ވާހަކަ: މިތުރާ މަގޭ - ފުރަތަމަ ބައި

ޖަހައިލި ގުގުރީގެ އަޑުން މުޅި ގެ ވެސް ގުޑާލި ކަހަލަ އެވެ. ސިއްސައިގެން ގޮސް ހޫރައިންއަށް ހޭލެވިއްޖެ އެވެ. ލޯ ހުޅުވައިލިއިރު އޮވެވުނީ ލިޔާ މޭޒުމަތީ ހުޅުވާފައިވާ ފޮތްތަކުގެ މަތީ ބޯއަޅައިގެންނެވެ. ޓޭބަލް ލައިޓުގެ އަލި ފިޔަވާ އިތުރު އަލިކަމެއް ކޮޓަރިތެރެއަކު ނުވެ އެވެ. ބޯކޮށް ވެހެމުންދިޔަ ވާރޭގެ އަޑުން ރޭގެ ހިމޭންކަންވަނީ ނަގާލެވިފައެވެ. އަވަސް އަވަހަށް ވިދާލުމާ އެކު ދެވަނަ ގުގުރި ވެސް ޖަހައިފިއެވެ. އެކަމަކު ކުރިއަށްވުރެ މަޑުންނެވެ.

ތެދުވެ އިށީނުމުން ކަރުގައި ފާޑަކަށް ރިއްސައިލިހެން ހީވި އެވެ. ބޯއަޅައިގެން އޮވެވުނު ގޮތުން ކަންނޭނގެ އެވެ. ކަނދުރާމަތީ އަތް އުނގުޅާލައިފައި އަވަހަށް ހޯދައިލީ މޭޒުމަތީ ހުންނަ ސޯނާ ގަޑި އެވެ. ދިއްލާލިއިރު ބާރަ ޖަހަން ދަނީ އެވެ. ތެދުވެ ފޮތްތައް ލައްޕާ ބަރިއަކަށް އަރުވާފައި ތަނަކަށް ދާން ލަސްވެފައި ހުރި ކުއްޖަކު ފަދައިން ކޮޓަރިން ނުކުންނަން ދުއްވައިގެންފި އެވެ. ލައިގެން ހުރި ނިދާ ހެދުން މަތިން އަޅައިލީ ކުޑަ ބުރުގާއެކެވެ. އެކަމަކު ދޮރާ ހަމައިން މަޑުޖެހިލާފައި އެނބުރި ބަލައިލި އެވެ. ކޮޓަރީގައި ހުރި ދެ އެނދު ތެރެއިން އެއް އެނދުގައި ބިތްދޮށަށް އެނބުރި އޮތް ކުއްޖާ އޮތީ ގަދަ ނިދީގަ އެވެ. އެހާ ވިއްސާރަ އާއި ގުގުރުމުގައި ނިދަން އޮވެވޭނީ ނަސީބުވެރިއަކަށެވެ.

ފަނޑުއަލީގައި އޮތް ސިޓިންރޫމުން މީހެއްގެ ހިލަމެއްނުވެ އެވެ. ހޫރައިން އިތުރަށް ޔަގީންކުރުމަށްޓަކައި ބަލަން ހުރެލާފައި ނުކުމެއްޖެއެވެ. އޭނަ މަޑުމަޑުން ހިނގާލައިފައި ގޮސް ބަދިގެއަށް ވަދެ އުނދުންމަތީ ހުރި ތެލިތަކުގެ މަތި ނަގައިގެން ބަލައިފި އެވެ. ހޫނުކޮށްލާފައި، ތަށިތައް ގެނެސް ކާއެއްޗެހި އަޅައި މޭޒުމަތި ތައްޔާރުކުރުމަށް ފަހު މަތި އަޅައިފި އެވެ. ފަހު ފަހަރަށް މޭޒުމައްޗަށް ބަލައިލާފައި ކުރެވުނު މަސައްކަތާ މެދު ހިތްހަމަޖެހިގެން އެނބުރި ގޮސް ނިދަން އޮށޯވެއްޖެ އެވެ.

