ރޮނާލްޑޯ މިފަހަރު ލަނޑު ޖެހީ ސޯޝަލް މީޑިއާގައި: ފުރަތަމަ ފަހަރަށް 1 ބިލިއަން ފޮލޯވަރުން

ކްރިސްޓިއާނާ ރޮނާލްޑޯ ލަނޑު ޖަހަނީ ހަމައެކަނި ދަނޑުމަތީގައެއް ނޫނެވެ. އޭނާގެ މަޝްހޫރުކަން ސޯޝަލް މީޑިއާގައި ވެސް އެހާމެ ބޮޑެވެ. މި ފަހަރު ތާރީހު ބަދަލުކޮށްލީ ސޯޝަލް މީޑިއާގެ އެކި ޕްލެޓްފޯމްތަކުގައި ރޮނާލްޑޯ ފޮލޯކުރާ ފަރާތްތަކުގެ އަދަދު 1 ބިލިއަނަށް އަރައިގެންނެވެ.

މިއީ މިހާތަނަށް އެހެން އެއްވެސް މީހަކަށް ނުވަތަ އެއްޗަކަށް ނުވަތަ ތަނަކަށް ވެސް ހޯދުނު ކާމިޔާބީއެއް ނޫނެވެ. އެހެންކަމުން ސައުދީ ލީގުގެ އަލް-ނަސްރުގެ ފޯވަޑަކީ މިހާރު މުޅި ދުނިޔޭގައި އެންމެ ގިނަ ބަޔަކު ބަލަމުން އަންނަ ޝަހުސިއްޔަތެވެ.

އެއް ބިލިއަން ފޮލޯވަރުންގެ އަދަދު މިއައީ ފޭސްބުކް، ޓްވިޓާ، ޓިކްޓޮކް، އިންސްޓަގްރާމް، ޔޫޓިއުބް އަދި ޗައިނާއަށް ހާއްސަ ސޯޝަލް މީޑިއާގެ ދެ ޕްލެޓްފޯމް ކަމަށްވާ ވެއިބޯ އާއި ކްއައިޝޫގެ ތެރެއިންނެވެ.

އެކަމަކު ހަނދާނުގައި ބަހައްޓަންވީ 1 ބިލިއަންގެ މާނައަކީ ވަކިވަކި 1 ބިލިއަން މީހުން ނޫންކަމެވެ. ރޮނާލްޑޯގެ އެ ހުރިހާ އެކައުންޓެއް އެކަކު ފޮލޯކޮށްފާނެ އެވެ. އޭގެ އިތުރުން ފޭކް އެކައުންޓްތައް ވެސް ފްލޯވަރުންގެ ތެރޭގައި ހިމެނިދާނެ އެވެ.

ރޮނާލްޑޯގެ މި މަޝްހޫރުކަމުން އަންގައިދެނީ މިއަދު އާންމުންނާ ހަމައަށް ފޯރަން ސޯޝަލް މީޑިއާގެ ނުފޫޒު ގަދަކަމެވެ.

އެއް ބިލިއަން ފޮލޯވަރުން ހަމަވުމުން 39 އަހަރުގެ ކުޅުންތެރިޔާ ބުނީ އޭނާގެ ދަތުރު އޮތީ ކުރިއަށް ކަމަށެވެ. އެ ދަތުރުގައި އޭނާގެ އާއިލާ އާއި އޭނާގެ ކޮންމެ ފޮލޯވަރެއް ވެސް މުހިންމު ކަމަށް ބުންޏެވެ.