މެތިއު ޕެރީ މަރުވި މައްސަލައިގައި 5 މީހެއްގެ މައްޗަށް ދައުވާކޮށްފި

އެމެރިކާގެ އެކްޓަރު މެތިއު ޕެރީ މަރުވި މައްސަލައިގައި، ދެ ޑޮކްޓަރަކާއި ޕެރީގެ އެސިސްޓެންޓް ހިމެނޭ ގޮތަށް، ފަސް މީހެއްގެ މައްޗަށް ދައުވާ އުފުލައިފި އެވެ.

މަޝްހޫރު ޓީވީ ސިލްސިލާ 'ފްރެންޑްސް'ގައި އަދާކުރި ޗޭންޑްލާ ބިންގްގެ ރޯލުން އެތައް ބައެއްގެ ލޯބި ހޯދި ޕެރީ ،54، މިދިޔަ އޮކްޓޯބަރު މަހު މަރުވެފައި އޮއްވާ ފެނުނީ އޭނާގެ ގޭގެ ސްވިމިން ޕޫލް ތެރޭގަ އެވެ. ޕޯސްޓް މޯޓަމް އިން އެނގުނު ގޮތުގައި ޕެރީގެ ލޭގައި ވަރަށް މަތީ މިންވަރަކަށް ކެޓަމީން ހުއްޓެވެ. އެހެންކަމުން އޭނާ މަރުވީ އޭގެ ސަބަބުން ކަމަށް ވަނީ ކަނޑައަޅައިފަ އެވެ.

ފުލުހުން އިއްޔެ ބުނިގޮތުގައި ޕެރީ މަރުގެ މައްސަލައިގައި މިދިޔަ މޭ މަހު ފެށި ތަހުގީގުގައި ވަނީ، ގިނަ އަދަދަކަށް ކެޓަމީން ސަޕްލައިކުރާ ފުޅާ ނެޓްވޯކެއް އަތުލައިގެންފަ އެވެ.

ޔޫއެސް އެޓާނީ މާޓިން އެސްޓްރާޑާ ވިދާޅުވިގޮތުގައި ދައުވާ ލިބޭ ފަސް މީހުން ފައިސާގެ ދަހިވެތިކަމުގައި ވަނީ، މަސްތުވާތަކެއްޗަށް ދެވިހިފާފައިވާ ޕެރީގެ އެ ހާލަތުގެ ނާޖާއިޒު ފައިދާ ނަގައިފަ އެވެ. އެ މީހުން އޭނާއަށް ކެޓަމީން ދިނީ އެއީ ކިހާ ގެއްލުންހުރި ކަމެއްކަން ދެނެތިބެކަން ވެސް އެސްޓްރާޑާ ފާހަގަކުރެއްވި އެވެ.

ހޭނެއްތުމަށް ބޭނުންކުރާ ބާރުގަދަ ބޭހެއް ކަމަށްވާ ކެޓަމީން، ޑިޕްރެޝަން އާއި އެންޒައިޓީ އަދި ތަދުގެ ފަރުވާއަށް ވެސް ބޭނުންކުރެ އެވެ. ޕެރީގެ ގާތް މީހުން ތަހުގީގަށް ކިޔައިދީފައިވާ ގޮތުގައި އޭނާ ގެންދިޔައީ ކެޓަމީން އިންފިއުޝަން ތެރަޕީ ހޯދަމުންނެވެ. ނަމަވެސް ޕެރީ އެންމެ ފަހުން އެ ތެރަޕީ ހޯދާފައިވަނީ މަރުވުމުގެ ހަފްތާއަކަށް ވުރެ ގިނަ ދުވަސް ކުރިން ކަމަށްވާތީ، މަރުވި އިރު އޭނާގެ ހަށިގަނޑުގައި ހުރީ އެ ފަރުވާގައި ދިން ކެޓަމީންގެ އަސަރު ނޫން ކަމަށް ތަހުގީގުން ވަނީ ކަނޑައަޅައިފަ އެވެ.

މެޑިކަލް އެގްޒަމިނަރު ވިދާޅުވިގޮތުގައި ޕެރީގެ ހަށިގަނޑުގައި ކެޓަމީން ހުރީ އާއްމުކޮށް ހޭނެއްތުމަށް ބޭނުންކުރާހާ މަތީ މިންވަރަކަށެވެ.