އޭގެ ގާތްގަނޑަކަށް ފަނަރަ ވަރަކަށް މިނިޓް ފަހުން ގޭގެ ދޮރު ހުޅުވާލައިފައި ފިރިހެނަކު ވަދެއްޖެ އެވެ. ތެމިފޯވެފައި ހުރި އެ މީހާ ބަރު ފިޔަވަޅުތަކާ އެކު ފުރަތަމަ ގޮސް ވަނީ ގޭގެ "ލޯންޑްރީ" ބަޔަށެވެ. ދޮރު ލައްޕާލުމަށް ފަހު، އެތެރެއަށް ފެން ނުވަންނަ ގޮތަށް ހުރި ލެދަ މެޓީރިއަލްގެ ދަބަސް މެޝިންމަތީ ބޭއްވި އެވެ. ގައިގައި އޮތް ގަމީހުގެ ގޮށްތައް ނައްޓާ ނިމުނުއިރު އެދިމާ ތިރީގައި ފެންގަނޑެއް ހެދިއްޖެ އެވެ. އުނުގައި ތުވާއްޔެއް އޮޅާލުމަށް ފަހު ތެތް އެއްޗެހި ބާލައި މެޝިނަށްލައިފައި ކައިރިވީ އަންނައުނު ހިއްކަން އަޅާފައި ހުރި ހަރެއްގެ ކައިރިއަށެވެ. ދެން ސްވެޓްޕޭންޓެއް ނަގައި ލައިގެން މެޝިން ޖައްސާފައި ނުކުމެއްޖެ އެވެ.

ހުސް ފަޔާ ހިނގާލައިފައި ގޮސް ބަދިގެ ބޮކި ދިއްލާލުމާ އެކު މޭޒުމަތީ ކާން ހަދާފައި ހުއްޓާ ފެނުނެވެ. ޒުވާނާ ގޮސް ފްރިޖުން ފެންފުޅިއެއް ނަގައިގެން އައިސް އިށީނެވެ. ހުސް ތަށްޓަކަށް ފެން އަޅައި ފުރާލުމަށް ފަހު ކައިރީ ބަހައްޓައިގެން އެކަނި އިނދެ ކާން ފަށައިފި އެވެ.

***

ހޫރައިންއަށް ހޭލެވުނީ ފަތިހު ގަޑި ސޯނާވަނިކޮށެވެ. ޖެހިގެން އޮތް އެނދުގައި ރީޝް އޮވެފައި ނުރުހުންވެފައިވާ އަޑަކުން ސޯނާ އޮފްކުރަން އެދުނުއިރު ހޫރައިން އޮތީ ގަޑި އަތަށް ނަގައިގެންނެވެ. އޭނާ ސޯނާ އޮފްކޮށްލުމާ އެކު ރީޝް އެނބުރުނީ އަނެއްކާވެސް ބިތްދޮށަށެވެ. ހޫރައިން ވެސް ހުރީ އަލުން އޮށޯވެ ނިދަން ބޭނުންވެފައެވެ. ގައިމަތީ އޮތް ރަޖާ އެއްފަރާތްކޮށްލެވުނީ ވެސް ނިކަން ހިތްވަރުންނެވެ.

ރޭ ވެހުނު ވާރޭގެ ސަބަބުން މާހައުލު އަދިވެސް އޮތީ ފިނިކޮށެވެ. ފާހާނާއަށް ވަދެ އިސްކުރު ދޫކޮށްލިހާއިރުން ދެ އަތުން ހީބިހި ނަގައިގަތެވެ. ނުވިތާކަށް ކިނބިހި އެޅެން ފެށި އެވެ. އަވަސް އަވަސްކޮށްލައިގެން އޭނާ ނުކުމެ ނަމާދުކޮށްލުމަށް ފަހު ފޮތްތައް ހުޅުވާލައިގެން ލިޔާމޭޒު ކައިރީ އިށީނދެ ބޮލަށް އެއްޗެއް ވަދޭތޯ ކިޔަން ފަށައިފި އެވެ. އެހެން އިންއިރު ވެސް އިރުއިރުކޮޅާ އާފުރެ އެވެ. އެކަމަކު ދެން އެނދުގައި އޮށޯވެއްޖެ ނަމަ ދުވަސްދިޔައީ އެވެ. އަނެއްކޮޅުން އޭނާ ނުހޭލައިފި ނަމަ ރީޝް ވެސް ސުކޫލަށް ދާކަށް ނުތެދުވާނެ އެވެ. މިހާރު ވެސް ގިނައީ ނިދަން ބޭނުންވެގެން ބޮލެއްގައި ރިއްސައޭ ކިޔައިގެން ބަހަނާ ދައްކާ ދުވަހެވެ.

