ޖެނިފާ ލޮޕޭޒް އާއި ބެން އެފްލެކް އެންމެ ފަހުން ކައިވެނިކޮށްފި

ޖެނިފާ ލޮޕޭޒް އާއި ފިލްމީ ތަރި އަދި ޑައިރެކްޓަރު ބެން އެފްލެކް އެންމެ ފަހުން ކައިވެނިކޮށްފި އެވެ.

ދެ ތަރިންގެ ކައިވެންޏާ ހަމައަށް މިދިއައީ އެޕްރީލް މަހު އެންގޭޖްވުމަށް ފަހު އެވެ. އޭގެ ކުރިން 2002 ގައި ވެސް ޖެނިފާ އާއި ބެން އެންގޭޖުވި އެވެ. އެކަމަކު ކައިވެންޏާ ހަމައަށް ނުގޮސް ދެ އަހަރު ފަހުން އެންގޭޖުމެންޓް ރޫޅުނީ އެވެ.

އޭގެ 18 އަހަރު ފަހުން އަލުން ދެ މީހުން ދިމާވެ ރައްޓެހިވެގެން އުޅޭތާ މަސްތަކެއް ފަހުން ކައިވެނިކުރީ ލަސް ވޭގަސްގަ އެވެ. ޖެނިފާ ކައިވެނިކުރި ހަބަރު އޭނާގެ ފޭނުންނާ ހިއްސާކުރީ އޭނާގެ ނިއުސްލެޓާ މެދުވެރިކޮށެވެ.

އޭނާ ބުނީ 20 އަހަރަށް ފަހު އެންމެ ފަހުން ކައިވެނި ކުރެވިއްޖެ ކަމަށާއި ލޯބި ހާސިލްވީ ކެތްތެރިކަމާ އެކު ކުރި މަސައްކަތުން ކަމަށެވެ. އަދި އެއީ އުފާވެރި ތަފާތު އިހުސާސެއް ކަމަށް ވެސް އޭނާ ބުންޏެވެ.

މި ދެ މީހުން ވެސް ކުރިން ވަނީ އެހެން މީހުންނާ ކައިވެނިކޮށްފަ އެވެ. އެގޮތުން މިއީ ޖެނިފާ، 52،ގެ ހަތަރު ވަނަ ކައިވެންޏެވެ. ބެން، 49، ގެ ދެވަނަ ކައިވެންޏެވެ.

ޖެނިފާގެ ކުރީގެ ބައިވެރިޔާ، ލަވަކިޔުންތެރިޔާ މާކް އެންތޮނީއަށް ދެ ކުދިން ލިބިފައިވާއިރު ބެން ކުރިން ކުރި ކައިވެންޏަށް ތިން ކުދިން ލިބިފައިވެ އެވެ.