ޕެރީގެ މަރުގެ މައްސަލައިގައި ތުހުމަތުކުރެވޭ ފަސް މީހުންގެ ތެރެއިން ތިން މީހަކު ވަނީ ދައުވާއަށް އިއުތިރާފްވެފަ އެވެ. އަދި އަނެއް ދެ މީހުން އިއްޔެ ވަނީ ހައްޔަރުކޮށްފަ އެވެ.

ދައުވާއަށް އިއުތިރާފްވީ:

މި މައްސަލައިގައި އިއްޔެ ހައްޔަރުކުރި ދެ މީހުން ވަނީ ދައުވާއަށް އިންކާރު ކޮށްފަ އެވެ. އެއީ:

ޕްރޮސެކިއުޓަރުން ބުނިގޮތުގައި ޕެރީގެ އެސިސްޓެންޓް އިވަމާސާ ދެ ޑޮކްޓަރުންނާ ގުޅިގެން، ޕެރީ މަރުވުމުގެ ކުރިން ހޭދަވި ހަފްތާތަކުގެ ތެރޭގައި، 50،000 ޑޮލަރުގެ ކެޓަމީން އޭނާއަށް ފޯރުކޮށްދިފައިވެ އެވެ. އަދި ޕެރީ މަރުވުމުގެ ކުރިން އައި ހަތަރު ދުވަސް ތެރޭ އިވަމާސާ ޕެރީއަށް 27 ފަހަރު ކެޓަމީން އިންޖެކްޓްކޮށްފައިވާ ކަމަށް ވެސް ދައުވާގައި ބުނެފައިވެ އެވެ. 

ތުހުމަތުކުރެވޭ މީހުން ޕެރީގެ މަރަށް ފަހު އެ މީހުންގެ އަމަލުތައް ފޮރުވަން މަސައްކަތްތަކެއް ކޮށް، މެޑިކަލް ރެކޯޑްތަކެއް އޮޅުވާލާފައިވާކަން ވެސް ތަހުގީގަށް ވަނީ ހޯދިފަ އެވެ.

ޖަސްވީން ސަންގާ އާއި ސެލްވެޑޯ ޕްލެސެންސިއާގެ ޝަރީއަތްތައް ފަށަން ލަފާކުރަނީ އޮކްޓޯބަރުގަ އެވެ.

ޕެރީ މަރުވުމަށް މެދުވެރިވި ކަންކަމުގެ ތެރޭގައި ޕޫލް ތެރޭގައި ގެނބުމާއި ހިތުގެ ބައްޔާއި މަސްތުވާތަކެތީގެ ފަރުވާއަށް ބޭނުންކުރާ ބޭހެއްގެ އަސަރު ވެސް ވަނީ ފާހަގަކުރެވިފަ އެވެ.

ޕެރީ އެންމެ މަޝްހޫރުވި ދުވަސްވަރުން ފެށިގެން ގެންދިޔައީ ތަދުކަނޑުވާ ބޭހާއި ރަލަށް ދެވިހިފުމުގެ މައްސަލައާ ކުރިމަތިލަމުންނެވެ. އޭގެ ސަބަބުން ލިބުނު ގެއްލުންތަކާއި މުޅި ދިރިއުޅުން ހަލާކުވެދިޔަ ގޮތް، އޭނާގެ ހަޔާތާ ބެހޭ ފޮތުގައި ކިޔައިދީފައިވެ އެވެ. 

ޕެރީ 2016 ވަނަ އަހަރުގެ އިންޓަވިއުއެއްގައި ބުނެފައިވާ ގޮތުގައި 'ފްރެންޑްސް' ކުޅެމުންދިޔަ އިރު، މަސްތުވާތަކެއްޗާއި ރަލުގެ ސަބަބުން، ތިން އަހަރުގެ ދިގު މުއްދަތެއް އޭނާގެ ހަނދާނަކު ނެތެވެ. ކިތަންމެ ފަހަރަކު ފަރުވާ ހޯދި ނަމަވެސް އޭނާއަށް މަސްތުވާތަކެތިން ސަލާމަތެއް ނުވެވުނެވެ.ޕެރީ އޭނާގެ ފޮތުގައި ބުނިގޮތުގައި 2001 ވަނަ އަހަރުން ފެށިގެން އޭނާ އުޅެމުން އައީ މަސްތުވުމާ ދުރުގައި ނަމަވެސް، އެއީ "60 ނުވަތަ 70 ވަރަކަށް ފަހަރު ފިޔަވަ" އެވެ.