ދުނިޔެމަތި އަލިވާހާއިރު ކޮށްފައި ހޫރައިން ބަދިގެއަށް ދިޔައިރު އަދި އެކަކު ވެސް ހޭލާ އުޅޭކަމުގެ ހިލަމެއް ނުވެ އެވެ. ރޭގައި އޭނާ ނިދަމުން މޭޒުމަތީ އެތުރި ހުރިހާ ތަށްޓެއް ހުރީ ކާއެއްޗެހި ހުސްކޮށްފައި ގެންގޮސް ސިންކުގައި ބަހައްޓާފަ އެވެ. އޭނަ ދެ އަތް އޮޅާލައިފައި ގޮސް އިސްކުރު ދޫކޮށްލުމަށް ފަހު ތަށި ދޮންނަން ފެށި އެވެ.

ހެނދުނު ހައެއް ޖެހުމާ އެކު ރޯޒް ކޮޓެޖް ހޭލައިފި އެވެ. ދޮރުތައް ހުޅުވާ ލެއްޕުމުގެ އަޑާއި ގޭގެ މެމްބަރުން ހޭލަމޭލައަށް އުޅޭން ފެށި އަޑުން އިހު އޮތް މަރު ފަދަ ހިމޭންކަން ނެތިގެން ހިނގައްޖެ އެވެ. ބަދިގޭގައި އެކި މީހުންނަށް ހާއްސަކޮށް އެ މީހެއްގެ ރަހައާ ގުޅުވައިގެން ކާތަކެތި ތައްޔާރުކުރެވެމުން ދާން ފަށައިފި އެވެ. ކާއެއްޗެހީގެ ވަހުން ބަދިގެ އާއި ޑައިނިން ރޫމް ފުރާލައިފި އެވެ. ބިސްގަނޑު އެޅޭ އަޑާއި އޭގެ ވަހެވެ. ކޮފީގެ ތާޒާ ވަހާއި ފިހެވެމުންދާ ރޮށީގެ ވަހެވެ. އޮފީސްތަކަށް ދާ މީހުންނާއި ސުކޫލަށް ދާ ކުދިން ތައްޔާރުވެގެން ބައިބަޔަށް ނުކުންނަން ފަށައިފި އެވެ. ޑައިނިން ހޯލުގައި ބަހައްޓާފައިވާ ކުކުޅުބިސް ބުރަށްވާ ދިގު މޭޒުގެ ވަށައިގެން ބެހެއްޓިފައިވާ ގޮނޑިތަކުން ބައެއް ފުރިފައި ހުރެފައި އިރުކޮޅަކުން ހުސްވާތަން ފެނެ އެވެ.

އެންމެ ފުރަތަމަ ނުކުތް ބައިގައި ހޫރައިން އާއި އޭނާގެ "ރޫމް މޭޓް" ރީޝް ހިމެނެ އެވެ. ޔުނީފޯމްގައި ދެ ކުދިން ނުކުމެ ދަބަހާ އެކު ގޮނޑިތަކުގައި ޖައްސާލުމާއެކުހެން ކައްކާ މީހާ ނާސްތާ ގެނެސްދީފި އެވެ. ރީޝްއަށް ޕާނާއި ބަޓަރެވެ. ތަށީގެ އެއްފަޅީގައި ބިސްގަނޑެއް ވެސް އޮތެވެ. ހޫރައިންގެ ތަށީގައި މަސްހުންޏާއި ރޮށްޓެވެ. ދެ ކުދިން ވެސް ބޯން ގެނެސްފައި ހުރީ ހޫނު މައިލޯ އެވެ.

