އަނުޝްކާ ޝަރުމާ މީހެއްގެ ސައިކަލު ފަހަތުގައި ދާއިރު ދެ މީހުން ކުރެ މީހަކު ހެލްމެޓް ނާޅާ
އަނުޝްކާ އާއި އަމީތާބު ހެލްމެޓް ނާޅާ ސައިކަލުގައި ދިޔަ މައްސަލަ ހޫނުވެއްޖެ
މުމްބާއީގައި މަގު ބަންދުވުމާއި ޓްރެފިކް ޖޭމްވުމާ ގުޅިގެން ކާރުގައި ނުދެވި ލަސްވާތީ ސައިކަލު ފަހަތުގައި ދަތުރުކުރި އިރު ހެލްމެޓް ނާޅާ ތިބުމުން އަމީތާބު ބައްޗަން އަށާއި އަނުޝްކާ ޝަރުމާއަށް ފާޑުކިޔުން އަމާޒުވެއްޖެ އެވެ.
ދެ އެކްޓަރުންނާއި ސައިކަލު ދުއްވި މީހުން ވެސް ގަވާއިދާ ހިލާފުވެފައިވާތީ އާއްމުން ވަރަށް ބޮޑަށް ހިތްހަމަނުޖެހި ސޯޝަލް މީޑިއާގައި މުމްބާއީގެ ފުލުހުން ޓެގްކޮށް ވަރަށް ބޮޑަށް މައްސަލަ ޖައްސަން ފެށުމުން ފުލުހުންގެ ޓުވިޓާ އެކައުންޓުން ވަނީ ދެ މައްސަލަ ޓްރެފިކް ފުލުހަށް ފޮނުވާފައިވާ ކަމަށް ބުނެ ޖަވާބުދީފަ އެވެ.
އަނުޝްކާ އިއްޔެ އޭނާގެ ބޮޑީގާޑުގެ ސައިކަލު ފަހަތަށް އަރައިގެން ނައްޓާލީ ގަހެއް ވެއްޓި މަގު ބަންދުވުމާ ގުޅިގެންނެވެ. އެ މަންޒަރުގެ ވީޑިއޯއެއް ޕަޕަރާޒީ އެކައުންޓަކުން ވަނީ އާއްމުކޮށްފަ އެވެ.
އަމީތާބު ހެލްމެޓް ނާޅާ ދިޔައީ ޓްރެފިކްގައި ތާށިވެފައި އިންދާ ސައިކަލުގައި ގެންގޮސްދިން އާއްމު މީހެއްގެ ފަހަތުގަ އެވެ.
އަމީތާބު ސޯޝަލް މީޑިއާގައި އެ މީހާއަށް ޝުކުރު އަދާކުރި އިރު ފޮޓޯއެއް ވެސް ލި އެވެ. އޭނާ ބުނީ ނަން ނޭނގޭ އެ މީހާގެ ސަބަބުން އޭނާ ޓްރެފިކުން ސަލާމަތްވެ، ގަޑިއަށް މަސައްކަތަށް ދެވުނު ކަމަށެވެ.
މި ދެ މައްސަލައިގައި ވެސް، ސައިކަލު ދުއްވަން ތިބި ދެ މީހުން ވެސް ހެލްމެޓެއް ނާޅަ އެވެ.