ޑޮނަލްޑް ޓްރަމްޕް (ކ) އަދި މެޓް ޑޭމަން 'އެއާ'ގެ މަންޒަރެއްގައި
ޓްރަމްޕުގެ ކެމްޕެއިނު ވީޑިއޯއެއްގައި މެޓް ޑޭމަންގެ ޑައިލޮގެއް ބޭނުންކުރުން ކުށްވެރިކޮށްފި
އެމެރިކާގެ ރިޔާސީ އިންތިހާބަށް ކުރިމަތިލައްވާފައިވާ ކުރީގެ ރައީސް ޑޮނަލްޑް ޓްރަމްޕުގެ ކެމްޕެއިން ވީޑިއޯއެއްގައި ފިލްމު 'އެއާ'ގެ ޑައލޮގެއް ބޭނުންކުރުމުން މެޓް ޑޭމަން އާއި ބެން އެފްލެކްގެ ޕްރޮޑަކްޝަން ކުންފުނިން އެކަން ކުށްވެރިކޮށްފި އެވެ.
މި އަހަރު ރިލީޒްކުރި އެ ފިލްމުގައި މެޓް ޑޭމަން ހުށަހަޅައިދޭ ޑައިލޮގެއްގެ އަޑު ހިމަނައިގެން އުފައްދާފައިވާ ވީޑިއޯ ޓްރަމްޕުގެ ސޯޝަލް މީޑިއާ ޕްލެޓްފޯމް ޓްރޫތު ސޯޝަލްގައި ވަނީ ނެރެފަ އެވެ. އެ އޯޑިއޯ ގެނެސްދީފައިވަނީ ޓްރަމްޕް ކުޑައިރު އާއި ރައީސްގެ ގޮތުގައި ފެންނަ މަންޒަރުތަކަކާ އެކުގަ އެވެ.
'އެއާ'ގައި ދައްކަނީ ނައިކީ ވަރުގަދަ ބްރޭންޑަކަށް ވުމުގެ ކުރިން 1980ގެ އަހަރުތަކުގެ ތެރޭ ބާސްކެޓްބޯޅަ ތަރި މައިކަލް ޖޯޑަންއާ އެކު ޕާޓްނާޝިޕެއް ހަދަން ކުރި މަސައްކަތާއި ހުރިހާ ކަމެއް ބަދަލުކޮށްލި އެއްބަސްވުމަކާ އެކު ނައިކީގެ ކާމިޔާބު އެއާ ޖޯޑަން ބޫޓު އުފަންކުރި ގޮތެވެ.
އެ ފިލްމު އުފައްދައި ލީޑް ރޯލުތައް ކުޅުނު މެޓް ޑޭމަން އާއި ބެން އެފްލެކްގެ އާޓިސްޓްސް އެކުއިޓީ އިން ބުނީ ޓްރަމްޕުގެ ކެމްޕެއިނުން އެ ޑައިލޮގް ބޭނުންކުރީ ހުއްދަ ނުހޯދާ ކަމަށާއި އެކަން އެ ސްޓޫޑިއޯއަށް ދުރާލާ އެނގިފައި ވެސް ނުވާ ކަމަށެވެ. އަދި އެ އޯޑިއޯ ބޭނުންކުރަން އެ ކުންފުނީގެ ރުހުން ނެތް ކަމުގެ ނޯޓިސް ފޮނުވާ ކަމަށް ވެސް އެ ތަނުން ނެރުނު ބަޔާނުގައިވެ އެވެ.
ގާނޫނީ ގިނަ މައްސަލަތަކެއް ކުރިމަތިވެވަޑައިގަންފައިވާ ޓްރަމްޕު، ދައުލަތުގެ ސިއްރު ލިޔެކިޔުންތަކެއް ގެއަށް ގެންދެވި މައްސަލައިގައި ގިނަ ދައުވާތަކަކަށް ޖަވާބުދާރީވުމަށް މިއަދު ކޯޓަށް ހާޒިރުވެވަޑައިގަންނަވާނެ އެވެ.
ޓްރަމްޕު ވެރިކަމުގައި ހުންނެވި އިރު ގެންގުޅުއްވި ސިޔާސަތުތަކަށް ހޮލީވުޑްގެ ގިނަ އަދަދެއްގެ ތަރިންގެ ފާޑުކިޔުން އަމާޒުވި އެވެ. އަދި ބައެއް މިއުޒީޝަނުން ވަނީ ޓްރަމްޕުގެ ކެމްޕެއިނުގައި އެ މީހުންގެ އުފެއްދުންތައް ބޭނުންނުކުރަން ގޮވާލައިފަ އެވެ. މީގެ ތިން އަހަރު ކުރިން ދަ ރޯލިން ސްޓޯންސް އިން ޓްރަމްޕާ މެދު ގާނޫނީ ފިޔަވަޅު އަޅާނެ ކަމުގެ އިންޒާރު ދިން އިރު ނީލް ޔަންގް ވަނީ އޭނާގެ ލަވަތަކެއް ބޭނުންކުރުމުން ޓްރަމްޕުގެ މައްޗަށް ދައުވާކޮށްފަ އެވެ.
އަޑެލް، އާރްއީއެމް، ކުއީންގެ ބްރަޔަން މޭ، އެލްޓަން ޖޯން އަދި ޕްރިންސްގެ އާއިލާއިން ވެސް ވަނީ ޓްރަމްޕު އެ މީހުންގެ މިއުޒިކް ބޭނުންކުރުމާ ދެކޮޅު ހަދައިފަ އެވެ.