"ތެންކިއު ދައްތާ...." ހޫރައިންގެ އާދައިގެ މަތިން ޝުކުރު އަދާކުރި އެވެ.

އެއާއެކު އަޒްހަރީ ހިނިތުންވެލާފައި މަސައްކަތަށް އެނބުރުނެވެ. ރީޝް ކާން އިންއިރު ވެސް ބޮލުގައި ކަންތައްގަނޑެއް ރާވަނީ ކަހަލަ އެވެ. ކާއެއްޗެއްސަށްވުރެ ގިނައިން ނަޒަރު ހުންނަނީ ކުޑަދޮރަށެވެ. ރޭ ވެހުނު ވާރޭ ފަތިހު ހުއްޓާލައިފައި ވިއަސް ކުޑަދޮރުތަކުގެ ބިއްލޫރިތަކުގައި އަދިވެސް ފެންތިކިތައް ހަރުލާފައި ހުއްޓެވެ.

ރީޝްއަކީ އާއިލާގެ އެންމެ ދޮށީ ދަރިފުޅު ރިޒްވާން އާއި އޭނާގެ އަންހެނުން ހައުލަތުގެ ތިބި ދެ ކުދިންގެ ތެރެއިން އަންހެން ދަރި އެވެ. ހޫރައިންގެ މަންމަ ނިޔާވީ ހޫރައިންގެ އުމުރުން ހަ އަހަރުގަ އެވެ. ހަތަރު އަހަރު ކުރިން ހޫރައިންގެ ބައްޕަ ދެވަނަ ކައިވެންޏެއްކޮށްގެން ރަށުން ބޭރަށް ބަދަލުވީ ފަހުން ހޫރައިން އައިސް އެގޭގައި އިންނަނީ ވެސް އެދެމަފިރީންގެ ބެލެނިވެރިކަމުގެ ދަށުގަ އެވެ. އަދި އެ މީހުންގެ އަންހެންދަރިފުޅާއި އޭނާއާ ކުޑަ ވެސް ތަފާތެއް ނުކުރެ އެވެ. ހޫރައިން ބަސްއަހާތީ އެހާ ލޯބިވެ އެވެ. އޭނާގެ ރަނގަޅު އާދަތަކުގެ އަސަރު ރީޝްއަށް ވެސް ކޮންމެވެސް ދުވަހަކުން ކުރާނެ ކަމުގައި އުންމީދުކުރެ އެވެ.

ދެ ކުދިން ނިމެން އުޅެނިކޮށް ހައުލަތު ނިކަން ހަރުކޮށްލާފައި އައިސް ވަދެއްޖެ އެވެ. ހޫރައިން އެއިރު ފެންތަށި ހުސްކޮށްލާފައި ތެދުވަނީ އެވެ. ރީޝް އިނީ މައިލޯތަށީގައި ތުންޖަހައިގެންނެވެ. މަންމަ އަވަސް ކުރާށޭ ކިޔައި ފަށައިގަތުމުން މައިލޯތަށި އެ ހުރި ގޮތަށް ބަހައްޓާފައި ފެންކޯވަރެއް ދަމާލުމަށް ފަހު ޓިޝޫއެއް ނަގައި ތުން ފުހެމުން ހޫރައިންގެ ފަހަތުން ނައްޓާލައިފި އެވެ.

ހައުލަތު ތަށިމަތި ތައްޔާރުކޮށްލިއިރަށް ރިޒްވާން އައިސް ގޮނޑި ދަމާލައިފައި އިށީނދެއްޖެ އެވެ. އަތްދިގު ނޫ ގަމީހާއި މުށި ފަޓްލޫނުގައި ޓައީ ވެސް އަޅާލައިފައި ބޫޓަށް އަރާފައި ހުރިއިރު ޝަހުސިއްޔަތު ވަރުގަދަކަން ހާމަވެ އެވެ. ކުރުކޮށް ކޮށާލާފައިވާ އިސްތަށިގަނޑުގެ ދެ އަރިމަތިން ކުޑަކުޑަކޮށް ނުރަ ފައުޅުވާން ހުރުމުން އެ ޝަހުސިއްޔަތަށް އިތުރުކަމެއް ގެނެސްދެ އެވެ. ރީޝްގެ އެ ހުންނަ ކަޅުކަން ގަދަ ދެ ލޯ ރިޒްވާންގެ މޫނުން ހުރީ ފެންނާށެވެ. ތަފާތަކީ އެ ދެ ލޮލުގެ އަރިމަތިން ހަމުގައި ޖެހިފައިވާ ރޫތައް ފައުޅުވާން ހުރިކަމެވެ. އަދި ލޮލުގެ ބޮނޑިއަށް ވެސް ދޫޖެހިފައިވާ ކަމެވެ.

