އެއް ބުރުން މާ ގަދަޔަށް ކަސްރަތު ނުކުރޭ؛ މުސްތަގުބަލުގައި ވޭނުގައި އުޅެން ޖެހިދާނެ

"އޭ، ބަނޑެއް ލައިފިއޭ މަގޭ، އަވަހަށް އޭތި ދުއްވާލަންވީ،" މިހެން ކިޔާފައި، އެތައް މަހެއްގެ މަތިން ލިބުނު ޗޮސް މަސްތައް ވިރުވާލަން، ހާއްސަކޮށް ދިވެހި ޒުވާނުންގެ ތެރެއިން، ގިނަ ބަޔަކު މަސައްކަތް ފަށަ އެވެ.

ފަށަނީ 'އިންސްޕަޔާ' ވެގެންނެވެ. ލޯގަނޑު ކުރިމައްޗަށް ހުއްޓޭ އިރު އެ ފެންނަ ޗޮސް ބަނޑު ދެކެ ކުއްލިއަކަށް ފޫހިވެގެންނެވެ. އެތައް ރެއެއްގައި ހަބަނޑަށް ކާލައިގެން، ނިދުމުގައި އެ ތަކެތި ޗޮސްތަކަށް ވެގެން މީހާ ފަލަކޮށްލާފައިވާ މަސްތައް އެއް ބުރުން، އެއް ޖިމް ދަތުރުން، ނުވަތަ އެއް ދުވުމުން ދުއްވާލަން ބޭނުންވެގެންނެވެ.

އިންސްޕަޔާވުން އެންމެ ރަނގަޅެވެ. ނަމަވެސް، ގިނަ ދުވަސްތަކެއް ވަންދެން އެއްވެސް ޒާތެއްގެ ކަސްރަތެއް ނުލިބި ހުރެފައި ދުވަން، ޖިމަށް، މޫދަށް، ނުވަތަ އެހެން ކަމަކަށް ގޮސްގެން ވިޔަސް، ކުއްލިއަކަށް އިންތިހާ ބޮޑަށް ހަށިގަނޑަށް ބާރު އެޅުމުން ދިމާވާ ނުރައްކާތެރި ބަލިތަކާއި ހާލަތުތައް ގިނަ އެވެ. 

ގަވައިދުން ކަސްރަތު ކުރުމުގެ މުހިއްމުކަމާ ބެހޭގޮތުން އިތުރު ވާހަކައެއް ދައްކާކަށް ނުޖެހޭނެ އެވެ. ނަމަވެސް ކަސްރަތު ކުރުމުގައި ގެންގުޅެން ޖެހޭ ވައްޓަފާޅިތަކާއި އުސޫލުތަކަށް ސަމާލުކަން ނުދީ އެކަން ކުރަން ފަށައިފިއްޔާ މުސްތަގުބަލުގައި ގިނަ ގޮންޖެހުންތަކަކާ ކުރިމަތިލާން ޖެހިދާނެ އެވެ.

ހާއްސަކޮށް އަލަށް ކަސްރަތު ކުރަން ފަށަންޏާ ތިމާގެ ޖިސްމާނީ ހާލަތާއި ގާބިލިއްޔަތުކަމަށް ބަލާފައި އެ ހަރަކާތެއް ހެޔޮވަރު މިނެއްގައި ބެހެއްޓުމުގެ ނަތީޖާއަކީ ދިގު މުއްދަތަކަށް އެކަން ކުރަން މަގުފަހިވުމެވެ. ފުރަތަމަ ފަށާ ދުވަހުގައި "ނޯ ޕެއިން ނޯ ގެއިން" ވިސްނުން ބޮލަށް ލައިގެން ހަބޭހަށް މަސްތަކަށް ކެތްނުވާ ވަރަށް ކަސްރަތު ކުރުމުން ކަން ދިމާވަނީ އެ ގެންގުޅޭ ވިސްނުމާ މުޅިން ހިލާފަށެވެ. އެއީ ގިނަ އަނިޔާތަކެއް ތަހައްމަލުކުރަން ޖެހި، ފަހަރެއްގައި ތިމާގެ ފުރާނައަށް ނުރައްކާވާ ވަރުގެ ހާލަތަކާ ކުރިމަތިލާން ޖެހުމެވެ. އެއްވެސް ކަމެއް 'ގެއިން' ނުވެ އެވެ.

