ޖެނިފާ ލޯޕޭޒް ބެން އެފްލެކް ގާތުން ވަރިވާން ހުށަހަޅައިފި

ހޮލީވުޑް ސުޕަސްޓާރުން ކަމަށްވާ ޖެނިފާ ލޯޕޭޒް އާއި ބެން އެފްލެކް 2022ގައި ކުރި ކައިވެނި ރަސްމީކޮށް ނިމުމަކަށް ގެންނަން ތައްޔާރުވެއްޖެ އެވެ.

ލޯޕޭޒް އިއްޔެ ވަނީ އެފްލެކް ގާތުން ވަރިވާން ލޮސް އެންޖެލިސްގެ ކޯޓަކަށް ހުށަހަޅައިފަ އެވެ.

ދެ އަހަރުވީ ކައިވެނި ރޫޅާލަން މި ހުށަހެޅީ މި ދެމަފިރިން ދޭތެރޭ މައްސަލަޖެހި، ދެ މީހުން ވަކިވެފައިވާ ކަމަށް ހަބަރުތައް ފެތުރޭތާ ދުވަސްތަކެއް ވެފައި ވަނިކޮށެވެ. ލޯޕޭޒް ވަނީ އާއިލާއާ އެކު ވަގުތު ހޭދަކުރުމަށް، އޭނާގެ ހޫނުމޫސުމުގެ ޓުއާ ކެންސަލްކޮށްފަ އެވެ. އަދި ބެވަލީ ހިލްސްގައި ދެމަފިރިން އުޅެމުން އައި ގެ ވިއްކާލަން އިޝްތިހާރު ވަނީ ޖަހައިފަ އެވެ.

ޖެނިފާ ލޯޕޭޒް އާއި ބެން އެފްލެކް އެންމެ ފަހުން ކައިވެނިކުރީ، ކުރިން ވެސް ގުޅިގެން އުޅުމަށް ފަހު ވަކިވިތާ ވިއްސަކަށް އަހަރުވާން ކައިރިވަނިކޮށެވެ.

ފިލްމު 'ޖިއަލީ' ކުޅުމުގެ ތަރިން އެންމެ ފުރަތަމަ ބައްދަލުވި ދެ ތަރިންގެ މެދުގައި ރަހުމަތްތެރިކަން އުފެއްދި، އެ ގުޅުން ލޯތްބަށް ބަދަލުވި އެވެ. އަދި ނޮވެމްބަރު 2022ގައި އެންގޭޖުވި އެވެ. ނަމަވެސް، ކުރަން އުޅޭ ކައިވެންޏަށް ލިބެމުންދިޔަ މީޑިއާގެ ސަމާލުކަން ހައްދުން ނައްޓާފައިވާ ކަމަށް ބުނެ، އެ ކައިވެނި ފަހު ވަގުތު ފަސްކުރީ އެވެ.

ލޯޕޭޒްގެ 2002ގެ ސިންގަލް 'ޖެނީ ފްރޮމް ދަ ބްލޮކް' އިން އެފްލެކް ފެނިފައިވެ އެވެ. އެ ލަވައިގައި ދައްކަނީ އެ ދެ މީހުންގެ ގުޅުމަށް ޕަޕަރާޒީންގެ އުނދަގޫ ބޮޑުވެފައިވާ ކަމެވެ.

ދެ މީހުން ރަސްމީކޮށް ވަކިވީ ޖެނުއަރީ 2004ގަ އެވެ. އަދި ދެން އައި އަހަރުތަކުގައި ދެ މީހުން ވެސް އެހެން މީހުންނާ އިނދެ، ދަރިން ވަނީ ލިބިފަ އެވެ.

ލޯޕޭޒް ބޭސްބޯޅަ ކުޅުންތެރިޔާ އެލެކްސް ރޮޑްރިގޭޒްއާ އެކު ކުރި އެންގޭޖްމެންޓް ރޫޅާލިތާ މަސްތަކެއް ފަހުން އެފްލެކްއާ އަލުން ގުޅުނުކަން އިންސްޓަގްރާމްގައި ޖުލައި 2021ގައި އިއުލާންކުރުން ވެގެންދިޔައީ ފޭނުންނަށް ވަރަށް އުފާވެރި ހަބަރަކަށެވެ. އެ ދެ މީހުން ވެސް އެކަމާ މެދު އުފާކޮށް އިންޓަވިއުތައް ދީފައިވެ އެވެ. ލޯޕޭޒް ބުނެފައިވާގޮތުގައި އެ ދެ މީހުންނަށް ދެވަނަ ފުރުސަތެއް ލިބުމަކީ ރީތި ލޯބީގެ ވާހަކައެކެވެ.

ލޯޕޭޒް ވަނީ އޭނާ އަމިއްލައަށް ޕްރޮޑިއުސްކުރި އަލްބަމް 'ދިސް އިޒް މީ... ނައު'އާ ބެހޭގޮތުން 2024ގައި ޑޮކިއުމެންޓްރީއެއް ނެރެފަ އެވެ. 'ދަ ގްރޭޓް ލަވް ސްޓޯރީ ނެވާ ޓޯލްޑް'ގެ ނަން ދީފައިވާ އެ ޑޮކިއުމެންޓްރީގައި އެފްލެކް ބުނިގޮތުގައި، ދެ މީހުންގެ ގުޅުން އާއްމުންނަށް ހާމަކުރަން ލޯޕޭޒް ބޭނުންވާތީ އޭނާ ވަނީ ހިތާ ދެކޮޅަށް ނަމަވެސް އެގޮތަށް އުޅެން ދަސްކޮށްފަ އެވެ.

ފަހަކަށް އައިސް ދެ މީހުން އުޅެމުން އައީ ވަކިންނެވެ. ޖުލައި ފަހުކޮޅު ލޯޕޭޒްގެ އުފަންދުވަސް ފާހަގަކުރުމަށް 'ބްރިޖަޓަން' ތީމްގެ ޕާޓީއެއް ބޭއްވި އިރު އެފްލެކް އެތަނުން ފެނިފައެއް ނުވެ އެވެ.

ލޯޕޭޒްއަށް ކުރީގެ ފިރިމީހާ މާކް އެންތަނީއާ އެކު ލިބިފައިވާ ދެ ކުދިން އެބަތިއްބެވެ. އަދި އެފްލެކް އާއި އޭނާގެ ކުރީގެ އަންހެނުން ޖެނިފާ ގާނާގެ ތިން ކުދިން ތިބެ އެވެ.