ބައްޕަގެ ދެ ލޯ ފިޔަވައި އެހެން ހުރިހާ ސިފަތަކެއް ރީޝްއަށް ވާރުތަވެފައިވަނީ މަންމަގެ ކިބައިންނެވެ. އެ އަލި ހަންގަނޑާއި ފަން އިސްތަށިގަނޑެވެ. ތުނި ތުންފަތާއި ބުމަ އެވެ. ހިނގާ ހިނގުމާއި ހިނިތުންވުމެވެ. ހައުލަތުގެ ޒުވާންއިރުގެ ފޮޓޯތަކާއި މިހާރު ރީޝް ހުންނަ ސިފައާ ތަފާތެއް ނުހުރެ އެވެ.

ރިޒްވާން ފަދައިން ހައުލަތު ވެސް އިނީ އޮފީހަށް ދާން ތައްޔާރުވެގެންނެވެ. އަތްދިގު ފިޔާތޮށި ގަމީސްމަތިކޮޅާ އެކު ފުޅާ ހުދު ބެލްސެއް ލައިގެންނެވެ. އުސް ފައިވާނަކަށް އަރާފައި ހުރިއިރު އަތުގައި އެޕަލް ގަޑި އާއި ކެވެލިގަނޑެއްގެ އިތުރުން ކަށި އިނގިއްޔާއި މެދު އިނގިލީގައި ރަނުގެ އަނގޮޓިތައް އޮތެވެ. ބޯ އޮމާންކޮށްލާފައި ފަރިގޮތަކަށް ހުޅިޖަހާފައި އޮތްއިރު ތުންފަތުގައި ރަތް ލިޕްސްޓިކެވެ. ކޮނޑުގައި އަތްދަބަހެވެ.

ރިޒްވާންގެ އިތުރުން އާއިލާގައި ދެން ތިބެނީ އަދި އެއް ފިރިހެނަކާއި ދެ އަންހެންކުދިންނެވެ. އެންމެ ހަގަށް ހުންނަ ނޫނީ ދެން އުޅޭ ދެ މީހުން ވެސް މީހުންނާ އިނދެގެން ދަރިން ތިބެ އެވެ. އަދި އެންމެން ވެސް ދިރިއުޅެނީ ރޯޒް ކޮޓެޖްގަ އެވެ. އެއިން ކޮންމެ ބަޔަކު ހަވާލުވެގެން ގެނެސްގެން ގެންގުޅޭ ނެނީއިން އުޅެ އެވެ. ހުރިހާ އެންމެންނަކީ ވެސް ވަޒީފާތަކަށް ދާ މީހުންނަށް ވާތީވެ ކެއުމުގެ ހަރަދަށް ދޭ ފައިސާގެ ކަންތައް ބަލަހައްޓައި ކައްކާ މީހާ ލައްވާ ތިން އިރުގެ ކޮއްތު ތައްޔާރުކުރުވުމަކީ ސަކީނާގެ ޒިންމާއެކެވެ. އެހެނެއް ކަމަކު ހުރިހާ ދަރިން އެއް ގަޑިއެއްގައި ކާމޭޒުމަތިން ފެނުމަކީ މަދު ފަހަރަކު ނޫނީ ނުފެންނާނެ މަންޒަރެކެވެ. އީދު ދުވަހެއް ނޫނީ ކޮންމެވެސް އެފަދަ ހާއްސަ މުނާސަބަތަކާ ގުޅުވައިގެން ފިޔަވަ އެވެ. އަދި ކުދިވެރިންނަށް ކާންދީ ހަދާނީ މުޅިން ވެސް ނެނީން އައިސް އެ ކުދިންގެ ކާތަކެތި އެ ކުއްޖަކު އުޅޭ ކޮޓަރިއަކަށް ގެންގޮސްގެންނެވެ. ދެބެންގެ ދަރިންނަށް ވިއަސް އެއް ކުއްޖަކު އަނެއް ކުއްޖަކާ އޮންނަންވީ އާއިލީ ގުޅުމެއް ވެސް މާ ބޮޑަކަށް ނޯވެ އެވެ. ކުދިން ހިފާތީއޭ ކިޔައިގެން ދެ ކުއްޖަކު އެއްތަންވިޔަކަ ނުދެއެވެ. އޮފީހުން އަތުވެއްޖެ ނަމަ ބޮޑެތި މީހުން ވެސް ވަގުތު ހޭދަކުރާނީ ގިނަ ފަހަރު އެ ބައެއްގެ އަމިއްލަ ކޮޓަރިތަކުގަ އެވެ.