ކަސްރަތު ކުރަން މުޅިން އަލަށް ފަށައިގަންނަ އިރު ތާވަލެއް ހެދުމަކީ އެންމެ ބުއްދިވެރި ގޮތެވެ. ކޮންމެ ދުވަހަކު ކަސްރަތު ކުރަން ފަށާ އިރު އެ ދުވަހު ކުރާނެ ކަމަކާއި އެ ދުވަހުގެ އަމާޒުތައް ކަނޑައެޅުމަކީ ވަރަށް ވަގުތު ބޭކާރުވާ ކަމެކެވެ. މީގެ އިތުރުން، ގިނަ ފަހަރު ދުރާލާ ނުރާވާ ކަސްރަތު ކުރާ އިރު ގައިގެ އެއް ބައެއް މާބޮޑަށް މަސައްކަތް ކުރެވި، އެ ބައި އަވަހަށް މަސްގުޅަކައި ކަންކަން ދިމާވުން ގާތެވެ. މިހެންކަމުން، ތިމާގެ ދިރިއުޅުމަށް ވެސް ބުރޫނާރާނެ ގޮތަށް، ތާވަލެއް ހަދައި އެއާ އެއްގޮތަށް އަމަލުކުރުން މުހިއްމެވެ.

ވަރަށް ކަންބޮޑުވާން ޖެހޭ އެއް ކަމަކީ ފިޓްނެސްއާ ބެހޭގޮތުން ދައުރުވާ ދޮގު، ނުވަތަ ފުރިހަމަނޫން މައުލޫޫމާތުތަކެވެ. ހާއްސަކޮށް، ސޯޝަލް މީޑިއާގައި އުޅޭ 'އިންފްލުއެންސާސް'ގެ ފަރާތުން ލިބޭ މައުލޫމާތުތަކަކީ، ދިރާސާތަކުގެ މައްޗަށް ބިނާކުރުމުގެ ބަދަލުގައި، އެމީހުންގެ ހަޔާތާއި ކެއުމާއި އެހެނިހެން ކަންކަމުން ލިބޭ ތަޖުރިބާތަކަށް ބިނާކޮށް އެކުލަވާލާފައި ހުންނަ މައުލޫމާތެވެ. އޭގެ ތެރެއިން އަސާސީ މިންގަނޑެއްގައި ދޭ މައުލޫމާތު ފަހަރެއްގައި ރަނގަޅު ވިޔަސް، ގިނަ ކަންކަމަކީ ވަރަށް މަތިމަތިން ކަން ބަލާލާފައި ދޭ މައުލޫމާތެވެ. ފިޓްނެސް މައުލޫމާތު ހޯދާ އިރު އަބަދުވެސް ކޮލިފައިޑް ޓްރެއިނަރުންގެ ގާތުން، ނުވަަތަ އިންޓަނެޓުން ހޯދާ ނަމަ ސައްހަ މައުލޫމާތު ދޭ ވެބްސައިޓަކުން، ހޯދުން ރަނގަޅެވެ.

އަސްލު މައިގަނޑު މައްސަލައަކީ ކަސްރަތު ނުކުރުމެއް ނޫނެވެ. ނަމަވެސް ކަސްރަތު ކުރާއިރު ގޯސްކޮށް ކުރުމެވެ. މާ އަވަސްއަވަަހަށް ހިކެން، ނުވަތަ ފިޓުވާން އުޅުމަކީ ތިމާ ހާސިލް ކުރަން އުޅޭ ކަންކަމާ ދުރަށް ގެންދާނެ، ފައިދާއެއް ނެތް އުކުޅެކެވެ. 

ވަކިން ހާއްސަކޮށް ހަށިގަނޑަކީ ވީހާވެސް ހަމަޖެހިގެން ތަރައްގީކޮށް، ވަރުގަދަކުރަން ޖެހޭ އެއްޗެކެވެ. ސަކަރާތްކޮށް ކުރެވޭ ކުޑަ ކަމަކުން ވެސް ބޮޑެތި ގެއްލުންތަކެއް ތަހައްމަލު ކުރަން ޖެހިދާނެ އެވެ.