ރޭކާއަށް 70 އަހަރު: ބޮލީވުޑްގެ ރަން ބަތަލާއަށް އަދިވެސް ސަމާލުކަން

ކުރީގެ މެޑްރާސް މިހާރު ނަމަ ޗެންނާއީއަށް 1954ގައި އުފަންވި ބަނޫރޭކާ އިންޑިއާގެ މައި ފިލްމު އިންޑަސްޓްރީ ބޮލީވުޑްގެ 'ރަން ބަތަލާ'އަށް ވީ ގޮތަށް މިހާރު ވެސް އޭނާއަށް ލިބޭ ސަމާލުކަން ކުޑައެއް ނޫނެވެ.

ގިނަ މީހުންނަށް އޭނާ ފެންނަނީ އުމުރާ އެއްވަރަށް ސިފަތައް ބަދަލުނުވާ، އަބަދުވެސް 'ޒުވާންކަމުގައި' ހުންނަނިކޮށެވެ. އޭގައި ވެސް ސިއްރުތަކެއް އެބަ ހުއްޓެވެ.

ރޭކާއަށް އިއްޔެ 70 އަހަރު ވީ އެވެ. އޭނާގެ ނަން ގެއްލިގެން ނުދިއުމުގެ ސަބަބަކީ ފިލްމުތަކުން އާންމުންގެ ހަނދާންތަކާ ގުޅިފައި އޮތްލެއް ބޮޑުކަމާއި އޭނާގެ ޒާތީ ކަންކަމާ ބެހޭ އަޑުތަކަށް ލިބުނު ސަމާލުކަމެވެ.

ރޭކާގެ މަންމަ އާއި ބައްޕައަކީ ވެސް ފިލްމީ ތަރިންނެވެ. އެކަމަކު ބައްޕަ މަރުވުމާ އެކު އާމްދަނީ ހޯދުމުގެ ގޮތުން އޭނާ ވެސް ފިލްމީ ދާއިރާއަށް ވަނީ އެވެ. ބޮލީވުޑަށް ބަދަލުވެ ފުރުސަތެއް ހޯދުމުގެ މަސައްކަތް ފެށީ، ފުރާއުމުރުގައި ކެރިގެންނެވެ.

"ބޮލީވުޑަކީ ޖަންގައްޔެއް ކަހަލަ ތަނެއް، އެ ޖަންގަލީގައި އަހަރެން ހިނގަމުން ދިޔައީ ހިމާޔަތަށް ހަތިޔާރެއް ނެތި،" ކުރިން ދިން އިންޓަވިއުއެއްގައި ރޭކާ ބުންޏެވެ.

"އެއީ އަހަރެންގެ ހަޔާތުގެ ކުރީކޮޅު އެންމެ ބިރުގަތް އެއް މަރުހަލާ. އަހަރެންގެ ބަލިކަށިކަމުގެ ފައިދާ ނަގަން ފިރިހެނުން މަސައްކަތްކުރި."

ނަމަވެސް ބޮލީވުޑްގެ ތަރިއަކަށް ރޭކާވި އެވެ. ބޮލީވުޑަށް ފުރަތަމަ ދިޔަ އިރު ހިންދީ ބަހުން ރަނގަޅަށް ވާހަކަ ދައްކަން ވެސް ނޭނގެ އެވެ. އެކަމަކު ފަހުން ހިންދީ ބަހާއި އުރުދޫ ބަހަށް ފަރިތަވި އެވެ. އޭނާގެ ފިލްމުތަކަށް އެތައް ބައެއްގެ ސަމާލުކަން ލިބުނެވެ. ބޮލީވުޑްގެ އެންމެ ހިނގާ ބަތަލާއަށް ވި އެވެ. އިންޑިއާގެ ގައުމީ އެވޯޑް ވެސް ކާމިޔާބުކުރި އެވެ.

ރޭކާއަކީ އޭނާގެ ޒާތީ ދިރިއުޅުމުގެ ވާހަކަ ވެސް ފޮރުވުމެއް ނެތި ދައްކަމުން އައި ފަންނާނެކެވެ. މިސާލަކަށް ބައެއް ފިރިހެން ތަރިންނާ އެކު ލޯބީގެ ގުޅުން ބާއްވާކަމަށް ބުނެ އެވެ. ނަމަވެސް އެ ތަރިން އެކަމާ ދެކޮޅުހެދުމުން މީޑިއާގައި ބޭޒާރުވަނީ ރޭކާ އެވެ.