"ރިޒްވާން ހަނދާންކޮށް މަންމަ ހޮސްޕިޓަލަށް ގެންދާ ގަޑިއަށް އަންނަންވާނެ،" ޕާންފޮތި ހުސްކޮށްލާފައި ކޮފީތަށި އަތަށް ނަގަމުން ހައުލަތު ހަނދާންކޮށްދިނެވެ.

"އަހަރެން ހަނދާން އެބަހުރި،" ރިޒްވާން ކުޑަކޮށް ހިތްހަމަނުޖެހިފައި ރައްދުދިނެވެ.

ހައުލަތު އެ މޫނުގެ ކުލަވަރު ފޮރުވަންވެގެން ތުންޖެހީ ކޮފީ ތަށީގަ އެވެ. ރިޒްވާންގެ ގޮތް އެންމެ ރަނގަޅަށް އެނގޭނީ އޭނާއަށް ނޫން ހެއްޔެވެ؟ އެއްފަހަރު ވެސް އަލުން އެޕޮއިންޓްމެންޓް ހައްދައިގެން ނޫން ގޮތަކަށް ރިޒްވާންއަށް ގޭމީހަކަށް ކަމެއް ކޮށްދެވޭ ކަމަކަށް ނުވާނެ އެވެ. ކަމެއް ގޯސްވާ ވަގުތު އިލްޒާމު އަޅުވާނެ މީހަކު ފެނުމުން ނިމުނީ އެވެ.

"ކީއްވާނީ އެއްފަހަރު ވެސް ހަމްރާއުއާ އެކު މަންމަ ފޮނުވިއްޔާ؟ އެއީއެއްނު މަންމަގެ ރަންދަރިއަކީ ވެސް،" ދެ ފިކުރެއްގައި އިނދެލާފައި ހައުލަތު ވާހަކަދެއްކި އެވެ.

އެވަގުތު ރިޒްވާން ބަލައިލި ގޮތުން އެކަނި ވެސް އެ ބުނެވުނީ ބުނަންވާ ވަރު ވާހަކައެއް ނޫންކަން ހައުލަތަށް އެނގިއްޖެ އެވެ. ވަގުތުން އޭނާ ނިންމީ އިތުރަށް އެ ވާހަކަ ކުރިއަށް ނުގެންދިއުމަށެވެ.

ދެ މީހުން ނާސްތާކޮށްގެން ތެދުވި ގަޑިއަށް ސަކީނާ އައިސް ވަނެވެ. ސަކީނާ ވެސް ހަނދާންކޮށްދިނީ ހައުލަތު ވެސް ބުނި ވާހަކަ އެވެ. ރިޒްވާން ފާޑަކަށް ހޫމް އަޅުވާލައިފައި ކުރީގައި ނުކުންނަން ދިޔަ އެވެ. ހައުލަތު މައިދައިތަގެ ކޮނޑުގައި ފިރުމާލައިފައި އޭނާ ހަނދާންކޮށްދޭން ގުޅާނެ ވާހަކަ ބުނެލީ ތަންކޮޅެއް މަޑުންނެވެ. ނެތްތާގައި މައިދައިތަގެ މުޅަމަސްކެއަސް ފެންނަފަށުގައި މަތިއޮމާންކުރަން އޭނާ ރަނގަޅަށް ދަނެ އެވެ.

