ރަވީނާ ކުރިން އުޅުނީ ސެޓުތަކުގައި މޮޕު އަޅަން

ބޮލީވުޑަށް ތައާރަފުވުމަށް ކުރީ އުނދަގޫ ދަތުރެއް ކަމަށާއި ފިލްމު ސެޓުތަކުގެ ތަޅުމުގައި މޮޕު އަޅައި ސާފުކުރުމުގެ މަސައްކަތް ވެސް ކުރަން ޖެހުނު ކަމަށް ރަވީނާ ޓަންޑަން ބުނެފި އެވެ.

ފިލްމު 'ޕައްތަރު ކޭ ޕޫލް' އިން 1991 ވަނަ އަހަރު ބޮލީވުޑަށް ތައާރަފުވި ރަވީނާ އަކީ ރަވީ ޓަންޑަންގެ ދަރިއެކެވެ. ރަވީ އަކީ ބޮލީވުޑްގެ ޕްރޮޑިއުސަރެކެވެ.

ރަވީނާ ބުނީ ގްރޭޑު 10 ނިންމާލި ގޮތަށް ފިލްމުތަކުގައި ކެމެރާގެ ފުރަގަހުން މަސައްކަތް ކުރަން ފެށި ކަމަށެވެ. އޭރު ވެސް ކެމެރާގެ ކުރިމަތިން މަސައްކަތް ކުރަން މީހުން ހިތްވަރު ދިންކަން ފާހަގަކޮށް ރަވީނާ ބުނީ އެންމެ ފުރަތަމަ އެކްޓުކޮށް، ކެމެރާގެ ކުރިމައްޗަށް އަރަން އެއްވެސް ޝައުގެއް ނެތް ކަމަށެވެ.

"ޕްރާލަދް ކައްކަރާ އެކު އޭނާގެ އެސިސްޓެންޓެއްގެ ގޮތަށް ފުރަތަމަ މަސައްކަތް ފެށީ. އޭރު މޮޑެލްއެއް ލަސްވެގެން އުޅުނަސް ޕްރާލަދު ސާ ގޮވާލާނެ ރަވީނާ ކޮބާހޭ. ދެން ބުނާނެ މޭކަޕް ކޮށްގެން ކެމެރާ ކުރިމަތީ ޕޯޒް ކުރަން،" ރަވީނާ ބުންޏެވެ.

އޭނާ ބުނީ މޮޑެލް ކުރަން ފެށީ ޕްރާލަދް އަށް ހިލޭ މޮޑެލް ކޮށްދޭން ބޭނުން ނުވާތީ ކަމަށެވެ. އޭގެ ފަހުން މަޑުމަޑުން ފިލްމުތަކުން ޖާގަ ވެސް ލިބެން ފެށީ ކަމަށް ބުންޏެވެ.

'ދިލްވާލޭ' އާއި 'މޮހްރާ' ފަދަ ފިލްމުތަކުން ފެނިގެން ދިޔަ ތަރި އެންމެ ފަހުން ފެނުނީ 'ކޭޖީއެފް ޗެޕްޓާ: 2' އިންނެވެ.