ސަނީ
ކުއްޖަކު އެޑޮޕްޓުކުރީ މަޝްހޫރުވާށޭ ބުނުމުން ސަނީ ރުޅިއައިސްފި
އޭނާ ދަރިއަކު އެޑޮޕްޓު ކުރީ މަޝްހޫރުވާން ކަމަށް ބުނެ މީހުން ފާޑުކިޔުމުން ސަނީ ލިއޯން ރުޅިގަަދަވެއްޖެ އެވެ.
ސަނީ އާއި އޭނާގެ ފިރިމީހާ ޑެނިއަލް، ކުއްޖަކު އެޑޮޕްޓު ކުރީ 2017 ވަނަ އަހަރު އެވެ. އެ ދެ މީހުން އެޑޮޕްޓުކުރި ދަރިފުޅު، ނިޝާއާ މެދު އެމީހުން ކަންތައް ކުރަނީ ރަނގަޅަށް ނޫން ކަމަށް ބުނެ ބައެއް މީހުން ފާޑުކިޔަ އެވެ. އެ ދަރިފުޅާއި އެމީހުންގެ އަމިއްލަ ދަރިންނާ ތަފާތު ކުރާ ކަމަށާއި ނިޝާ އަކީ ޕަބްލިސިޓީ އަށް އެމީހުން އެޑޮޕްޓުކުރި ކުއްޖެއް ކަމަށް ވެސް ބައެއް މީހުން ބުނެ އެވެ.
މިފަހުން އާންމުވި ވީޑިއޯއެއްގައި ސަނީ އޭނާގެ ތިން ކުދިންނާ އެކު ސިޑިއަކުން ފައިބާ ތަން ފެންނައިރު، ދެ ފިރިހެން ކުދިންގެ އަތުގައި ހިފައިގެން އޭނާ ހުރެ އެވެ. އެކަމަކު ނިޝާ ސިޑިން ފައިބައިގެން ދަނީ އެކަންޏެވެ. ސަނީ އަށް ކުރިމަތިވާ ފާޑުކިޔުންތައް އިތުރުވީ މި ވީޑިއޯ އާންމުވި ފަހުންނެވެ.
އެ ފާޑުކިޔުންތަކަށް ރައްދުދީ ސަނީ ބުނީ އޭނާ ދަރިންނާ މެދު ކަންތައް ކުރާ ގޮތް ފޮޓޯ އަކުން ނުވަތަ ވީޑިއޯ އަކުން ނޭނގޭނެ ކަމަށެވެ. އޭނާގެ ދިރިއުޅުމުގެ ކަންތައް އެނގޭނީ އޭނާ އަށް ކަމަށާއި އޭނާގެ ދިރިއުޅުމާ ގުޅުން ނެތް ބަޔަކަށް އެ ދިރިއުޅުމުގައި ހިނގާ ކަންތައް ނޭނގޭނެ ކަމަށް ވެސް ސަނީ ބުންޏެވެ. އަދި އެގޮތަށް ވާހަކަ ދެއްކުމަކީ ކުޑަކުދިން އުޅޭ ގޮތަށް އުޅުން ކަމަށް ދޭހަވާ ގޮތަށް ސަނީ ވަނީ ވާހަކަ ދައްކައިފަ އެވެ.
އެ ފާޑުކިޔުންތަކަށް ރައްދުދީ ސަނީގެ ފިރިމީހާ ޑެނިއަލް ވެސް ބުނީ ނިޝާއަކީ އެ ގޭގެ ޕްރިންސަސް ކަމަށާއި މީހުން ދެކޭ ގޮތާ މެދު ހައިރާންވާ ކަމަށެވެ.