***

ސުކޫލް ނިންމާފައި އައިއިރު ހޫރައިން ހުރީ ގެއަށް ވަދެވުނުލެއް ލަސްވެފަ އެވެ. ދޮރު ކައިރީ ހުންނަ ފައިވާން ހަރުގައި ބޫޓު ބަހައްޓާފައި އޭނާ އަވަހަށް ގޮސް ކޮޓަރިއަށް ވަންހެން ހީވެސް ނުވެ ފަހަތުން ރީޝް އައިސް ދޮރު ހުޅުވާލައިފި އެވެ. ހޫރައިން އެނބުރި ބަލައިލީ ނުރުހުމާ އެކުގަ އެވެ. އޭނާ އަނގައިން ވެސް ނުބުނެ ދަބަސް ބަހައްޓާފައި ދާން ފެށީ ފާހާނާއާ ދިމާއަށެވެ. އިރުކޮޅަކުން ޔުނީފޯމް ބަދަލުކޮށްގެން ނިކުތްއިރު ރީޝް އެނދަށް ވެއްޓިގަނެގެން އޮތީ ބޫޓު ވެސް ނުބާލަ އެވެ. ހޫރައިން ނުކުތްހާއިރުން އޭނާ ތެދުވެ އިށީނދެއްޖެ އެވެ.

"ތިހާ ފޮނި ނުވިއްޔަކާ ނުވާނެތަ ހޫރު؟ އައިޒިކް ހީކުރާނީ ކީކޭ؟" ރީޝް ހަށަން ބަނދެލަމުން ހިތްހަމަނުޖެހުން ފައުޅުކުރި އެވެ.

އައިޒިކްއާ އެ ކުދިންނާ ދިމާވީ ސުކޫލުން ނުކުމެގެން ތަންކޮޅަކަށް އައިތަނާ އެވެ. ރަށުގައި ގެންގުޅޭ ކާރުތަކުގެ ތެރޭގައި އައިޒިކްގެ ސްޕޯޓްސް ކާރު ހިމެނެ އެވެ. އައިޒިކް ކާރަށް އަރަން އެދުމުން ހޫރައިން ބޭނުންވީ އެ ހުށައެޅުމާ ދެކޮޅުހަދާށެވެ. އެކަމަކު ރީޝް ހުރީ އެހެން ނުބުނެގެންނެވެ. ރީޝްގެ އެކުވެރިއަކަށް ވިއަސް ފެށުނީއްސުރެ ހޫރައިންއަށް އައިޒިކް ކަމަކުނުދެ އެވެ. މާ ބޮޑަށް އެކުވެރިވާން މަސައްކަތް ކުރާތީ އުނދަގޫވެ އެވެ. އޭނާއަށް ބަލާ ގޮތުންނާއި ބުނެލާ އެއްޗެހިން ހިތްހަމަނުޖެހެ އެވެ. ބްރޭންޑެޑް އަންނައުނު ލާފައި ޕްރައިވެޓް ކާރެއް ދުއްވާތީ އެހެން އަންހެންކުދިން އައިޒިކްގެ ސަމާލުކަމަށް އެދުނަސް އޭނައަށް ރަނގަޅީ އައިޒިކް އޭނާ ދަންނަކަމަށް ވެސް ނުހެދިއްޔާ އެވެ.

"އޭނާ ކޮންމެ އެއްޗެއް ހީކުރިއަސް އަހަރެންގެ ފަރުވާލެއް ނެތް. އަހަރެން ކުރިން ވެސް ބުނީމެއްނު ރީޝްގެ ހުރިހާ އެކުވެރިންނާ އެކުވެރިކަން ބާއްވަން އަހަންނަށް މަޖުބޫރު ނުކުރާށޭ،" ބުރުގާއެއް އަޅައިގެން އޭނާ މިސްރާބު ޖެހީ ކޮޓަރިން ނުކުންނާށެވެ.

ރީޝް ފާޑަކަށް އަނގަހަދާލައިފައި އަނެއްކާވެސް ވެއްޓިގަތީ އެނދަށެވެ.