ރޭކާ އާއި ގުޅިފައި އޮތް އެންމެ ބޮޑު ވާހަކައަކީ އަމީތާބު ބައްޗަންއާ އެކު އޮތް ލޯބީގެ ގުޅުމެވެ. މަޝްހޫރު ފިލްމު 'ސިލްސިލާ' ކުޅެމުން ދިޔަ އިރު ވެސް އެ ލޯބީ ދެމިގެންދިޔަ ކަމަށް އަޑުއެރި އެވެ. ނަމަވެސް އަމީތާބު ދެމިހުރީ ޖަޔާބަދޫރީއާ އެކު އޭރުވެސް ކޮށްގެން ހުރި ކައިވެނީގެ މަތީގަ އެވެ.

ރޭކާ ވަނީ 1990ގައި ވިޔަފާރިވެރިއެއް ކަމަށްވާ މުކޭޝް އަގަރުވާލްއާ ކައިވެނިކޮށްފަ އެވެ. އެކަމަކު އެ ކައިވެނި ދެމިގެން ދިޔައީ މަދު މަސްތަކަކަށެވެ. ދެ މީހުން ވަކިން ދިރިއުޅެން ފެށި އެވެ. އެ އަހަރު އެމެރިކާގައި އޮތް ޕްރޮގްރާމެއްގައި ބައިވެރިވާން ރޭކާ އެ ގައުމުގައި ހުއްޓާ ހަބަރު ލިބުނީ އަގަރުވާލް އަމިއްލައަށް މަރުވި ކަމެވެ. 

އަގަރުވާލްގެ މަރާ އެކު ބައެއް މީޑިއާތަކުން ރޭކާއަށް ފޫޅުކެނޑި އެވެ. އޭނާއަށް ތުހުމަތުތައް ކުރި އެވެ. 

އެހާ ހިސާބުން ރޭކާގެ ޒާތީ ދިރިއުޅުން ވަރަށް ބޮޑަށް ސިއްރުކުރި އެވެ. މީޑިއާތަކަށް އިންޓަވިއުދިނުން ހުއްޓާލި އެވެ.

"މީޑިއާއިން އެމީހުން ބޭނުންވާ ރަހައެއް ލައްވައިގެން ބޭނުން ގޮތަކަށް އެއްޗެހި ލިއާނެ. އަހަރެން ވަރަށް ރުޅިވެސް އާދޭ އަދި އެހާމެ ދެރަ ވެސް ވޭ،" ކުރިން ބީބީސީއަށް ދިން އިންޓަވިއުއެއްގައި ރޭކާ ބުންޏެވެ.

"އަހަރެން ދެރަވެއްޖެ ނަމަ އެހާ ހިސާބުން ދެން ވާހަކަ ދެއްކުން ހުއްޓާލަނީ. އެއީ އަސްލު އަހަރެން ކަން ކުރި ގޮތަކީ ވެސް. ވާހަކަ ދެއްކުން ހަމަ ހުއްޓާލީ."

މިއަދު ވެސް ރޭކާ ފެނިއްޖެ ނަމަ އެތައް ބަޔަކު އުފާވެ އެވެ. އޭނާގެ ކުރީގެ ފިލްމެއްގެ ލަވަޔަކަށް ސްޓޭޖްގައި ނެށުން ކަހަލަ ހުނަރެއް ދައްކާލާ އިރު މީހުން ފޯރިނަގަ އެވެ.

ޒުވާންކޮށް ރޭކާ ފެންނަނީ ހަށިގަނޑަށް ދޭ ސަމާލުކަން ވެސް އެހާމެ ބޮޑުވުމުންނެވެ. ކަސްރަތުގެ މުހިންމުކަން ގިނަ މީހުންނަށް ނޭނގޭ ދުވަސްވަރު ވެސް ރޭކާ އައީ ކެއުމަށް ބެލުމާއި އެއިރޮބިކްސް ކަހަލަ ކަސްރަތުތަކުގެ ނަމޫނާއެކެވެ.