޖެހިލައިގެން މަސައްކަތްކުރެވޭ ގޮތަށް ދޭ ހިދުމަތްތައް،" އެލިސަން ވިދާޅުވި އެވެ.

ކޮވިޑް-19އާ ގުޅިގެން ގޭގައި ތިބެގެން މަސައްކަތްކުރެވޭ ގޮތް ގިނަ ކުންފުނިތަކުން ހެދި އެވެ. ނަމަވެސް އެ ބަލިމަޑުކަން ނިމުމާ އެކު މިހާރު އަނެއްކާ ކުރީގެ ގޮތަށް އެނބުރޭ ކުންފުނިތައް އަންނަނީ ގިނަވަމުންނެވެ.

ބޮޑެތި ބައެއް ކުންފުނިތަކުން ދެކޭ ގޮތުގައި އޮފީހުގެ ބަދަލުގައި ގޭގައި މަސައްކަތްކުރުމުން އުފެއްދުންތެރިކަން ދަށަށް ދެ އެވެ. އޮފީސް ތެރޭގައި ލިބޭ އިރުޝާދާއި ގުޅުންތައް  މުވައްޒަފުންނަށް ވަރަށް މުހިންމު ކަމަށް ވެސް، އެފަދަ ކުންފުނިތަކުން ގަބޫލުކުރެ އެވެ.