ބަދިގެއަށް ވަދެވުމާ އެކު ހޫރައިންގެ ހިނގުން މަޑުޖައްސައިލެވުނީ އުނދުން ކައިރީ ފުރަގަސްދީގެން ހުރި މީހަކު ފެނިފަ އެވެ. އަތްކުރު ކަޅު ޓީޝާޓަކާއި ނޫ ޖިންސެއްގައި ހުރި ޒުވާނާ ބައިމަތިފުޅާވެފައި މުލައްދަނޑި ވަރުގަދަ އެވެ. ކުރުކުރުކޮށް ކޮށާލާފައިވާ ކަޅުކުލަ ގަދަ އިސްތަށިގަނޑު އެ ނޫން ގޮތަކަށް ހުއްޓާ ދުވަހަކު ދުށް ހަނދާނެއް ހޫރައިން ނުވެ އެވެ. އޭނާ އެ ގޭގައި އުޅޭތާ ވެސް މިހާރު ހަތަރު އަހަރު ވީ ނޫން ހެއްޔެވެ؟

ކުއްލިއަކަށް ބޭރުން އިވެން ފެށި ކުޑަކުއްޖެއްގެ ރުއިމުގެ އަޑާ އެކު ޒުވާނާ އެނބުރިލަން އުޅޭހެން ހީވެގެން ހޫރައިން އަވަހަށް ހިނގައިގެންފައި ގޮސް ފްރިޖް ކައިރިއަށް ހުއްޓިއްޖެ އެވެ. އެވަގުތު ހަމްރާއު އުނދުން ދޫކޮށްލާފައި ހަރުކޮށް އެތަނުން ނުކުމެގެން ހިނގައްޖެ އެވެ. ފްރިޖް ހުޅުވަން އުޅެފައި ހޫރައިން އެނބުރި ދޮރާ ދިމާއަށް ބަލާލުމަށް ފަހު އަވަހަށް ގޮސް އުނދުންމަތީ ހުރި ތަވާތެރޭ ރޯފިލަމުންދިޔަ ބިސްގަނޑާ ހަވާލުވި އެވެ. އެ އަނދައިގެން ނުދަނީސް އޭނާ ތަށްޓެއް ގެނެސް ލައިފައި ބެހެއްޓުމަށް ފަހު ފްރިޖުން ފިނި ފެންފުޅިއެއް ނަގައިގެން އެތަނުން ނުކުމެގެން ނައްޓާލި އެވެ. އޭނާ ކޮޓަރިއަށް ވަނުމުގެ ކުރިން ތުއްތު ރަނާ އުރައިގެން ހަމްރާއު ބަދިގެއަށް ވަންތަން ފެނުނެވެ.

ދަރިފުޅުގެ ލޮލުން ކަރުނަ ފުހެދީފައި ގެންގޮސް މޭޒު ކައިރީ ހުރި ގޮނޑިއެއް ދަމާލައިފައި ހިންދެމިލި ވަގުތު ބިސްގަނޑު މަތިން ހަނދާންވި އެވެ. ސިހުމާއި ތެޅިގަތުމާ އެކު އަވަހަށް އެދިމާއަށް ބަލާލިއިރު އުނދުންމަތީ ތަވާ ހުއްޓެވެ. އެކަމަކު ބިސްގަނޑެއް ނެތެވެ. ކިޗެން އައިލެންޑް މަތީ މަތިއަޅާފައި ހުރި ތަށި ލޮލުގައި އަޅައިގަތީ އަދި އޭގެ ފަހުންނެވެ. މަތި ނެގިއިރު ބިސްގަނޑެވެ. އެވާނީ  އަޒްހަރީގެ ކަމަކަށެވެ. ހަމްރާއު ހިތާއިހިތުން އަޒްހަރީއަށް ޝުކުރުއަދާކުރި އެވެ. ދެން ހަމަޖެހުމުގެ ނޭވައެއް ލައިފައި އޭނާ އެ ތަށި ހިފައިގެން ގޮސް ރަނާގެ ކައިރީ އިށީނދެއްޖެ އެވެ.

(ނުނިމޭ)