މީޑިއާ އިން ކަންކުރި ގޮތުން ވަރަށް ދެރަވި: ރާޖު

އޮރިޔާންކާޑު ގެންގުޅުމުގެ ތުހުމަތުކޮށް އޭނާ ހައްޔަރުކޮށްގެން ފުލުހުން ބެލި މައްސަލައާ ގުޅިގެން މީޑިއާ އިން ކަންކުރި ގޮތުން ވަރަށް ދެރަވި ކަމަށް ވިޔަފާރިވެރިޔާ ރާޖު ކުންދުރާ ބުނެފި އެވެ.

ޝިލްޕާ ޝެޓީގެ ފިރިމީހާ ރާޖު އޮރިޔާން ކާޑު އުފައްދައި އެ ގެންގުޅުނު ކަމަށް ތުހުމަތުކޮށް ހައްޔަރު ކުރީ މިދިޔަ އަހަރު އެވެ. އޭނާ ދެ މަސް ވަންދެން ޖަލުގައި ބެހެއްޓުމަށް ފަހު ކަފާލާތުގެ ދަށުން ދޫކޮށްލީ އެވެ.

އެ މައްސަލާގައި މީޑިއާ އިން ވަނީ ރާޖުގެ މައްޗަށް ކުރެވޭ ބޮޑެތި ތުހުމަތުތަކުގެ ވާހަކަ ދައްކައިފަ އެވެ. އެކަމަކު އެ ހުރިހާ ތުހުމަތަކުން ބަރީއަވާ ކަމަށް އެކި ފަހަރު މަތިން ރާޖު ބުނެފައިވެ އެވެ.

ރާޖު އެންމެ ފަހުން ބުނިގޮތުގައި އޭނާ އާންމު ތަންތަނަށް ނުކުމެ އުޅޭއިރު މާސްކު އަޅައިގެން އުޅެނީ މީޑިއާ އަށް ފިލާށެވެ. ރައްޓެހިންނާއި އާއިލާގެ ކުރިމަތީ އެގޮތަށް މޫނު ފޮރުވައިގެން ނޫޅޭ ކަމަށާއި މީޑިއާ އަށް ފިލަން ޖެހުނީ އޭނާއާ މެދު ކަންކުރި ގޮތުން ކަމަށް ބުންޏެވެ.

އޭނާ މި ގޮތަށް ވާހަކަދެއްކީ، ޓްވިޓާގައި އޭނާއާ ސުވާލުކުރަން ފޮލޯވަރުންނަށް ހުޅުވާލުމުން، އާންމުންގެ މީހަކު ކުރި ސުވާލެއްގެ ޖަވާބުގަ އެވެ. އަބަދު މާސްކު އަޅައިގެން ހުއްޓާ ފެންނަނީ ކީއްވެތޯ އެހުމުން ރާޖު ބުނީ، އެކަން އެގޮތަށް ކުރަނީ އޭނާގެ މޫނުގެ ފޮޓޯ ނެގުމުގެ ފުރުސަތު މީޑިއާ އަށް ދޭން ބޭނުން ނުވާތީ ކަމަށެވެ. މީޑިއާ އިން އޭނާގެ މައްޗަށް ކުރިއަށް ގެންދިޔަ "ޝަރީއަތާ" ގުޅިގެން ހިތުގައި ޖެހިފައި ހުރި ކަމަށާއި މީޑިއާ އަކީ ގާނޫނަށް ވުރެ މަތީ ބައެއް ނޫން ކަމަށް ވެސް އޭނާ ބުންޏެވެ.

އޮރިޔާންކާޑު މައްސަލާގައި އޭނާގެ މައްޗަށް ތުހުމަތުތަކެއް ކޮށް ހައްޔަރު ކުރި ސަބަބު ވަރަށް އަވަހަށް އާންމުންނަށް އެނގޭނެ ކަމަށާއި އެ ވާހަކަ ތިލަވާ ދުވަހެއް އަންނާނެ ކަމަށް ވެސް ރާޖު ބުންޏެވެ.